قصور، ڈپٹی کمشنر عمران علی اور ڈی پی اومحمدعیسیٰ خاں  کی زیرصدارت ڈسٹرکٹ کوآرڈینیشن کمیٹی کے جائزہ اجلاس کا انعقاد

قصور (اُردو پوائنٹ اخبارتازہ ترین - اے پی پی۔ 12 اگست2025ء) وزیر اعلیٰ پنجاب مریم نواز شریف، چیف سیکرٹری پنجاب اور کمشنر لاہور ڈویژن کی ہدایت پر ڈپٹی کمشنر عمران علی اور ڈی پی اومحمدعیسیٰ خاں  کی زیرصدارت ڈسٹرکٹ کوآرڈینیشن کمیٹی کا جائزہ اجلاس منعقد ہوا۔ اجلاس میں ایڈیشنل ڈپٹی کمشنر ریونیو، ایڈیشنل ڈپٹی کمشنر جنرل، اسسٹنٹ کمشنرز، سیکرٹری آر ٹی اے سمیت دیگر ضلعی افسران نے شرکت کی۔

اجلاس میں  ایڈیشنل ڈپٹی کمشنر جنرل سلمون ایوب نے مختلف ضلعی اداروں  ٹریفک پولیس، میونسپل کمیٹیز، کسٹمز، ایکسائز، واپڈا، انڈسٹریز ودیگر محکموں  کی ماہانہ کارکردگی سے متعلق تفصیلاً بریف کیا۔ ڈپٹی کمشنر نے تجاوزات اور فٹ پاتھوں  پر ریڑھیاں کھڑی ہونے پر شدید برہمی کا اظہار کرتے ہوئے کہاکہ وزیراعلیٰ پنجاب مریم نوازشریف کے وژن ستھرا پنجاب کے تحت تجاوزات کاخاتمہ ہرصورت یقینی بنایاجائے،ضلع بھر میں تجاوزات کے خلاف آپریشن میں مزید تیزی لائی جائے،تجاوزات کا خاتمہ وقت کی اہم ضرورت بن چکا ہے۔

(جاری ہے)

ڈپٹی کمشنر نے اسسٹنٹ کمشنرز اور پیرا فورس کو مشترکہ طورپر تجاوزات کے خاتمہ کو یقینی بنانے کی ہدایت کرتے ہوئے کہا کہ تجاوزات کا خاتمہ کرکے شہر کی خوبصورتی اور شہریوں  کو صاف ستھرا ماحول فراہم کرنا ضلعی انتظامیہ کی اولین ترجیح ہے،اندرون شہرمیں  موجود چوکوں  اور سڑکوں پر ٹریفک کی روانی کو مزید فعال بنایا جائے۔ انہوں نے اسسٹنٹ کمشنرز، میونسپل کمیٹیز اور سیکرٹری آر ٹی اے کو ٹریفک کے نظام کو بہتر بنانے کیلئے مل کر آپریشن کرنے کی ہدایت جاری کی۔

اجلاس میں  ڈپٹی کمشنر کو غیرقانونی پٹرول پمپس بارے بریفنگ میں بتایا گیا کہ ڈپٹی کمشنر کی ہدایت پر ضلع بھر میں  نہ صرف غیرقانونی پٹرول پمپس بلکہ ایل پی جی ری فلنگ کے کاروبار میں  ملوث افراد کے خلاف بلاتفریق آپریشن جاری ہے۔ ڈپٹی کمشنر نے اس موقع پر ہدایات جاری کرتے ہوئے کہاکہ ایل پی جی اور غیرقانونی پٹرول پمپس کی منی مشینوں کو تلف کیاجائے، تمام اسسٹنٹ کمشنرز اپنی اپنی تحصیلوں میں اربن ایریاز میں ری فلنگ میں ملوث افراد کے خلاف سخت قانونی کاروائی کریں۔

نان کسٹم گاڑیوں  کی چیکنگ سے متعلق ڈپٹی کمشنر نے عدم اعتماد کا اظہار کرتے ہوئے کسٹم کے ضلعی افسران کو روزانہ کی بنیاد پر گاڑیوں  کی چیکنگ کرنے کی ہدایت کی۔ انہو ں نے کہاکہ سمگلنگ کی روک تھام کو ہر صورت یقینی بنایاجا ئے۔ مدارس کی رجسٹریشن کے حوالے سے تفصیلی بریفنگ دی گئی اور نان رجسٹرڈ مدارس کو جلد از جلد رجسٹر کروانے کی بھی ہدایت جاری کی۔

اجلاس سے خطاب کرتے ہوئے ڈی سی عمران علی نے بتایا کہ ہمارے ازلی حریف بھارت کے دریائے ستلج میں  پانی چھوڑنے کے بعد اس وقت قصور میں  نچلے درجے کی سیلابی صورت حال کا سامنا ہے،جس کے لیے ضلعی انتظامیہ اور دیگر متعلقہ اداروں  کی طرف سے تلوار پوسٹ، منڈی عثمانوالہ میں  کیمپس قائم کردیے گئے ہیں،ان علاقوں  میں  وارننگ سسٹم کے تحت اعلانات بھی کروادیے گئے ہیں تاکہ عوام سیلابی صورت میں محفوظ مقامات پر منتقل ہوسکیں۔

اجلاس کے آخر میں ڈپٹی کمشنر نے بتایا کہ وزیراعلیٰ پنجاب مریم نوازشریف کی ہدایت پر اس سال جشنِ آزادی کی تقریبات ’معرکہ حق‘ میں پاکستان کی فتح کے جذبے سے منائی جا رہی ہیں،جشن آزادی کی تقریبات کا عنوان ’’حصولِ آزادی سے تحفظِ آزادی تک ‘‘رکھا گیا ہے،اس سال جشن آزادی میں نوجوانوں اور بچوں کی خاص طور پر شرکت سے تقاریب ہوں گی، معرکہ حق، بنیان مرصوص اور قومی فخر کی اہمیت اجاگر کیا جائے گا،جس کی تیاریوں  میں  ہر محکمہ بڑھ چڑھ کر حصہ لے گا۔

اس سلسلہ میں ضلعی انتظامیہ کے زیر اہتمام 13اگست کی رات فائر شو کا بھرپور مظاہرہ کیاجائے گا۔ ڈپٹی کمشنر عمران علی نے مزید کہاکہ 13اور 14اگست کو تمام سرکاری عمارتوں، اہم شاہراہوں، بازاروں سمیت دیگر اہم مقامات پر لائٹنگ کی جائیگی،ضلع بھر میں شجرکاری مہم کے تحت پودے بھی لگائے جائینگے۔ ضلع میں پرچم کشائی کی مرکزی تقریب ڈی پی ایس میں منعقد ہوگی۔تحصیل لیول پر تمام اسسٹنٹ کمشنرز جبکہ تمام محکمہ جات کے ضلعی افسران اپنے دفاتر میں پرچم کشائی کرینگے۔ ڈی سی عمران علی نے مائوں، بہنوں، بیٹیوں، بیٹوں، بھائیوں اور بزرگوں سے اپیل کی ہے کہ یوم آزادی کی تقریبات میں بھرپور حصہ لیں اور دکھا دیں کہ ہم زندہ اور باوقار قوم ہیں۔