امیربالاج قتل کیس؛ مرکزی ملزم طیفی بٹ سی سی ڈی سے مبینہ مقابلے میں مارا گیا

خواجہ تعریف گلشن عرف طیفی بٹ کو دبئی سے پاکستان لانے کے بعد لاہور منتقل کیا جارہا تھا کہ رحیم یار خان کے قریب ملزم کے ساتھیوں نے حملہ کردیا؛ سی سی ڈی ذرائع

ساجد علی ہفتہ 11 اکتوبر 2025 11:01

امیربالاج قتل کیس؛ مرکزی ملزم طیفی بٹ سی سی ڈی سے مبینہ مقابلے میں مارا ..

لاہور ( اُردو پوائنٹ اخبارتازہ ترین۔ 11 اکتوبر2025ء ) پنجاب پولیس کے کرائم کنٹرول ڈیپارٹمنٹ (سی سی ڈی) سے مبینہ مقابلے میں امیر بالاج قتل کیس کا مرکزی ملزم خواجہ تعریف گلشن عرف طیفی بٹ مارا گیا۔ اطلاعات کے مطابق خواجہ تعریف گلشن عرف طیفی بٹ کو دبئی سے پاکستان لانے کے بعد لاہور منتقل کیا جارہا تھا کہ اس دوران رحیم یار خان کے قریب ملزم کے ساتھیوں نے حملہ کردیا، سی سی ڈی پنجاب کا کہنا ہے کہ طیفی بٹ کو بالاج کیس کی تفتیش کے لیے لاہور لایا جا رہا تھا کہ رحیم یار خان میں ملزم کے اپنے ساتھیوں نے اس کو پولیس سے چھڑوانے کی کوشش کی اور فائرنگ کے دوران طیفی بٹ مارا گیا، مجموعی طور دو افراد نے فائرنگ کی جو فرار ہونے میں کامیاب ہوگئے تاہم طیفی بٹ کی لاش کو قبضے میں لے کر کیس کی تفتیش شروع کردی گئی۔

(جاری ہے)

بتایا گیا ہے کہ امیر بالاج قتل کیس کے مرکزی ملزم خواجہ تعریف گلشن عرف طیفی بٹ کو انٹرپول کی مدد سے دبئی سے گرفتار کیا گیا، ملزم واردات کے بعد بیرون ملک فرار ہوگیا تھا، امیر بالاج ٹیپو قتل کیس میں مطلوب ملزم طیفی بٹ کو اشتہاری ملزم قرار دیا گیا تھا، مرکزی ملزم کی گرفتاری کے لیے پولیس نے گزشتہ سال وزارت داخلہ سے رابطہ کیا، وزارت داخلہ کی منظوری کے بعد طیفی بٹ کے ریڈ وارنٹ حاصل کیے گئے اور ملزم کی گرفتاری کیلئے انٹرپول سے رابطہ کیا گیا جس کے بعد پنجاب پولیس کی ٹیم نے ملزم کو انٹرپول کی مدد سے گرفتار کیا۔

بتاتے چلیں کہ امیر بالاج ٹیپو کو اس وقت قتل کیا گیا جب وہ لاہور کے علاقہ ٹھوکر نیاز بیگ کے قریب ایک نجی ہاؤسنگ سوسائٹی میں سابق ڈی ایس پی اکبر اقبال کے بیٹے کی شادی کی تقریب میں شریک تھا، تقریب کے دوران وہاں موجود ایک حملہ آور نے فائرنگ کی جس سے امیر بالاج ٹیپو سمیت 3 افراد زخمی ہوئے جنہیں فوری ہسپتال منتقل کیا گیا تاہم امیر بالاج زخموں کی تاب نہ لاتے ہوئے دم توڑ گیا۔