بلدیاتی قانون میں ترمیم پر اتفاق‘ کراچی میں 29 روز سے جاری دھرنا ختم کردیا گیا

کراچی ( اُردو پوائنٹ اخبارتازہ ترین ۔ 28 جنوری 2022ء ) سندھ حکومت اور جماعت اسلامی کے درمیان بلدیاتی قانون میں ترمیم پر اتفاق کے بعد کراچی میں 29 روز سے جاری دھرنا ختم کردیا گیا ۔ میڈیا رپورٹس کے مطابق بلدیاتی نظام سے متعلق جماعت اسلامی اور صوبہ سندھ کی حکومتی جماعت پاکستان پیپلز پارٹی میں معاہدہ طے پا گیا ، جس میں جماعت اسلامی اور پیپلز پارٹی نے بلدیاتی قانون میں ترمیم پر اتفاق کیا اور جماعت اسلامی نے دھرنا ختم کرنے کا اعلان کردیا ۔

بتایا گیا ہے کہ نئے بلدیاتی قانون کے خلاف سندھ اسمبلی کے باہر جماعت اسلامی کا دھرنا ختم کرانے میں صوبائی وزیر ناصر حسین شاہ نے اہم کردار ادا کیا ، جو رات گئے دھرنے کے مقام پر پہنچے اور دھرنے کے شرکاء کے ساتھ معاملاے طے کیا ، جس کے بعد پریس کانفرنس کرتے ہوئے ناصر حسین شاہ نے کہا کہ مذاکراتی ٹیموں کی جانب سے دو طرفہ اتفاق رائے ہو گیا ہے ، صحت سے متعلق اختیارات ، ادارے دوبارہ بلدیہ کو دے دیئے جائیں گے جب کہ میئر کراچی واٹر اینڈ سیوریج بورڈ کے چیئر مین ہوں گے ، بلدیاتی الیکشن ایکٹ اور بل اسمبلی سے پاس ہونے کے 90 دن بعد انتخابات ہوں گے ، اس دوران انہوں نے احتجاجی دھرنے میں کار کنان کے سامنے تحریری معاہدہ پڑھ کر بھی سنایا ۔

(جاری ہے)

اس موقع پر امیر جماعت اسلامی کراچی حافظ نعیم الرحمان نے کہا کہ سندھ حکومت نے ہمارے اہم مطالبات مان لیے ہیں ، جس کے بعد اب دھرنے نہیں ہوں گے ، ہم نے پر امن جہدوجہد کی ، استقامت کے ساتھ کراچی کے شہریوں کے لیے 29 دن دھرنے میں بیٹھے رہے ، اب کراچی کا میئر با اختیار ہو گا کیوں کہ 2021ء کا ترمیمی بلدیاتی بل اب ختم ہو جائے گا ، ہم اس معاہدے پر عمل بھی کروائیں گے ، ہم نے پوائنٹ اسکورننگ نہیں کی جب کہ کراچی کی عوام نے بھی لسانیت کو مردہ باد کہا ہے۔