پاکستان اور سعودی عرب کے درمیان ہونے والے دفاعی معاہدوں کی خوشی میں جمعہ کو ملک بھر میں یوم تشکر منایا گیا

اسلام آباد/لاہور/پشاور (اُردو پوائنٹ اخبارتازہ ترین - اے پی پی۔ 19 ستمبر2025ء) پاکستان اور سعودی عرب کے درمیان ہونے والے دفاعی معاہدوں کی خوشی میں جمعہ کو ملک بھر میں یوم تشکر منایا گیا۔ اس موقع پر نماز جمعہ کے اجتماعات میں دفاعی معاہدوں کی کامیابی اور دونوں ملکوں کی سلامتی اور خوشحالی کے لیے خصوصی دعائیں کی گئیں۔ وزیر مذہبی امور سردار محمد یوسف نے مختلف علمائے کرام کو ٹیلی فون کرکے یوم تشکر منانے اور خصوصی دعائیں کرانے پر شکریہ ادا کیا ۔

انہوں کہا کہ ملکی تاریخ میں یہ موقع واقعی ایک سنگ میل کی حیثیت رکھتا ہے ۔ اس کے لئے سعودی فرمانروا شاہ سلمان بن عبدالعزیز ، ولی عہد محمد بن سلمان ، وزیر اعظم محمد شہباز شریف اور فیلڈ مارشل سید عاصم منیر مبارکباد کے مستحق ہیں۔

(جاری ہے)

لاہور میں منعقدہ یوم تشکر کی تقریب سے خطاب کرتے ہوئے چیئرمین مرکزی رویت ہلال کمیٹی مولانا عبدالخبیر آزاد نے کہاکہ پاک سعودیہ دفاعی معاہدہ عظیم معاہدہ ہے، اس معاہدہ پر پوری قوم یوم تشکر منا رہی ہے۔

مولانا عبد الخبیر آزاد نے کہاکہ حرمین شریفین سے ہمارا رشتہ کلمہ طیبہ کی بنیاد پر ہے، حرمین شریفین کا تحفظ ہمارے ایمان کا حصہ ہے۔عبد الخبیر آزاد نے کہاکہ وہ وقت آگیا ہے کہ اللہ نے ہمیں اپنے برادر ملک سعودی عرب اورپاکستان کےساتھ کھڑا کیا۔انہوں نے کہا کہ فیلڈ مارشل سید عاصم منیرحق کے پرچم کو لہراتے ہوئے مودی کےآگے سیسہ پلائی دیوار بن گئے، ہم نے 3 گھنٹے میں بھارت کا چہرہ خاک میں ملا کربتا دیا کہ ہم نعرہ تکبیر اور اللہ اکبروالے ہیں۔

عبد الخبیر آزاد نے کہاکہ پاکستان نے سعودی عرب کے ساتھ جو معاہدہ کیا ہے اس پر اسرائیل پریشان ہے، معاہدے سے پاکستان کا پرچم مزید بلند ہوگیا ہے۔چیئرمین مرکزی رویت ہلال کمیٹی نے کہا کہ پاکستان کا بچہ بچہ حرمین شریفین کا تحفظ کرے گا، دشمن قوتوں کو پیغام دینا چاہتے ہیں باطل مٹے گا اور حق بلند ہوگا۔انہوں نے ریاست پر حملہ کرنے والوں کو گناہ کبیرہ کے مرتکب قرار دیتے ہوئے کہاکہ ان کے لیے ملک میں رہنے کا کوئی جواز نہیں، فتنۃ الخوارج اور دشمن قوتوں کو چلنے نہیں دیں گے۔

پشاور کی تاریخی مسجد مہابت خان میں بھی یوم تشکر کے حوالے سے خصوصی دعا کی گئی۔ اس موقع پر چیف خطیب مولانا طیب محمد قریشی نے ملک کی سلامتی کے لیے دعا کرائی۔مولانا طیب قریشی نے کہاکہ ہمیں فخر ہے کہ اللہ تعالیٰ نے حرمین شریفین کی حفاظت کے لیے پاکستان کا انتخاب کیاہے۔\395