وزیراعظم محمد شہباز شریف کا ملک بھر میں کلائیمٹ اور زرعی ایمرجنسی کے نفاذ کی اصولی منظوری کا اعلان

اسلام آباد (اُردو پوائنٹ اخبارتازہ ترین - اے پی پی۔ 10 ستمبر2025ء) وزیراعظم محمد شہباز شریف نے ملک بھر میں رواں برس مون سون اور سیلابی صورتحال کے پیش نظر کلائیمٹ اور زرعی ایمرجنسی کے نفاذ کی اصولی منظوری کا اعلان کیا ہے جبکہ وزیراعظم کی ہدایت پر وفاقی کابینہ نے وزارت پٹرولیم کی سفارش پر صارفین کو آر ایل این جی کنکشنز کی فراہمی کی منظوری دے دی جس سے صارفین کو ایل پی جی کی نسبت 30 فیصد کم لاگت میں گیس دستیاب ہوگی۔

وزیراعظم آفس کے میڈیا ونگ کی طرف سے جاری بیان کے مطابق وزیراعظم محمد شہباز شریف کی زیر صدارت وفاقی کابینہ کا اجلاس بدھ کو یہاں منعقد ہوا۔اجلاس میں وزیراعظم محمد شہباز شریف نے ملک بھر میں رواں برس مون سون اور سیلابی صورتحال کے پیش نظر کلائمیٹ اور زرعی ایمرجنسی کے نفاذ کی اصولی منظوری کا اعلان کیا۔

(جاری ہے)

بیان کے مطابق وزیر اعظم چاروں صوبوں کے وزراء اعلیٰ اور متعلقہ حکام پر مشتمل اجلاس کی جلد صدارت کریں گے جس میں موسمیاتی تبدیلی کے مضر اثرات سے مزید نقصانات میں کمی کے حوالے سے مستقبل کے لائحہ عمل پر مشاورت ہوگی۔

وفاقی کابینہ کو ملک میں سیلاب کی موجودہ صورتحال اور نقصانات پر بریفنگ دی گئی اور سیر حاصل مشاورت کے بعد ایمرجنسی کی اصولی منظوری کا فیصلہ کیا گیا۔ کابینہ ارکان نے ملک میں لاکھوں ایکڑ زرعی اراضی اور فصلوں کے نقصانات پر روشنی ڈالی اور انفراسٹرکچر کی بحالی و زراعت میں ہونے والے نقصانات کے ازالے اور کسانوں کی معاونت کے حوالے سے بھی تجاویز دیں۔

وفاقی کابینہ نے سماجی رابطوں کی ویب سائٹس پر شہداء اور افواج پاکستان کے مخالف تضحیک آمیز مواد و بیان نشر کرنے کی بھرپور الفاظ میں مذمت کی اور پاکستان کی سرحدوں کی حفاظت میں دن رات مصروف عمل افواج پاکستان کے افسران و جوانوں کو اور ملک میں امن کے قیام کیلئے عظیم قربانیاں دینے والے شہداء اور ان کے اہل خانہ کو خراج تحسین پیش کیا۔ وفاقی کابینہ نے ایسے شر پسند عناصر کے سد باب کیلئے سخت ایکشن لینے کی ہدایت کی۔

اس موقع پر وزیر اعظم نے کہا کہ ایسے عناصر کی ہر فورم پر حوصلہ شکنی اور ان کی تضحیک آمیز مہم کا جواب ہم سب کی قومی ذمہ داری ہے۔ انہوں نے مزید کہا کہ پاکستانی قوم اپنے شہداء اور ان کے اہل خانہ کی عظیم قربانیوں کو کبھی فراموش نہیں کر سکتی، مجھ سمیت پوری قوم کو اپنے شہداء اور ان کے اہل خانہ پر فخر ہے۔ وفاقی کابینہ نے بنوں آپریشن میں عظیم قربانی دینے والے میجر عدنان اسلم شہید کیلئے بلندی درجات کی دعا کی۔

وفاقی کابینہ نے وفاقی وزیر سمندری امور جنید انوار چوہدری کی مرحومہ والدہ، وزیر مملکت غذائی تحفظ ملک رشید احمد خان کے مرحوم بڑے بھائی حاجی حنیف خان اور سابق چیئرمین سینیٹ صادق سنجرانی کے مرحوم والد آصف سنجرانی کیلئے بھی دعائے مغفرت کی۔ وزیراعظم نے گزشتہ روز دوحہ میں اسرائیلی فورسز کی طرف سے غیر قانونی اور گھنائونی بمباری کی شدید مذمت کی جس کے نتیجے میں قیمتی جانوں کا ضیاع ہوا اور املاک کو نقصان پہنچا۔

وزیر اعظم نے گہری ہمدردی کا اظہار کرتے ہوئے امیرِ قطر، قطری شاہی خاندان اور قطر کے عوام کے ساتھ یکجہتی کا اظہار کیا۔ وزیر اعظم کی ہدایت پر عوامی ریلیف کیلئے ایک بڑا اقدام اٹھاتے ہوئے وفاقی کابینہ نے وزارت پٹرولیم کی سفارش پر گیس کنکشنز کے منتظر صارفین کو آر ایل این جی کنکشنز کی فراہمی کی منظوری دے دی۔ منظوری کے بعد سوئی سدرن اور سوئی نادرن گیس کمپنیاں کنکشنز کی فراہمی کا عمل شروع کریں گی۔

کابینہ کو بتایا گیا کہ ان کنکشنز کے ذریعہ ملنے والی آر ایل این جی پر صارفین کی ایل پی جی سے 30 فیصد کم لاگت آئے گی۔ وفاقی کابینہ نے وزارت ریلوے کی سفارش پر ازبکستان، افغانستان اور پاکستان کے مابین مشترکہ فزیبلٹی سٹڈی پر سہ فریقی حکومتی فریم ورک معاہدے کی بعد از وقوع توثیق کی گئی۔ اس معاہدے پر دستخط گزشتہ ماہ ہوئے تھے اور یہ علاقائی تجارت و رابطہ کاری کے لیے ایک اہم منصوبہ ہے۔ کابینہ کی توثیق اس سٹریٹجک منصوبے کی تکمیل کیلئے حکومتی عزم کا اعادہ ہے۔وفاقی کابینہ نے کابینہ کی اقتصادی رابطہ کمیٹی (ای سی سی)، بین الحکومتی تجارتی لین دین (سی سی او آئی جی سی ٹی) اور قانون سازی کیسز (سی سی ایل سی) سے متعلق کابینہ کمیٹیوں کے فیصلوں کی بھی توثیق کی۔