چین، ایران، پاکستان اور روس کے وزرائے خارجہ کا افغانستان بارے چوتھا چار فریقی اجلاس ، دہشت گردی، جنگ اور منشیات سے پاک افغانستان کے لیے اپنے عزم کو دہرایا ۔دفتر خارجہ

نیویارک (اُردو پوائنٹ اخبارتازہ ترین - اے پی پی۔ 27 ستمبر2025ء) چین، ایران، پاکستان اور روسی کے وزرائے خارجہ نے افغانستان کی صورتحال پر غور کے لیے اقوام متحدہ کی جنرل اسمبلی کے 80ویں اجلاس کے موقع پر چوتھے چار فریقی اجلاس کے مشترکہ اعلامیہ میں افغانستان کو ایک آزاد، متحد اور پرامن ملک کے طور پر قیام کی حمایت کا اعادہ کیا ہے اور دہشت گردی، جنگ اور منشیات سے پاک افغانستان کے لیے اپنے عزم کو دہرایا ہے۔

وزرائے خارجہ نے افغانستان کی معیشت کو سہارا دینے کے لیے مؤثر علاقائی اقدامات، تجارت اور رابطہ کاری کو فروغ دینے اور افغان عوام کی سنگین صورتحال کو کم کرنے کے لیے مسلسل معاشی تعاون پر زور دیا۔ انہوں نے 1988 کی پابندیوں کے نظام میں زمینی حقائق کے مطابق ایڈجسٹمنٹ کی ضرورت پر بھی زور دیا تاکہ امن و استحکام کو فروغ دیا جا سکے۔

(جاری ہے)

ہفتہ کو دفتر خارجہ سے جاری بیان کے مطابق روس کی دعوت پر منعقدہ اجلاس میں چاروں فریقوں نے افغانستان میں انسانی ہمدردی کی بنیاد پر امداد جاری رکھنے اور عالمی برادری سے افغان عوام کے لیے فوری انسانی امداد بڑھانے کا مطالبہ کیا۔

اعلامیہ میں کہا گیا کہ انسانی امداد کو کسی سیاسی مقصد سے مشروط نہیں ہونا چاہیے۔وزرائے خارجہ نے افغانستان میں داعش، القاعدہ، تحریک طالبان پاکستان، جیش العدل، بلوچ لبریشن آرمی اور دیگر دہشت گرد گروہوں کی موجودگی پر گہری تشویش کا اظہار کیا اور افغان حکام پر زور دیا کہ وہ ان تنظیموں کے خلاف مؤثر اور قابل تصدیق اقدامات کریں۔انہوں نے افیون کی کاشت میں کمی پر افغان حکام کی کوششوں کو سراہا اور مصنوعی منشیات کی بڑھتی پیداوار پر تشویش ظاہر کرتے ہوئے منشیات کی اسمگلنگ میں ملوث گروہوں کے خلاف مشترکہ کارروائی کی ضرورت پر زور دیا۔

انہوں نے افغان پناہ گزینوں کی باعزت اور محفوظ واپسی کے لیے سازگار حالات پیدا کرنے پر زور دیا جبکہ ایران و پاکستان کی جانب سے لاکھوں افغان پناہ گزینوں کی میزبانی کو سراہا گیا ۔ عالمی برادری سے کہا گیا کہ وہ ایران اور پاکستان سمیت میزبان ممالک کی مالی و تکنیکی معاونت کرے، چاروں فریقوں نے افغانستان میں ایک جامع اور وسیع البنیاد حکومت کے قیام، خواتین اور بچیوں کی تعلیم، روزگار اور بنیادی سہولتوں تک رسائی پر زور دیا اور کہا کہ یہ اقدامات افغانستان میں امن، استحکام اور خوشحالی کے لیے ناگزیر ہیں۔

اعلامیہ میں کہا گیا کہ افغانستان کی موجودہ صورتحال کی بنیادی ذمہ داری نیٹو رکن ممالک پر عائد ہوتی ہے۔ نیٹو ممالک سے مطالبہ کیا گیا کہ وہ افغان عوام کے لیے یکطرفہ پابندیاں ختم کریں، منجمد اثاثے واپس کریں اور افغانستان کی تعمیر و ترقی میں عملی کردار ادا کریں۔چاروں وزرائے خارجہ نے افغانستان کے مسئلے کے سیاسی حل کے لیے تمام سفارتی کوششوں کی حمایت کی اور ماسکو فارمیٹ، ہمسایہ ممالک کے وزرائے خارجہ اجلاس اور شنگھائی تعاون تنظیم جیسے علاقائی فورمز کے مثبت کردار کو سراہا گیا ۔