وزیراعظم کا گلگت میں سیلاب کے بعد بحالی کیلئے 4 ارب روپے امداد کا اعلان

گلگت ( اُردو پوائنٹ اخبارتازہ ترین۔ 04 اگست 2025ء ) وزیراعظم شہباز شریف نے گلگت بلتستان میں سیلاب سے متاثرہ علاقوں کی بحالی کے لیے 4 ارب روپے کی فوری امداد کا اعلان کر دیا۔ تفصیلات کے مطابق وزیراعظم پاکستان شہباز شریف نے گلگت بلتستان کا ایک روزہ دورہ کیا جہاں انہوں نے حالیہ سیلاب سے جاں بحق اور زخمی افراد کے لواحقین میں مالی امدادی چیکس تقسیم کیے۔

ترجمان صوبائی حکومت فیض اللہ فراق نے بتایا کہ وزیراعظم کو دورے کے دوران گلگت بلتستان میں سیلاب کی تباہ کاریوں پر تفصیلی بریفنگ دی گئی، وزیراعظم کے دورے کے دوران جاں بحق افراد کے لواحقین کو 10 لاکھ روپے اور زخمیوں کو 5 لاکھ روپے کے چیکس فراہم کیے گئے۔ بتایا گیا ہے کہ دورے کے دوران وزیراعظم سے گورنر گلگت بلتستان اور وزیراعلیٰ نے بھی ملاقاتیں کیں، شہباز شریف نے سوست ڈرائی پورٹ پر تاجروں کے احتجاج کا نوٹس لیتے ہوئے مقامی تاجروں کو ہر ممکن سہولت دینے اور سمگلنگ کے خلاف سخت اقدامات کی ہدایات جاری کیں، وزیراعظم نے اربوں روپے کی لاگت سے نصب ارلی وارننگ سسٹم میں مبینہ بے قاعدگیوں کی تحقیقات کے لیے مصداق ملک اور متعلقہ وفاقی سیکرٹری کو رپورٹ پیش کرنے کی ہدایت کی ہے، اس کے علاوہ وزیراعظم نے سیلاب سے متاثرہ علاقوں کی بحالی کیلئے 4 ارب روپے جاری کرنے و دیگر نقصانات کی مکمل تفصیلات سامنے لانے کے لیے متعلقہ وفاقی اداروں کو بھی ہدایات جاری کر دی ہیں۔

(جاری ہے)

معلوم ہوا ہے کہ اس موقع پر کابینہ کا اجلاس بھی ہوا اور وزیراعظم نے گلگت بلتستان کابینہ سے خطاب کرتے ہوئے 100 میگاواٹ کے سولر بجلی منصوبے کو جلد ایکنک سے منظور کرانے کی یقین دہانی کرائی اور گلگت بلتستان میں قائم ہونے والے دانش سکولوں کی سنگِ بنیاد کی تقریب میں دوبارہ شرکت کا عندیہ دیا، انہوں نے کہا کہ حالیہ بارشوں اور سیلاب کے باعث جانی و مالی نقصانات پر گہرا افسوس ہے، وفاقی ادارے گلگت بلتستان کی حکومت کے ساتھ مکمل رابطے میں ہیں، پاکستان ان چند ممالک میں شامل ہے جو موسمیاتی تبدیلیوں سے سب سے زیادہ متاثر ہو رہے ہیں حالا|ں کہ عالمی سطح پر کاربن گیسز کے اخراج میں پاکستان کا حصہ انتہائی کم ہے۔

شہباز شریف نے کہا کہ پاکستان کا شمار ماحولیاتی تبدیلیوں سے شدید متاثر ہونے والے پہلے 10 ملکوں میں ہوتا ہے، 2022ء میں بھی بارشوں اور سیلاب نے بڑی تباہی مچائی تھی اور اب ہر سال موسمیاتی تبدیلیوں کا اثر بڑھتا جا رہا ہے، گلگت بلتستان، آزاد کشمیر و دیگر صوبوں میں بھی ان تبدیلیوں کے باعث صورتحال بدل رہی ہے، ان چیلنجز سے نمٹنے کے لیے وزارتِ موسمیاتی تبدیلی کو ہدایات دی گئی ہیں، گلگت بلتستان میں دانش سکول کا جلد قیام عمل میں لایا جائے گا، سولر پارک کے منصوبے کی ذاتی طور پر نگرانی کر رہے ہیں اور یہ منصوبہ جلد مکمل کیا جائے گا۔