مسلح افواج پاکستان نے کامیاب دفاعی حکمت عملی سے بھارتی جارحیت کو ناکام بنایا،گورنربلوچستان

کوئٹہ (اُردو پوائنٹ اخبارتازہ ترین - اے پی پی۔ 05 مئی2026ء) گورنر بلوچستان جعفرخان مندوخیل نے کہا کہ امن ہو یا میدان جنگ دونوں میں پاکستان کا کردار بہت منفرد رہا ہے۔ کئی اندرونی اور بیرونی چیلنجز کا سامنا کرنے کے باوجود پاکستان نے یہ ثابت کر دیا ہے کہ ایک چھوٹا سا ملک بھی بین الاقوامی سطح پر سفارت کاری اور قیادت کی نئی مثالیں قائم کر سکتا ہے۔

اپنے ایک بیان میں انہوں نے کہا کہ معرکہ حق کے موقع پر جب پاکستان کی بقا اور سلامتی کو بھارتی جارحیت سے خطرہ لاحق ہوا تو پاکستان ایک ایسے ملک سے نبردآزما ہوا جو فوجی تعداد اور جنگی ساز و سامان کے لحاظ سے کئی گنا بڑا تھا۔ اس کے باوجود ہم نےمسلح افواج پاکستان کی کامیاب دفاعی حکمت عملی سے بھارتی جارحیت کو ناکام بنا دیا۔

(جاری ہے)

ہم نے اپنی سرزمین کا بہترین دفاع کیا، اپنے قومی وقار کو قائم رکھا اور یہ ثابت کیا کہ ہمارا دفاع ناقابل تسخیر ہے۔

گورنر جعفرخان مندوخیل نے کہا کہ پاکستان ایک امن پسند ملک ہے اور موجودہ کشیدہ صورتحال میں امن، امید اور مذاکرات کی ایک کرن بھی ہے۔ تقریباً پچاس سال کے بعد ہم نے امریکہ اور ایران کو مذاکرات کی میز پر لانے میں مدد کی۔ اپنی دانشمندانہ سفارتکاری کے ذریعے پاکستان ایک پل بن چکا ہے۔ ہم نے ثابت کیا کہ سفارتکاری انتہائی کشیدہ صورتحال پر بھی غالب آسکتی ہے اور ملکوں اور اقوام کے درمیان تنازعات کو بامعنی ڈائیلاگ میں بدلے جا سکتے ہیں۔

انہوں نے کہا کہ ہم آج بھی پختہ یقین رکھتے ہیں کہ موجودہ مایوس کن صورتحال میں بھی امن کا قیام ممکن ہے اور کسی ملک کی ایک چھوٹی سی کاوش بھی ایک روشن اور زیادہ پرامن مستقبل کو محفوظ بنا سکتی ہے۔ گورنر مندوخیل نے کہا کہ جسطرح پاکستان موجودہ انٹرنیشنل غیریقینی صورتحال میں امن اور مذاکرات کے مرکز کے طور پر ابھرا ہے، اب اسی طرح ہم دنیا کے معاشی جمود کو ختم کر کے شاندار معاشی منصوبہ سی پیک کے ذریعے اقتصادی اور تجارتی سرگرمیوں کا عالمی مرکز بن جائیں گے۔

چین پاکستان اقتصادی راہداری ایک ایسا میگا پراجیکٹ ہے جو جلد ہی ایشیا کے معاشی نقشے کو ازسر نو واضح کریگا۔ اس کی تکمیل کے بعد پاکستان ایک اہم اکنامک ہب کے طور پر ابھرے گا جو سینٹرل ایشیا، ساوتھ ایشیا اور مشرق وسطیٰ کو ملانے کلیدی کردار ادا کریگا۔ گویا اس وقت ہم امن و مذاکرات کیلئے پل ہیں اور اگلے مرحلے میں ہم معاشی ترقی کا معتبر وسیلہ بنیں گے۔ ہمارا جغرافیائی محل وقوع اس بات کو مستحکم بناتا ہے کہ پاکستان نہ صرف امن کی علامت ہے بلکہ مستقبل قریب میں پورے خطے کیلئے معاشی ترقی و خوشحالی کا مرکز بھی ہے۔