حکومت اپنی آئینی مدت پوری کرے گی، معرکہ حق میں پاکستان کو عالمی سطح پر بے پناہ عزت ملی ہے، ڈپٹی وزیر اعظم و وزیر خارجہ اسحاق ڈار

لاہور (اُردو پوائنٹ اخبارتازہ ترین - اے پی پی۔ 13 اگست2025ء) ڈپٹی وزیر اعظم و وزیر خارجہ محمد اسحاق ڈار نے کہا ہے کہ حکومت اپنی آئینی مدت پوری کرے گی،معرکہ حق میں پاکستان کو بے پناہ عزت ملی ہے،وزیراعظم کی ٹیم معاشی اور سفارتی محاذ پر کامیابیاں حاصل کر رہی ہے۔ ان خیالات کا اظہار انہوں نے بدھ کے روز یہاں داتا گنج بخش علی ہجویری ؒکے عرس کی تقریبات کے افتتاح کے بعد میڈیا سے گفتگو کرتے ہوئے کیا ۔

اس موقع پر وفاقی وزیر مواصلات عبدالعلیم خان،صوبائی وزیر ہائوسنگ بلال یسین سمیت دیگر بھی موجود تھے۔ڈپٹی وزیر اعظم محمد اسحاق ڈار نے کہا کہ میں صدر مملکت آصف علی زرداری،وزیراعظم محمد شہباز شریف،مسلم لیگ (ن) کے قائد محمد نواز شریف،وزیر اعلی مریم نواز اور دیگر کی جانب سے دل کی گہرائیوں سے982 ویں عرس کی مبارکباد پیش کرتا ہوں۔

(جاری ہے)

محمد اسحاق ڈار نے کہا کہ زائرین اپنی دعائوں کے ساتھ ساتھ پاکستان کی ترقی و خوشحالی کے لئے بھی دعا کریں،پاکستان دوبارہ ترقی کی جانب گامزن ہے،معیشت اور سفارتی تعلقات میں بہتری آ رہی ہے،یہ سلسلہ تب تک جاری رہے گا جب تک پاکستان اسلام کا مضبوط قلعہ نہیں بن جاتا،اگر چہ یہ طویل سفر ہے لیکن اس کا آغاز ہو گیا ہے۔

انہوں نے کہا کہ جشن آزادی اور عرس مبارک ساتھ ساتھ آئے ہیں،جشن آزادی بھی آپ سب کو بہت بہت مبارک ہو ۔ڈپٹی وزیر اعظم نے کہا کہ اللہ کے فضل و کرم سے پاکستان کو بے شمار کامیابیاں حاصل ہوئیں ہیں،جن میں اصل کامیابی معرکہ حق ہے،جس میں افواج پاکستان نے ازلی دشمن بھارت کو بد ترین شکست سے دوچار کیا،جس سے پاکستان کو عالمی سچح پر بے پناہ عزت ملی ہے۔

محمد اسحاق ڈار نے کہا کہ معاشی ترقی کی طرف وزیراعظم محمد شہباز شریف کی بھر پور توجہ ہے،ان کی ٹیم معاشی اور سفارتی محاذ پر کامیابیاں حاصل کر رہی ہے،ڈس انفارمیشن سے پرہیز کرنا چاہیے،جب تک کوئی بات ثابت نہ ہو آگے نہیں پھیلانا چاہیے۔انہوں نے کہا کہ حکومت اپنی آئینی مدت پوری کرے گی،افواہوں پر یقین نہ کریں،سیاسی استحکام کیلئے کوششیں کر رہے ہیں۔

انہوں نے کہا کہ جب کوئی ملک اور اداروں کے خلاف ہتھیار اٹھا لے تو وہ بغاوت ہوتی ہے،عدالتی فیصلوں کا احترام کرنا پڑے گا۔اسحاق ڈار نے کہا کہ ہماری حکومت نے پی ٹی آئی پر مقدمات بنائے تھے نہ سہولت کاری کی تھی۔انہوں نے کہا کہ جب تک تمام ادارے اور سیاسی جماعتیں ملکر کام نہیں کریں گے ملک آگے نہیں بڑھ سکتا۔انہوں نے کہا کہ جہاں تک دہشتگردی کا معاملہ ہے،وزارت خارجہ میں دو درجن لوگوں نے مذاکرات کئے ہیں،ہم نے مجید برگیڈ کے حوالے سے ثبوت فراہم کئے کہ یہ بی ایل اے کا حصہ ہے،ہم نے اتنے ثبوت دیئے کہ امریکہ نے مجبور ہو کر اس کو دہشت گردی کی لسٹ میں شامل کیا ہے۔

محمد اسحاق ڈار نے ایک سوال کے جواب میں کہا کہ پاکستان کی حکومت نے فلسطین کے حوالے سے بھرپور حمایت کی ہے،اسلامی تنظیم کا اجلاس بہت جلد جدہ میں منعقد ہوگا۔ایک اور سوال کے جواب میں انہوں نے کہا کہ پاکستان نے ہر فورم پر واضح کیا ہے کہ اگر ہمارا پانی روکا گیا تو اس کو جنگ تصور کریں گے،انٹرنیشنل قوانین کے تحت دونوں فریقوں کی مرضی سے کوئی معاہدہ ختم ہو سکتا،ہم ایک پانی کے قطرے کی کمی برداشت نہیں کر سکتے۔