آج کا یوم آزادی منفرد، مسلح افواج نے معرکہ حق کے دوران جرات،بہادری اور استقامت کی داستان رقم کی،وزیر اعظم آزاد کشمیر چوہدری انوار الحق

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) آزادجموں و کشمیر کے وزیراعظم چوہدری انوارالحق نے قوم کو جشن آزادی کی مبارکباد دیتے ہوئے کہا ہے کہ آج پوری پاکستانی و کشمیری قوم 79 واں یوم آزادی ملی جوش و جذبے کے ساتھ منا رہی ہے،آج کا یوم آزادی اس لحاظ سے منفرد ہے کہ ہماری مسلح افواج نے معرکہ حق کے دوران اپنی پیشہ ورانہ صلاحیتوں کا بھرپور مظاہرہ کرتے ہوے جرات،بہادری اور استقامت کی داستان رقم کی،پاک فوج نے بھارت کو عبرتناک شکست فاش سے دوچار کیا۔

جاری بیان میں وزیراعظم آزادکشمیر نے کہا کہ آج کے دن بابائے قوم قائد اعظم محمد علی جناح کی مدبرانہ اور بے لوث قیادت میں دنیا کی سب سے بڑی نظریاتی اسلامی مملکت خداداد پاکستان معرض وجود میں آئی،آج ہمارا یوم آزادی اس لحاظ سے منفرد ہے کہ مسلح افواج نے معرکہ حق کے دوران اپنی پیشہ ورانہ صلاحیتوں کا بھرپور مظاہرہ کرتے ہوے جرآت،بہادری اور استقامت کی داستان رقم کی،پاک فوج نے بھارت کو عبرتناک شکست فاش سے دوچار کیا، پاکستان کا قیام برصغیر جنوبی ایشیاء کے مسلمانوں کی اجتماعی قومی امنگوں اور آرزؤں کا مظہر ہے۔

(جاری ہے)

چوہدری انوارالحق نے کہا کہ 14اگست1947 ایک تاریخ ساز دن تھا جب علامہ اقبال کے خواب کی تعبیر ہوئی،یوم آزادی ہمارے اسلاف کی اس جدوجہد کو خراج عقیدت پیش کرنے کا دن ہے جب انہوں نے اپنے جان و مال اس وطن کی آزادی پر نثار کئے۔چوہدری انوارالحق نے کہا کہ پاکستان کا قیام دو قومی نظریے کا مرہون منت ہے،اس نظریے کی بنیاد پر جب پہلی بار مفکر اسلام حضرت علامہ اقبال نے برصغیر کو تقسیم کر کے مسلمانوں کےلئے علیٰحدہ مملکت کے قیام کا تصور پیش کیا۔

چوہدری انوارالحق نے کہا کہ علامہ اقبال نے مسلمانوں کے قومی تشخص اور اسلام کی تہذیبی اور ثقافتی اقدار اور روایا ت پر بھی خصوصی توجہ دلائی، قائد اعظم نے اس نظریہ کی بنیاد پر مسلم لیگ کو منظم کر کے برصغیر کے مسلمانوں کو ایک پرچم تلے متحد کیا۔چوہدری انوارالحق نے کہا کہ حضرت قائد اعظم کو اپنے مقصد کی صداقت اور مسلمان عوام کی اجتماعی فہم و فراست پر غیر متزلزل یقین و اعتماد تھا،حضرت قائداعظم نے قرارداد پاکستان کی منظوری کے بعد صرف سات سال کے دوران تحریک پاکستان کو کامیابی سے ہمکنار کر دیا۔

انہوں نے کہا کہ بھارت مقبوضہ کشمیر کے عوام کو جبر کے زور پر دبانا چاہتا ہے مگر یہ دن ہمارے کشمیری بہن بھائیوں کے عزم و حوصلے کو جلا بخشتا ہے، یہ دن کشمیریوں کو امید دیتا ہے کہ جدوجہد آزادی میں ان کی جانب سے دی گئیں قربانیاں رائیگاں نہیں جائیں گی۔چوہدری انوارالحق نےکہا کہ حکومت پاکستان، پاکستانی عوام اور پاک فوج جس عزم کے ساتھ کشمیریوں کی سیاسی،اخلاقی اور سفارتی حمایت جاری رکھے ہوئے ہیں،ان شاءاللہ وہ دن دور نہیں جب مقبوضہ کشمیر بھارتی غیر قانونی قبضے سے آزاد ہو گا اور پوری ریاست جموں وکشمیر کا الحاق پاکستان کے ساتھ ہوگا۔