میجر عدنان اسلم شہید کی نماز جنازہ راولپنڈی میں ادا کر دی گئی، وزیراعظم محمد شہباز شریف، آرمی چیف فیلڈ مارشل سید عاصم منیر کی شرکت

منگل 9 ستمبر 2025 23:15

راولپنڈی (اُردو پوائنٹ اخبارتازہ ترین - اے پی پی۔ 09 ستمبر2025ء) کمبائنڈ ملٹری ہسپتال میں دوران علاج جام شہادت نوش کرنے والے میجر عدنان اسلم شہیدکی نماز جنازہ چکلالہ راولپنڈی میں ادا کر دی گئی۔انہوں نے 2 ستمبر کو بنوں میں بزدلانہ حملے کے دوران بھارتی پراکسی فتنہ الخوارج کا بہادری سے مقابلہ کیا۔منگل کو آئی ایس پی آر سے جاری بیان کے مطابق وزیر اعظم محمد شہباز شریف، وزیر دفاع خواجہ محمد آصف، وزیر اطلاعات ونشریات عطا اللہ تارڑ، آرمی چیف فیلڈ مارشل سید عاصم منیر،حاضر سروس فوجی اور سول افسران اور شہید کے لواحقین نے نماز جنازہ میں شرکت کی۔

میجر عدنان اسلم عمر31 سال، ساکن راولپنڈی نے اپنے جوانوں کی فرنٹ سے قیادت کرتےہوئے بے مثال بہادری کے ساتھ شہادت کو گلے لگایا۔

(جاری ہے)

وزیر اعظم نے ان کی بہادری کو خراج تحسین پیش کرتے ہوئے کہا کہ آج ہم نے دھرتی کا ایک بہادر بیٹا کھو دیا ہے جس کی ہمت اور قربانی ہمیشہ قوم کے دلوں میں نقش رہے گی، یہ اٹل عزم، وطن سے محبت اور قربانی کا اٹوٹ جذبہ پاکستان کی بہترین نمائندگی کرتا ہے۔میجر عدنان کی شہادت اس بات کی گواہی ہے کہ پاکستان کی مسلح افواج ہر قسم کی دہشت گردی کو جڑ سے اکھاڑ پھینکنے کے لئے پرعزم ہیں۔ میجر عدنان اسلم شہید کو پورے فوجی اعزاز کے ساتھ آبائی گاؤں میں سپرد خاک کیا جائے گا۔\932