پاکستان تمام مذاہب کے ماننے والوں کا ملک ہے، وزیراعلی سندھ کا مذہبی اقلیتوں کے حقوق کے تحفظ کیلئے حکومت کے عزم کا اعادہ

کراچی (اُردو پوائنٹ اخبارتازہ ترین - اے پی پی۔ 11 اگست2025ء) وزیراعلیٰ سندھ سید مراد علی شاہ نے مذہبی اقلیتوں کے حقوق کے تحفظ کیلئے اپنی حکومت کے غیر متزلزل عزم کا اعادہ کرتے ہوئے کہا ہے کہ پاکستان تمام شہریوں کا برابر کا ملک ہے، چاہے ان کا تعلق کسی بھی مذہب سے ہو۔پیر کو وزیر اعلی ہائوس سے جاری اعلامیہ کے مطابق ان خیالات کا اظہار انہوں نے سوامی نارائن مندر میں منعقدہ ایک مشترکہ تقریب سے خطاب کرتے ہوئے کیا ،جو یومِ اقلیتیں منانے کے لیے مختلف اقلیتی برادریوں کے اشتراک سے منعقد کی گئی تھی۔

تقریب میں سبز ہلالی پرچم سے مشابہ سبز قمیض اور سفید شلوار میں ملبوس صوبائی اسمبلی کے رکن گیانچند اسرانی، مس تشنا پٹیل، ڈنشا بی آواری (پارسی)، صوبائی اسمبلی سندھ کے ڈپٹی اسپیکر انتھونی نوید (عیسائی)، وزیر اعلیٰ کے معاون خصوصی برائے اقلیتی امور ڈاکٹر لال چند اکرانی، معاون خصوصی راج ویر، سینیٹر پونجو بھیل، رکن قومی اسمبلی ڈاکٹر مہیش ملانی، شام سندر، روما مشتاق مٹو، مہیش کمار ہاسیجی، انیل کمار، سردار رام سنگھ، پروفیسر پرکاش لال (سکھ) سمیت دیگر شخصیات شریک تھیں۔

(جاری ہے)

سید مراد علی شاہ نے کہا کہ یومِ اقلیت منانے کی روایت صدر آصف علی زرداری نے اپنے پہلے دورِ صدارت میں 2009میں شروع کی تھی اور وہ اس کے بعد ہر سال ان تقریبات میں شرکت کرتے رہے ہیں۔ وزیر اعلیٰ سندھ نے کہا کہ 11اگست کی تاریخی اہمیت یہ ہے کہ 1947میں اسی روز بانی پاکستان قائداعظم محمد علی جناح نے صوبائی اسمبلی سندھ میں تاریخی خطاب کرتے ہوئے واضح کیا تھا کہ اقلیتوں کو اپنے مندروں اور گرجا گھروں میں جانے کی مکمل آزادی ہے اور ریاست کو کسی کے مذہب سے کوئی غرض نہیں۔

انہوں نے کہا کہ شہید ذوالفقار علی بھٹو نے 1973 کے آئین میں اقلیتوں کے تحفظ کی شقیں شامل کیں جبکہ شہید محترمہ بینظیر بھٹو ہمیشہ اقلیتی برادریوں کے ساتھ کھڑی رہیں۔انہوں نے کہا کہ پاکستان پیپلز پارٹی نے اقلیتوں کے حقوق کے تحفظ کے لیے کئی قوانین منظور کیے ہیں۔ انہوں نے کہا کہ ہمارا فلسفہ ہے کہ ہم سب ہندو، سکھ، عیسائی، پارسی محبت، دوستی اور ہم آہنگی کے ساتھ رہیں۔

انہوں نے کہا کہ سندھ میں یومِ آزادی کی 14روزہ تقریبات جاری ہیں۔اس موقع پر وزیر اعلی سندھ نے اعلان کیا کہ صوبائی حکومت عبادت گاہوں کے تحفظ کے لیے متعلقہ مذاہب کے افراد کو پولیس فورس میں بھرتی کر رہی ہے۔ انہوں نے عزم ظاہر کیا کہ پاکستان پیپلز پارٹی اور حکومتِ سندھ، قائداعظم محمد علی جناح، شہید ذوالفقار علی بھٹو اور شہید محترمہ بینظیر بھٹو کے وژن کے مطابق ہر شہری کی بلا امتیاز خدمت جاری رکھے گی۔

انہوں نے کہا کہ صدر آصف علی زرداری اور چیئرمین بلاول بھٹو زرداری کی رہنمائی میں ہم صوبے کی ترقی، امن اور اتحاد کے لیے کام جاری رکھیں گے۔ اس موقع پر ٹریفک حادثے میں دو نوجوانوں کی ہلاکت کے افسوسناک واقعے پر بات کرتے ہوئے مراد علی شاہ نے گہرے رنج و غم کا اظہار کیا اور لاپرواہ ڈرائیونگ کی مذمت کی۔ انہوں نے تصدیق کی کہ واقعے میں ملوث ڈرائیور کو فوری طور پر گرفتار کر لیا گیا تھا تاہم انہوں نے ردعمل میں سات ڈمپر ٹرکوں کو جلانے کے واقعے کو نامناسب عمل قرار دیتے ہوئے تنبیہ کی کہ اس میں ملوث شرپسندوں کے خلاف کارروائی کی جائے گی۔

وزیر اعلی نے ٹرانسپورٹرز کو ہدایت دی کہ تمام ڈمپر ٹرکوں میں کیمرے نصب کریں اور یہ یقینی بنائیں کہ ڈرائیورز کے پاس درست لائسنس ہوں بصورت دیگر 15 دن کے اندر تعمیل نہ کرنے پر ان کے خلاف کارروائی کی جائے گی۔انسداد منشیات مہم کے بارے میں بات کرتے ہوئے وزیر اعلی نے کہا کہ یہ مہم پورے صوبے میں بغیر کسی نرمی کے جاری ہے۔ انہوں نے کہا کہ گزشتہ دو سے تین ماہ کے دوران ہم نے بڑی تعداد میں ملزمان کی نشاندہی اور گرفتاری کی ہے۔ بعد ازاں سکھ برادری کے رہنمائوں کے ہمراہ انہوں نے گردوارہ کا بھی دورہ کیا۔