توانائی ،مہنگائی بحران حل کئے بغیرپاکستان کو ترقی یافتہ مملکت بنانے کا خواب شرمندہ تعبیر نہیں ہوسکتا

رحیم یارخان(اُردو پوائنٹ اخبارتازہ ترین - آن لائن۔ 21 اگست2025ء) پاکستان میں توانائی بحران، مہنگائی، بیروزگاری، سیاسی عدم استحکام اور اتحاد ویکجہتی کا فقدان اہم مسائل ہیں۔ انہیں حل کیے بغیر پاکستان کو ترقی یافتہ مملکت بنانے کا خواب شرمندہ تعبیر نہیں ہوسکتا۔ ان خیالات کا اظہار عوامی، سماجی اور کاروبای شخصیات نے میڈیا سے گفتگو کرتے ہوئے کیا۔

ایگری فورم پاکستان (رجسٹرڈ) کے مرکزی صدر چودھری احمد علی اختر نے کہا کہ پاکستان کا سب سے بڑا مسئلہ توانائی بحران ہے جس کی وجہ سے صنعتی پہیہ جام ہوکر رہ گیا ہے۔ لوڈشیڈنگ کے حل کیلئے حکومتی اور انفرادی سطح پر کام کرنا ہوگا۔ ہمیں کالاباغ ڈیم سمیت دیگر ڈیم بنانے کا کام تیز کرنا چاہیے۔ سولر اور دیگر ذرائع استعمال میں لائے جائیں۔

(جاری ہے)

بجلی چوری کے خلاف مقدمات درج کیے جائیں۔

کنڈا سسٹم ختم کیا جائے۔ رحیم یارخان چیمبرآف کامرس اینڈ انڈسٹری کے صدرچودھری ولید احمد اور سینئر نائب صدر چودھری شہیر اقبال نے کہا کہ پاکستان کا سب سے بڑا مسئلہ کرپشن ہے۔ سرکاری اور نجی اداروں میں کرپشن عروج پر ہے۔ پیسے دے کر ڈگریاں اور نوکریاں مل جاتی ہیں۔ پولیس مجرمان کو چھوڑ دیتی ہے۔ شہروں اور دیہاتوں میں قبضہ مافیا کا راج ہے۔

کرپشن سے نجات کا واحد حل عدلیہ کے پاس ہے۔ اگر عدلیہ کرپٹ عناصر کو سزائیں دے کر کیفر کردار تک پہنچائے تو کرپشن کی لعنت سے نجات مل سکتی ہے۔ ممتاز صنعتکار چودھری عثمان محمود اور زرعی ماہر میاں خرم منیر نے کہا کہ پاکستان کا سب سے بڑا مسئلہ اتحاد ویکجہتی کا فقدان ہے۔ آج ہر کوئی اپنی ذات میں مگن ہے۔ حکمرانوں کو صرف اپنی کرسی بچانے کی فکر ہے۔

عوام کے مسائل حل کرنے سے کوئی سروکار نہیں۔ اگر حکومت اور عوام کے مابین یگانگت ہو تو ہمارے تمام شعبے درست ہوسکتے ہیں۔ جب تک حکومت اور عوام مل کر انفراسٹرکچر کو تبدیل کرنے کی سعی، تعلیم اور معیشت کے استحکام کیلیے خدمت خلق کا جذبہ پیدا نہیں کرتے ہمارے مسائل جوں کے توں رہیں گے۔ آل پاکستان کلرکس ایسو سی ایشن کے مرکزی صدر چودھری محمد بوٹا عابد نے کہا کہ غربت وافلاس اور مہنگائی بھی اہم مسئلہ ہے جس نے سب کو پریشان کررکھا ہے۔

دن بدن غربت میں اضافہ ہورہا ہے قوت خرید ختم ہوکر رہ گئی ہے۔ ماں جیسی عظیم ہستی اپنے بچوں کو فروخت کرنے پر مجبور ہے۔ حکومت کو چاہیے کہ ذخیرہ اندوزوں کے خلاف سخت کارروائی کرے۔ روزمرہ استعمال کی اشیاء کی ارزاں نرخوں پر فراہمی یقینی بنائی جائے۔پروفیسر محمد افضل بیگ نے کہا کہ پاکستان کا سب سے اہم مسئلہ تعلیم کی کمی ہے جو ہر انسان کا پیدائشی حق ہے۔

دنیا کی ہر قوم نے تعلیم کی بنیاد پر ہی ترقی کی ہے۔ اگر پاکستان ترقی یافتہ ممالک کی صف میں شامل ہونا چاہتا ہے تو ہمیں نظام تعلیم درست کرکے سرکاری تعلیمی اداروں کے معیار کو بہتر بنانا ہوگا۔ سرکاری اور پرائیویٹ اداروں میں یکساں نصاب پڑھایا جائے۔ شرح خواندگی100 فیصد کرنے کے لیے مفت تعلیم کو فروغ دیا جائے۔ جاگ ویلفیئر موومنٹ کے ڈائریکٹر عبدالرب فاروقی نے کہا کہ پاکستان میں سیاسی عدم استحکام سب سے بڑا مسئلہ ہے۔

منتخب حکومتیں روزگار، بجلی، گیس، پانی کی قلت اور بدامنی و دہشت گردی کے حالات کی طرف کوئی توجہ نہیں دیتیں۔ سیاستدان عوام کو ان کے حقوق فراہم کرنے میں ناکام ہیں۔ سیاستدانوں کی ذمہ داری ہے کہ وہ پرامن اور محفوظ معاشرے کے قیام کیلیے اقدامات کریں۔ جہاں علم و تحقیق کے چراغ جلیں۔