Live Updates

عمران خان کو قید تنہائی میں رکھنا آئین، قانون اور انسانیت کی توہین ہے، حلیم عادل شیخ

جمعہ 1 اگست 2025 19:51

کراچی (اُردو پوائنٹ اخبارتازہ ترین - این این آئی۔ 01 اگست2025ء)پاکستان تحریک انصاف سندھ کے صدر حلیم عادل شیخ نے کہا ہے کہ عمران خان کو قید تنہائی میں رکھنا آئین، قانون اور انسانیت کی توہین ہے۔ سابق وزیراعظم اور اس قوم کے عظیم لیڈر کو دو سال سے بے بنیاد اور جھوٹے مقدمات میں قید رکھا گیا ہے، جہاں انہیں نہ صرف قانونی، بلکہ انسانی اور اخلاقی حقوق سے بھی محروم کیا جا رہا ہے۔

انہوں نے کہا کہ خفیہ ٹرائلز، اہلخانہ، وکلا اور ڈاکٹروں سے ملاقات کی بندش غیر قانونی اور غیر آئینی ہے عمران خان کو ایک ایسے ماحول میں رکھا گیا ہے جہاں ان کی جسمانی اور ذہنی صحت بری طرح متاثر ہو رہی ہے۔ یہ سب کچھ سیاسی انتقام اور دبا کے تحت ہو رہا ہے تاکہ عمران خان کو جھکایا جا سکے لیکن عمران خان اس ملک و قوم کے حقوق کے لئے ڈٹے ہوئے ہیں۔

(جاری ہے)

حلیم عادل شیخ نے کہا کہ جیل میں سہولیات کی بندش، روزانہ 22 گھنٹے قید تنہائی اور ڈاکٹروں تک رسائی نہ دینا کھلی ریاستی زیادتی ہے۔ ایسی خفیہ عدالتیں جو ملزم کے وکلا اور اہلخانہ کو مقدمے میں شریک نہ کریں، انصاف کا نہیں بلکہ فسطائیت کا مظہر ہیں۔انہوں نے کہا کہ انسداد دہشتگردی کی عدالتوں کے حالیہ فیصلے، جن میں پی ٹی آئی قیادت کو جھوٹے مقدمات میں سزائیں سنائی گئیں، عدلیہ پر دبا اور آئین و انصاف کے منہ پر طمانچہ ہیں یہ تمام فیصلے 5 اگست کی تحریک کو دبانے کی کوشش ہیں، مگر ہم ان ہتھکنڈوں سے گھبرانے والے نہیں۔

5 اگست کو ملک بھر میں بھرپور عوامی تحریک کا آغاز ہوگا، جس میں سندھ کے تمام اضلاع میں احتجاج کیے جائیں گے۔ انہوں نے واضح کیا کہ کارکنوں کے حوصلے جھوٹے کیسز اور ریاستی جبر سے نہیں ٹوٹیں گے۔حلیم عادل شیخ نے کہا کہ ریاست اپوزیشن اتحاد اور جمہوری تحریک کو روکنے کے لیے بوکھلاہٹ کا شکار ہے۔ پوری قوم عمران خان کے ساتھ کھڑی ہے، وہ قوم جس نے مہنگائی، کرپشن اور جبر کے خلاف عمران خان کو اپنی امید بنایا ہے۔ ظلم و زیادتیوں سے عوام کے دلوں میں نفرت بڑھ رہی ہے، اور وقت آنے والا ہے جب عوام ظلم کے سامنے دیوار بن جائے گی۔