سیلاب پر بننے والی پارلیمانی کمیٹی کے نمائندگان تیس روز میں سفارشات مرتب کرکے حکومت کو بھجوائیں گے ‘ سپیکر

لاہور(اُردو پوائنٹ اخبارتازہ ترین - این این آئی۔ 08 ستمبر2025ء)سپیکر پنجاب اسمبلی ملک محمد احمد خان نے ایوان میں کہا ہے کہ سیلاب پر بننے والی پارلیمانی کمیٹی کے نمائندگان تیس روز میں اپنی سفارشات مرتب کرکے حکومت کو بھجوائیں گے ،حکومت کو صوبے کو آفت زدہ قرار دینا چاہیے ،بلوں میں معافی اور امداد کیلئے وفاق و پنجاب کو سفارش کریں گے،نئے اپوزیشن لیڈر کیلئے سیکرٹری اسمبلی اور سینئر ممبرز کی رائے سے جو بھی نام تجویز ہوگا اسے آگے لے کر چلیں گے۔

پنجاب اسمبلی میں سیلاب پر بحث کو سمیٹے ہوئے صوبائی وزیر آبپاشی کاظم پیرزادہ نے کہا ہے کہ جب تک سیلاب کے مسئلہ کو نہیں سمجھیں گے حل تک نہیں پہنچ سکتے،ہمیں دریائوں کی صورتحال کو سمجھنا ہوگا،زندہ قوموں پر امتحان آتے رہتے ہیں قوم ہمیشہ ایک ہوکر مصیبت سے نبردآزما ہوتی ہے،ہم سے زیادہ طاقتور دشمن کو اپنی اہمیت بتائی ہے،یہ پاکستان کی تاریخ کا سب سے بڑا سیلاب ہے ۔

(جاری ہے)

پوزیشن ارکان نے بحث میں حصہ لیتے ہوئے کہاکہ دریائوں میں ہائوسنگ سوسائٹیاں بناکر قبضہ گروپوں نے دریا کا راستہ بند کرنے کی کوشش کی ،اس وقت پنجاب کا کسان بری طرح سے متاثر ہوچکا ہے ،بیوروکریسی حکومت کو بے وقوف بنا رہی ہے۔پنجاب اسمبلی کا اجلاس مقررہ وقت کی بجائے دو گھنٹے پچاس منٹ کی تاخیر سے شروع ہوا۔نکتہ اعتراض پر بات کرتے ہوئے ڈپٹی اپوزیشن لیڈر معین قریشی نے کہا کہ اجلاس کے لئے دو بجے کا وقت تھالیکن غیرمعمولی تاخیر سے شروع ہوا ،لوگ بددل ہوکر آنا چھوڑ دیں گے۔

ہم نے حسان ریاض اور خالد نثار ڈوگر کے درمیان جھگڑے کے معاملے پرخط لکھا ،اس معاملے پر کمیٹی بنائی گئی تھی لیکن ڈیڑھ ماہ ہوگیا ہے کمیٹی کا کوئی جواب نہیں آیا۔صوبائی وزیر برائے پرائمری ہیلتھ خواجہ عمران نذیر نے کہا کہ ہم سب ایوان کا حصہ ہیں حکومت ہو یا اپوزیشن وقت نکال کر آتے ہیں ، ہم لوگ اپنے حلقوں سے وقت نکال کر آتے ہیں بروقت اجلاس شروع ہو، اپوزیشن کورم کی نشاندہی نہ کرے جس پر چیئر نے یقین دہانی کرائی کہ آئندہ اجلاس کو بروقت کریں گے۔

،سپیکر پنجاب اسمبلی ملک محمد احمد خان نے کہاکہ حکومت ہو یا عوام ہوں بحیثیت قوم سیلاب زدہ علاقوں میں کام کیا ۔بھارت نے بین الاقوامی معاہدہ کی خلاف ورزی کرتے ہوئے پانچ مقامات پر پاکستان کا پانی روکا، بھارت نے فلڈ وارننگ نہ دے کر پاکستان پر آبی دہشت گردی کی، وزیر اعلی مریم نواز، بلاول بھٹو ،یوسف رضا علی گیلانی کا شکریہ ادا کرتا ہوں جو سیلاب میںکام کررہے ہیں،پارلیمانی کمیٹی بنے جو نمائندہ ایوان پر سفارشات مرتب کرکے حکومتوں کو تیس دن میں رپورٹ بھیجے، ہم سب حکومت کو بتائیں گے سیلاب میں کس طرح نبرد آزما ہونا چاہیے۔

انہوںنے کہاکہ حکومت کو مخاطب کرتے ہوئے کہاکہ آپ نے بجلی کے بل اور زرعی قرضہ معاف کرنے ہیں لوگوں کی امداد کرنی ہے۔سیلاب پرجاری بحث کو سمیٹے ہوئے وزیر آبپاشی پیر زادہ کاظم حسین نے کہا کہ یہ پاکستان کی تاریخ کا سب سے بڑا سیلاب ہے ، سمجھنے کی ضرورت ڈیم کہاں بنتا ہے ،ڈیم سیلاب کو نہیں روکتا، محکمہ آبپاشی نے صرف دو مقامات قادر آباد بیراج، سدھنائی بیراج پر شگاف ڈالے ،دو بیراجوں پر مشکل کا سامنا کرنا پڑا،شہبازشریف کو کام کرنے دیا جاتا تو دو بیراج بھی ری ہیبلیٹیٹ ہوتے،تین دریائوں اور پانی کی طاقت کو دیکھا توبروقت شگاف ڈالے گئے ، ہمیں سیلاب کی صورتحال پر بنائے گئے ایس او پیز پر مذہب کی طرح عملدرآمد کرنا ہوگا، قدرتی آفت ہے ،کوئی محکمہ کسی دوسرے پر کام نہ کرنے کا الزام نہیں لگائے گا۔

پاکستان میں جتنے سیلاب آئے چھ گھنٹے سے زائد سیلابی پانی نہیں دیکھا لیکن تاریخ میں پہلی بارکئی کئی روز سے بیراجز پر سیلابی صورتحال ہے ۔محکمہ آبپاشی نے فرنٹ لائن وارئیر کی طرح کام کیا ، قصور کو بچانے کے لئے فلڈ فائٹنگ ہو رہی ہے،محکمہ آبپاشی والوں نے لوگوں کو دھوکے میں نہیں رکھا ،کسی نے ہماری کارکردگی پر اعتراض نہیں کیا ۔وزیر آبپاشی کاظم پیر زادہ نے کہاکہ سیلاب کے علاوہ نالوں پر الگ کمیٹی بنانا ہوگی، سیلاب پر ریلیف کے لئے وزیر اعلی کام کررہی ہیں، ریلیف کا اعلان وزیر اعلی ہی کریں گی۔

سپیکر ملک محمد احمد خان نے کہا کہ ساری صورتحال میں جامع منصوبہ بندی تشکیل دیں،اگلے چند دنوں میں کاشتکار بھیک مانگنے پر مجبور ہوں گے، بطور حکومت صوبہ کو آفت زدہ قرار دیں،بلوں میں کمی اور فصلات کا مداوا پر صوبائی ،وفاقی حکومت کو سفارش کریں گے، اتنے تیز پانی میں لوگ جان ہتھیلی میں رکھ کر کشتی میں ریلیف دے رہے ہیں،بیس لاکھ کی ایسی آبادی ہے جو اپنے گھروں سے باہر ہیں،کچھ لوگ کیمپس تو کچھ عزیز و اقارب کے پاس ہیں ۔

ا نہوںنے کہا کہ احمد بھچر کے نااہل ہونے پر افسوس ہے لیکن یہ عدالت کا فیصلہ ہے ،اس میں میرا کوئی کردار نہیں،احمد خان بھچر کا الیکشن کمیشن نے نااہلی کااعلان کیا ،سیکرٹری اسمبلی سینئر ممبرزسے پوچھ کر اپوزیشن لیڈر کا نام تجویز کریں گے۔ایجنڈا مکمل ہونے پر پنجاب اسمبلی کااجلاس غیر معینہ مدت کیلئے ملتوی کردیا گیا۔