افواجِ پاکستان نے معرکۂ حق میں نئی تاریخ رقم کی، قوم ان کی قربانیوں کی شکر گزار ہے،وفاقی وزیر دفاع خواجہ محمد آصف کا یومِ دفاع کی تقریب سے خطاب

سیالکوٹ (اُردو پوائنٹ اخبارتازہ ترین - اے پی پی۔ 06 ستمبر2025ء) وفاقی وزیر دفاع خواجہ محمد آصف نے کہا ہے کہ 6 ستمبر کا دن پاکستان کی تاریخ میں ایک منفرد مقام رکھتا ہے کیونکہ اس روز افواجِ پاکستان نے اپنی بہادری اور صلاحیتوں کا لوہا منوایا۔ ان خیالات کا اظہار انہوں نے یومِ دفاع کے موقع پر سیالکوٹ قلعہ پرہلال استقلال کی تبدیلی کی تقریب سے خطاب کرتے ہوئے کیا۔

انہوں نے کہا کہ 6 ستمبر 2025 ایک منفرد یومِ دفاع ہے کیونکہ 1965 کی جنگ کے بعد پاکستان کو اللہ تعالیٰ نے ایک عظیم فتح سے نوازا اور افواجِ پاکستان نے ایک بار پھر دنیا بھر میں اپنی صلاحیتوں کو تسلیم کروایا۔ ان کا کہنا تھا کہ اس معرکۂ حق کے بعد تین ماہ کے دوران پاکستان کی عزت و توقیر میں نمایاں اضافہ ہوا ہے، جس سے آج کا دن قومی جذبے کو دوبالا کرنے والا دن ثابت ہوا ہے۔

(جاری ہے)

وفاقی وزیر دفاع نے کہا کہ پوری قوم افواجِ پاکستان کی قربانیوں پر فخر کرتی ہے اور ان کی شکر گزار ہے کہ انہوں نے دفاعِ وطن کے لیے نئی تاریخ رقم کی ہے۔ انہوں نے کہا کہ بہادری اور وطن سے محبت کے جذبے سے سرشار ہو کر افواجِ پاکستان نے فضاؤں، زمین اور پانیوں کا دفاع کیا اور پوری دنیا ان کی شجاعت پر دنگ رہ گئی۔خواجہ محمد آصف نے کہا کہ موجودہ قیادت ہر محاذ پر چاہے وہ سفارتکاری، ترقی، تعمیرِ نو یا اتحاد ہواپنا مؤثر کردار ادا کر رہی ہے۔

انہوں نے کہا کہ دفاعِ پاکستان صرف سرحدوں تک محدود نہیں بلکہ معیشت اور ہر شعبے میں درکار ہے، اور اس وقت افواجِ پاکستان ایک منتخب حکومت کے ساتھ قدم سے قدم ملا کر ملک کی قیادت کر رہی ہیں۔انہوں نے کہا کہ شنگھائی تعاون تنظیم کی کانفرنس میں جس طرح وزیراعظم پاکستان محمد شہباز شریف اور فیلڈ مارشل سید عاصم منیر کی پزیرائی ہوئی ہے شائد ہی آج سے پہلے پاکستان کی ہوئی ہو۔

انہوں نے کہا کہ فیلڈ مارشل سید عاصم منیر کے حالیہ دورۂ امریکہ نے بھی پاکستان کی عزت و وقار کو عالمی سطح پر بلند کیا، جہاں افواجِ پاکستان کی مہارت اور بہادری کو تسلیم کیا گیا۔ ان کا کہنا تھا کہ یہ دورہ پاکستان کی تاریخ کا ایک منفرد باب ہے۔ انہوں نے یاد دلایا کہ جس طرح 1965 کی جنگ کو پرانی نسلیں یاد کرتی ہیں، اسی طرح وہ خود بھی اس وقت 16 برس کے تھے اور اس جنگ کے گواہ ہیں۔

ان کا کہنا تھا کہ مجھے فخر ہے کہ میں نے اپنی زندگی میں دو 6 ستمبر دیکھے ہیں، ایک 60 سال قبل کی فتح کے بعد اور ایک حالیہ عظیم کامیابی کے بعد اب دیکھا ہے جس کامیں عینی شاہد ہوں۔وفاقی وزیر دفاع نے مزید کہا کہ ہمیں اپنے شہداء، ان کے اہلِ خانہ، والدین، بیواؤں اور بچوں کے احسانِ عظیم کو کبھی نہیں بھولنا چاہیے، کیونکہ انہی کی قربانیوں کے باعث آج ہم آزادی کی فضا میں سانس لے رہے ہیں۔

انہوں نے کہا کہ آج کے دن کا پیغام یہ ہے کہ ہمیں وطن سے محبت کرنی چاہیے، اس کی حفاظت کرنی چاہیے اور ذاتی مفادات سے بالاتر ہو کر وطنِ عزیز کے ساتھ غیر مشروط محبت کرنی چاہیے۔قبل ازیں وزیر دفاع خواجہ محمد آصف نے جناح ہال قلعہ پر ہلال استقلال کی تبدیلی کی رسم انجام دی۔ اس موقع پر اسٹیشن کمانڈر بریگیڈیئر اویس توقیر، ارکان صوبائی اسمبلی محمد منشاء اللہ بٹ، چودھری فیصل اکرام، چودھری طارق سبحانی، ڈپٹی کمشنر صباء اصغر علی اور ڈی پی او فیصل شہزاد بھی موجود تھے۔

کوارڈینیٹر وزیر اعظم شاہد ندیم کہگ، ایڈمنسٹریٹر میونسپل کارپوریشن عباس ذوالقرنین، ایڈیشنل ڈپٹی کمشنر جنرل ایوب بخاری اور اسسٹنٹ کمشنر خواجہ عمیر سمیت دیگر افسران نے بھی تقریب میں شرکت کی۔ پولیس، ریسکیو 1122 اور شہری دفاع کے رضاکاروں نے قومی پرچم کو سلامی پیش کی۔\932