اسلام آباد (اُردو پوائنٹ اخبارتازہ ترین - اے پی پی۔ 17 اکتوبر2025ء) وفاقی وزیر منصوبہ بندی، ترقی و خصوصی اقدامات پروفیسر
احسن اقبال نے کہا ہے کہ حکومت نے گورننس سٹرکچر کو ازسر نو تشکیل دینے، ریڈ ٹیپ کلچر کے خاتمے اور
کاروبار دوست ماحول کے فروغ کے لیے جامع اصلاحات پر عملدرآمد کا فیصلہ کیا ہے، ان اصلاحات کا مقصد موثر انتظامی ڈھانچے، شفافیت اور سرمایہ کاروں کے لیے سازگار فضا کو یقینی بنانا ہے۔
وزارت منصوبہ بندی کی ماہانہ ترقیاتی رپورٹ اور حالیہ
سیلاب سے ہونے والے نقصانات کی ابتدائی تخمینہ رپورٹ کے اجراء کے موقع پر تقریب سے خطاب کرتے ہوئے انہوں نے کہا کہ حکومت نے شفاف طرز حکمرانی کو فروغ دینے کے لیے ہر ماہ باقاعدگی سے ترقیاتی کارکردگی رپورٹ پیش کرنے کا نظام وضع کیا ہے۔
(جاری ہے)
وزیر منصوبہ بندی نے کہا کہ حالیہ چند ہفتوں میں پاکستان کو بڑے پیمانے پر سیلاب کا سامنا کرنا پڑا ہے جس سے وسیع تباہی ہوئی، ابتدائی تخمینے کے مطابق 822 ارب روپے کا نقصان ہوا ہے جس میں 430 ارب روپے زرعی شعبے اور 307 ارب روپے انفراسٹرکچر کو نقصان پہنچا۔
انہوں نے بتایا کہ ایک ہزار سے زائد قیمتی جانیں ضائع ہوئیں،
پنجاب میں 2 لاکھ 13 ہزار،
بلوچستان میں 6 ہزار سے زائد،
سندھ میں 3,332، کے پی میں 3,200 اور
آزاد کشمیر و گلگت بلتستان میں 3,600 سے زائد گھر متاثر ہوئے۔مزید بتایا گیا کہ 2267 سے زیادہ تعلیمی ادارے متاثر ہوئے جبکہ 0.6 سے 1.2 ملین ٹن چاول کی فصل کو
نقصان پہنچنے کا خدشہ ہے۔ ابتدائی تخمینہ رپورٹ
وزیراعظم کو ارسال کر دی گئی ہے۔
احسن اقبال نے کہا کہ اس تمام صورتحال کے باوجود معیشت نے لچک دکھائی ہے، مالی سال 2025-26 کی پہلی سہ ماہی میں
مہنگائی 9.2 فیصد سے کم ہو کر 4.2 فیصد پر آ گئی جبکہ ٹیکس کولیکشن میں 12.5 فیصد اضافہ ہوا اور حکومت نے 2,884 ارب روپے ٹیکس جمع کیا جو گزشتہ سال اسی مدت کے 2,563 ارب روپے کے مقابلے میں نمایاں اضافہ ہے۔انہوں نے کہا کہ نجی شعبے اور بینکوں کے کریڈیٹ میں 16 فیصد اضافہ ہوا ہے جو کاروباری سرگرمیوں کے فروغ کی علامت ہے جبکہ ترسیلات زر میں 8.5 فیصد اضافہ بیرون ملک مقیم پاکستانیوں کے بڑھتے اعتماد کی عکاسی کرتا ہے۔
وزیر منصوبہ بندی نے کہا کہ
پاکستان نے سفارتی سطح پر بھی اہم کامیابیاں حاصل کی ہیں،
غزہ امن معاہدہ کے بعد پاک
-امریکہ تعلقات نئے سرے سے مستحکم ہو رہے ہیں جبکہ ’’معرکہ حق‘‘ اور پاک
-سعودی معاہدہ بھی
پاکستان کی بڑی سفارتی کامیابیاں ہیں۔انہوں نے کہا کہ
پاکستان اب تیز رفتار ترقی کی راہ پر گامزن ہے اور اس کے لیے سٹرکچرل اصلاحات، جدید گورننس اور ریگولیٹری سسٹم کو اپنانا ضروری ہے تاکہ 2035ء تک ’’اڑان
پاکستان پروگرام‘‘ کے تحت ایک ٹریلین
ڈالر کی معیشت کا ہدف حاصل کیا جا سکے۔
پروفیسر
احسن اقبال نے اعلان کیا کہ سال 2026ء کو ’’ریفارمز اینڈ ماڈرنائزیشن آف اکانومی کا سال‘‘ کے طور پر منایا جائے گا۔انہوں نے کہا کہ حکومت گورننس سٹرکچر کو از سر نو ترتیب دینے، ریڈ ٹیپ کلچر کے خاتمے اور
کاروبار دوست ماحول کی فراہمی کے لیے جامع اصلاحات پر عمل کرے گی۔وفاقی وزیر نے مزید کہا کہ سماجی یکجہتی کے فروغ، علماء کے کردار کو معاشرتی اصلاحات میں شامل کرنے، سول سروس کو جدید تقاضوں سے ہم آہنگ کرنے اور سرمایہ کاری کے فروغ کے لیے جامع منصوبہ بندی کی جا رہی ہے۔
احسن اقبال نے کہا کہ جب تک ملک میں پالیسیوں کا تسلسل اور
کاروبار دوست ماحول قائم رہے گا، کوئی شک نہیں کہ
پاکستان دن دگنی رات چگنی ترقی کرے گا۔ انہوں نے کہا کہ
پاکستان میں نئے صوبے بنانے کے لیے آئینی طریقہ
کار موجود ہے تاہم یہ عمل قومی اتفاق رائے کے بغیر ممکن نہیں۔انہوں نے
چین کی ترقی کی مثال دیتے ہوئے کہا کہ لوکل گورنمنٹ کا مضبوط نظام ترقی کی کلید ہے،
پاکستان میں بھی مقامی حکومتوں کو موثر بنانا ہوگا۔
