Live Updates

سندھ حکومت سیلاب سے متاثرہ اپنے بھائیوں اور بہنوں کے ساتھ کھڑی ہے ،شرجیل انعام میمن

پیر 18 اگست 2025 23:10

کراچی (اُردو پوائنٹ اخبارتازہ ترین - اے پی پی۔ 18 اگست2025ء) سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ حکومت سندھ کی ہمدردیاں اور نیک خواہشات خیبرپختونخوا، گلگت بلتستان اور آزاد کشمیر کے عوام کے ساتھ ہیں ۔پیر کو جاری اعلامیہ کے مطابق انہوں نے کہا کہ سندھ حکومت مصیبت کی اس گھڑی میں اپنے بھائیوں اور بہنوں کے ساتھ کھڑی ہے اور ہر ممکن تعاون فراہم کرے گی۔

انہوں نے خیبرپختونخوا، گلگت بلتستان اور آزاد کشمیر میں بارشوں اور سیلابی صورتحال سے انسانی جانوں کے ضیاع پر افسوس کا اظہار کرتے ہوئے کہا کہ پاکستان پیپلز پارٹی کے چیئرمین بلاول بھٹو اور صدرمملکت آصف علی زرداری کی واضح ہدایت ہے کہ کوئی بھی خاندان امداد سے محروم نہ رہے۔

(جاری ہے)

انہوں نے کہاکہ پارٹی قیادت کی ہدایت پر کارکنان اور رہنما متاثرہ علاقوں میں امدادی سرگرمیوں میں بھرپور حصہ لے رہے ہیں تاکہ متاثرین کو فوری ریلیف فراہم کیا جا سکے۔

سندھ کے سینئر وزیر شرجیل انعام میمن نے کہا کہ سیلاب متاثرہ علاقوں میں ہزاروں خاندان شدید متاثر ہوئے ہیں، گھروں اور سڑکوں کو نقصان پہنچا ہے اور متاثرین کو فوری امداد کی اشد ضرورت ہے۔انہوں کہاکہ وفاقی اور صوبائی حکومتوں کے ساتھ ساتھ فلاحی تنظیمیں عوام کی مدد کے لئے آگے آئیں اور خاص طور پر خوراک، ادویات، صاف پانی اور رہائش کی فراہمی کو یقینی بنایا جائے۔انہوں نے مزیدکہا کہ موسمیاتی تبدیلیوں کے باعث پاکستان کو بار بار قدرتی آفات کا سامنا کرنا پڑ رہا ہے، اس لئے تمام اکائیوں کو مل کر ایک مشترکہ حکمتِ عملی مرتب کرنے کی ضرورت ہے تاکہ مستقبل میں عوام کی جان و مال کو محفوظ بنایا جا سکے۔