حیدرآباد میں اسٹیوٹا کے انسٹیٹیوٹ میں معرکہ حق جشن آزادی کی تقریب

کراچی(اُردو پوائنٹ اخبارتازہ ترین - این این آئی۔ 13 اگست2025ء)سندھ ٹیکنیکل ایجوکیشن اینڈ ووکیشنل ٹریننگ اتھارٹی (اسٹیوٹا)کی جانب سے اپنے مختلف اداروں میں معرکہ حق جشن آزادی کا تقاریب کا سلسلہ جاری ہے، آج اسٹیوٹا کے ادارے گورنمنٹ پولی ٹیکنک انسٹیٹیوٹ (گرلز)لطیف آباد، حیدرآباد میں جشن آزادی کی پروقار تقریب کا انعقاد کیا گیا، جس میں وزیر اعلء سندھ کے معاون خصوصی و چیئرپرسن اسٹیوٹا جنید بلند نے بطور مہمان خصوصی شرکت کی۔

چیئرپرسن سندھ ٹیکنیکل ایجوکیشن اینڈ ووکیشنل ٹریننگ اتھارٹی (اسٹیوٹا) جنید بلند نے کہا ہے کہ پاکستان کی بیٹیاں اور نوجوان ہمارا قیمتی اثاثہ ہیں، صوبے کے 80 فیصد نوجوانوں کو مہارتیں دے کر انہیں مالی طور پر مستحکم بنانا ہمارا ہدف ہے۔ وہ 78ویں یومِ آزادی کی تقریب سے خطاب کر رہے تھے۔

(جاری ہے)

انہوں نے کہا کہ یہ آزادی ہمارے بزرگوں کی قربانیوں کا نتیجہ ہے، جسے برقرار رکھنے کے لیے ہمیں اتحاد، محنت اور قربانی کی روایت کو زندہ رکھنا ہوگا۔

انہوں نے ملک کی سرحدوں پر پہرہ دینے والے جوانوں کو خراجِ تحسین پیش کرتے ہوئے کہا کہ ان کی قربانیاں ہی ہماری پرسکون زندگی کی ضامن ہیں۔جنید بلند نے کہا کہ انہیں غریبوں سے محبت اور محنت کشوں کی عزت کا درس قائد ذوالفقار علی بھٹو، محترمہ بینظیر بھٹو شہید اور چیئرمین بلاول بھٹو زرداری سے ملا ہے۔ انہوں نے مزید کہا کہ سیکھنے کا عمل کبھی رکنا نہیں چاہیے اور اسی سوچ کے تحت اسٹیوٹا صوبے بھر میں ہنر مندی کے ساتھ ساتھ سافٹ اسکلز کی تربیت پر بھی زور دے رہا ہے۔

چیئرپرسن اسٹیوٹا کا کہنا تھا کہ ہماری کوشش ہے کہ باصلاحیت طلبہ سامنے آئیں، بااختیار ہوں اور اسٹیوٹا کو مزید مضبوط بنائیں۔ ان شااللہ ہم ادارے کو کامیابی کی راہ پر گامزن کریں گے۔تقریب میں جنید بلند نے نئی کمپیوٹر لیب کا افتتاح کیا، اس موقع پر ڈسپلے سینٹر، بیوٹییشن اور گارمنٹس سیکشن کا بھی دورہ کیا گیا۔سندھ بھر کے مختلف پولی ٹیکنک اور ٹیکنیکل انسٹیٹیوٹس میں پہلی بار 200 جدید کمپیوٹرز فراہم کیے گئے ہیں۔

بینظیر بھٹو شہید ہیومن ریسورس ریسرچ اینڈ ڈیولپمنٹ بورڈ اور نیووٹیک کے اشتراک سے 6 ماہ کے شارٹ کورسز جاری ہیں، جن میں فی کورس 30 طالبات باقاعدگی سے تربیت حاصل کر رہی ہیں۔چیئرپرسن اسٹیوٹا نے معیاری یونیفارم مارکیٹ ریٹ سے کم قیمت میں تیار کرنے اور فنی تربیت کے لیے ہنرمند انسٹرکٹرز کی تقرری پر زور دیا۔ انہوں نے ادارے میں سولر سسٹم کی تنصیب اور نئے فرنیچر کی فراہمی کے لیے بھی ہدایات جاری کیں۔

میڈیا سے گفتگو میں جنید بلند نے کہا کہ محدود وسائل کے باوجود صوبے کے تمام ٹیکنیکل مراکز میں بہترین سہولیات فراہم کر رہے ہیں۔ بچیوں کو ہنر مند اور بااختیار بنانا ہمارا مشن ہے۔ چیئرپرسن نے پورے تکنیکی کالج کا دورہ کیا، مختلف شعبوں کی اساتذہ و طالبات سے ملاقات کی، ان کا فیڈ بیک حاصل کیا اور انتظامیہ کو ہدایت دی کہ داخل شدہ طالبات کے لیے مزید بہتر سہولیات فراہم کی جائیں تاکہ وہ عمدہ کارکردگی کا مظاہرہ کر سکیں۔