iسینیٹ اجلاس،اراکین کابلوچستان واقعہ کی شدید مذمت ،مجرموں کو سخت ترین سزائیں دینے اور ملک بھر میں خوتین اور بچوں کے ساتھ ہونے والے مظالم کو بند کرنے کیلئے فوری قانون سازی کا مطالبہ

اسلام آ باد(اُردو پوائنٹ اخبارتازہ ترین - آن لائن۔ 24 جولائی2025ء) ایوان بالا میں اراکین نے بلوچستان میں غیر ت کے نام پر مرد اور خاتون کے قتل کی شدید مذمت کرتے ہوئے مجرموں کو سخت ترین سزائیں دینے کا مطالبہ کیا ہے ،اراکین نے پورے ملک میں خوتین اور بچوں کے ساتھ ہونے والے مظالم کو بند کرنے کیلئے فوری قانون سازی کا بھی مطالبہ کیا ہے۔جمعرات کو سینیٹ اجلاس کے دوران بلوچستان میں غیر ت کے نام پر قتل کے معاملے پر بات کرتے ہوئے بلوچستان عوامی پارٹی کے سینیٹر رمیش کمار نے کہاکہ بلوچستان میں مرد اور خاتون کا قتل غیرت کے نام پر نہیں بلکہ بے غیرتی کے نام پر ہوا ہے ۔

انہوں نے کہاکہ ایسے واقعات پورے ملک میں ہورہے ہیں۔ انہوں نے کہاکہ سندھ میں ڈاکٹر نمرتا کے ساتھ کیا ہوا تھا پنجاب کی یونیورسٹیوں میں معصوم لڑکیوں کو پاس کرنے کا لالچ دیگر زیادتی کی جاتی ہے ۔

(جاری ہے)

انہوں نے کہاکہ سندھ اور پنجاب میں غیر ت کے م پر واقعات زیادہ ہوتے ہیں ۔انہوںنے کہاکہ پورے ملک میں جرگہ اور وڈیرہ سسٹم ہے بلوچستان میں آگ لگی ہوئی ہے اور ایسے واقعات کو بھی بڑھا چڑھا کر پیش کیا جارہا ہے ۔

انہوں نے کہاکہ بلوچستان حکومت نے اپنی مدعیت میں پرچہ درج کیا ہے اور ایک سردار کو جیل میں ڈالا ہے ۔انہوں نے کہاکہ بلوچستان کی طرح کی مثال پورے ملک میں ہونی چاہیے تاکہ اس طرح کے واقعات کو سدباب ہوسکے ۔انہوں نے کہاکہ ہمیں عورتوں اور بچوں کے حوالے سے اپنی ذہنیت تبدیل کرنی ہوگی ۔انہوں نے کہاکہ تفتیش کرنا اداروں کا کام ہے ۔سینیٹر جان بلیدی نے کہاکہ ایسے واقعات ہمارے معاشرے پر بدنما داغ کی طرح ہیں ۔

انہوں نے کہاکہ پورے ملک میں ایسے واقعات رونما ہوتے ہیں ہمیں قانون کی حکمرانی کو قائم رکھنے کیلئے اقدامات اٹھانے چاہیے ۔سینیٹر ڈاکٹر خلیل طاہر سندھو نے کہاکہ بلوچستان کا واقعہ نہایت افسوسناک ہے یہ مردانگی نہیں بلکہ بے غیرتی ہے ۔انہوں نے کہاکہ کیا آج تک پاکستان میں کسی بہن نے کسی بھائی کو غیر ت کے نام پر مارا ہے ۔سینیٹر فیصل سبز واری نے کہاکہ اس ملک میں خواتین اور بچیوں کے ساتھ نہایت برا سلوک کیا جارہا ہے اور ایسے واقعات میں ملوث افراد کے خلاف کوئی کاروائی نہیں ہوتی ہے ۔

انہوں نے کہاکہ پورے ملک میں بچیوں کو درندگی کا نشانہ بنایا جاتا ہے ۔سینیٹر محسن عزیز نے کہاکہ بلوچستان کا واقعہ نہایت ظالمانہ ہے اس کی جتنی بھی مذمت کی جائے کم ہے ۔سینیٹر حسنہ بانو نے کہاکہ بلوچستان کا واقعہ نہایت دلخراش ہے اس واقعے نے پورے پاکستان کو جھنجوڑ کر رکھ دیا ہے ،یہ واقعہ انسانیت کے خلاف ایک جرم ہے۔ انہوںنے کہاکہ اس واقعے کی فوری تحقیقات کی جائیں اور مجرموں کو سخت ترین سزائیں دی جائیں ۔

سینیٹر سرمد علی نے کہاکہ جرائم کی سزا دینا ریاست کی ذمہ داری ہے ہمیں ایسی قانون سازی کرنی چاہیے کہ جرگہ سسٹم کو ختم کیا جاسکے ۔انہوں نے کہاکہ ہم کب تک ایسے نظام کا حصہ ہونگے جس میں ایسے جرائم ازادی سے کئے جائیں ۔سینیٹر مولانا عطاء الرحمن نے کہاکہ بلوچستان واقعے کی شدید مذمت کرتے ہیں ۔انہوں نے کہاکہ ضلع ٹانک راغزئی میں دو بچے مدرسے جارہے تھے کہ راستے میں ریاستی ادارو ں کے ڈرون حملوں کانشانہ بن گئے ۔انہوں نے کہاکہ ایسے واقعات کا سدبات ہونا چاہیے اور ریاست کو یہ رویہ ترک کرنا چاہیے۔اعجاز خان