ایرانی صدکی چیئرمین سینیٹ سے ملاقات، دوطرفہ تعلقات پر گفتگو

اسلام آباد(اُردو پوائنٹ اخبارتازہ ترین - این این آئی۔ 03 اگست2025ء)چیئرمین سینیٹ پاکستان سید یوسف رضا گیلانی سے اسلامی جمہوریہ ایران کے صدر ڈاکٹر مسعود پزشکیان نے پارلیمنٹ ہاؤس اسلام آباد میں ملاقات کی۔چیئرمین سینیٹ نے صدر ایران کا پرتپاک خیر مقدم کرتے ہوئے کہا کہ ان کا دورہ پاکستان دونوں ممالک کے درمیان دوستی، بھائی چارے اور باہمی تعاون کو مزید مستحکم کرنے میں سنگِ میل ثابت ہوگا۔

ملاقات کے دوران چیئرمین سینیٹ نے صدر پزشکیان کو اسرائیل کے ساتھ حالیہ تنازعے میں ایران کی تاریخی کامیابی پر مبارکباد دی۔ انہوں نے کہا کہ پاکستان نے سب سے پہلے ایران کے حقِ خوددفاع کو اقوام متحدہ کے چارٹر کے تحت تسلیم کیا اور پاکستانی پارلیمان نے اسرائیلی جارحیت کے خلاف اور ایرانی خودمختاری کی حمایت میں ایک متفقہ قرارداد منظور کی۔

(جاری ہے)

چیئرمین سینیٹ نے اس بات پر زور دیا کہ پاکستان تمام تنازعات کے پرامن حل کا خواہاں ہے اور جنگ کسی مسئلے کا حل نہیں۔ انہوں نے امید ظاہر کی کہ مشرق وسطیٰ اور مغربی ایشیا میں دیرپا امن، استحکام اور ترقی کا قیام ممکن ہوگا۔انہوں نے ایرانی پارلیمان میں صدر پزشکیان کے خطاب کے دوران ’’تشکر پاکستان‘‘ کے نعروں کو دونوں ممالک کے درمیان دیرینہ اور گہری دوستی کا مظہر قرار دیا اور ایران کے سپریم لیڈر آیت اللہ علی خامنہ ای کی جانب سے مسئلہ جموں و کشمیر پر مسلسل اور اصولی حمایت پر خراجِ تحسین پیش کیا۔

ملاقات میں دو طرفہ تعلقات کو مزید فروغ دینے، پارلیمانی تعاون کے فروغ اور تجارت، معیشت ،ثقافت ودیگر شعبوں کے فروغ پر تفصیلی تبادلہ خیال کیا گیا۔ چیئرمین سینیٹ نے پارلیمانی سطح پر روابط کو مزید مستحکم کرنے کے عزم کا اعادہ کرتے ہوئے کہا کہ پاکستان-ایران پارلیمانی فرینڈشپ گروپ قانون سازی میں تعاون، مسلسل رابطوں اور عوامی سطح پر روابط کے فروغ میں کلیدی کردار ادا کر رہا ہے۔

انہوں نے تعلیمی و ثقافتی روابط کو وسعت دینے کی ضرورت پر بھی زور دیا تاکہ دونوں ممالک کے عوام کے درمیان باہمی تفہیم اور خیرسگالی کو مزید فروغ دیا جا سکے۔ انہوں نے ایرانی حکومت کی جانب سے پاکستانی زائرین کے ساتھ حسن سلوک اور مہمان نوازی پر بھی شکریہ ادا کیا۔ملاقات کے اختتام پر چیئرمین سینیٹ نے یقین دلایا کہ ایران ہر مشکل گھڑی میں پاکستان کی غیر متزلزل حمایت پر بھروسہ کر سکتا ہے۔

اس اہم ملاقات میں اسپیکر قومی اسمبلی سردار ایاز صادق، سینیٹر سلیم مانڈوی والا، سینیٹر عرفان صدیقی اور رکن قومی اسمبلی نوید قمر بھی شریک تھے۔ایرانی صدر ڈاکٹر مسعود پزشکیان نے چیئرمین سینیٹ کے خیالات سے اتفاق کرتے ہوئے اس بات پر زور دیا کہ پاکستان اور ایران کے تعلقات تاریخی بنیادوں پر استوار ہیں جو باہمی اعتماد، ثقافتی قربت اور مشترکہ مذہبی و تہذیبی ورثے پر مبنی ہیں۔

انہوں نے علاقائی امن، استحکام اور خوشحالی کے فروغ کے لیے مشترکہ کوششوں کی ضرورت پر زور دیا اور کہا کہ ایران پاکستان کے ساتھ تجارت، معیشت اور سرمایہ کاری سمیت دیگر شعبوں میں تعاون کو مزید وسعت دینے کا خواہاں ہے تاکہ دونوں ممالک کے عوام کو فائدہ ہو۔صدر پزشکیان نے ایران-اسرائیل حالیہ تنازعے کے دوران پاکستانی حکومت، پارلیمان اور عوام کی حمایت پر دلی شکریہ ادا کیا اور کہا کہ پاکستان کی پارلیمانی قرارداد اور عوامی یکجہتی قابلِ تحسین ہے اور حقیقی دوستی کا مظہر ہے۔

انہوں نے دونوں ممالک کے درمیان پارلیمانی تعلقات کو مزید مضبوط کرنے کی ضرورت پر زور دیتے ہوئے تعلیمی، ثقافتی اور عوامی سطح پر تبادلوں کے فروغ کی حمایت کی۔صدر ایران نے عالمی امن، باہمی احترام اور پرامن بقائے باہمی کے لیے ایران کے عزم کا اعادہ کیا اور کہا کہ پاکستان اور ایران دنیا کو یہ پیغام دینا چاہتے ہیں کہ پائیدار امن کا اصل راستہ مکالمہ، تعاون اور بھائی چارے میں مضمر ہے۔