ضمیر کا سودا کرکے حکومت بچاؤں تو ایسی حکومت پر لعنت بھیجتا ہوں ؛ وزیراعظم

مالا کنڈ ( اُردو پوائنٹ اخبار تازہ ترین ۔ 20 مارچ 2022ء ) وزیراعظم عمران خان نے کہا ہے کہ الیکشن کمیشن ، عدالت اور عوام کے ساتھ ضمیر کا سودا کیا جارہا ہے، وقت آگیا ہے عوام فیصلہ کرے کہ وہ کس کے ساتھ کھڑی ہے ، ضمیر کا سودا کرکے حکومت بچاؤں تو ایسی حکومت پر لعنت بھیجتا ہوں ۔ تفصیلات کے مطابق مالاکنڈ ڈویژن کی تحصیل درگئی میں جلسہ عام سے خطاب کرتے ہوئے انہوں نے کہا کہ ہمارے پاس اس وقت دو راستے ہیں کہ چوروں اور ڈاکوؤں کا ساتھ دیں یا ان کی طرف جائیں جو 25 سال سے کرپشن کے خلاف بات کررہے ہیں ، اب فیصلہ کن وقت آگیا ، لوٹے اور ضمیر فروش میں فرق ہے ، ایک لوٹا ہے جو کسی اور طرف چلا جائے جب کہ دوسرا وہ ہے جو پیسوں کی خاطر اپنا ضمیر اور دین فروخت کردے ، ڈاکو اور چور پیسوں کے ذریعے ہماری ایم این ایز کو خریدنے کی کوشش کررہے ہیں۔

(جاری ہے)

وزیراعظم نے کہا کہ ساری قوم کے سامنے ضمیر کا سودا ہورہا ہے، عوام، عدلیہ اور الیکشن کمیشن سب کے سامنے یہ سب کچھ ہورہا ہے، میں اپنی قوم سے کہتا ہوں کہ اب فیصلے کا وقت آگیا ہے کہ آپ کہاں کھڑے ہیں؟ جب سندھ ہاؤس میں نوٹوں کی بوریاں لائی جائیں اور برائی سب کے سامنے آجائے تو اللہ کا حکم ہے برائی کے خلاف اور اچھائی کے ساتھ کھڑے ہوجاؤ ، یہ نہیں کہا کہ نیوٹرل رہو۔

عمران خان نے کہا کہ ن لیگ والوں نے آصف زرداری کو اربوں کی کرپشن پر دو بار جیل بھیجا ، پیپلز پارٹی نے نواز شریف پر چوری کے کیسز بنائے ، ان دونوں جماعتوں نے ایک دوسرے پر کیسز بنائے اور ایک دوسرے کو چور کہا آج یہ اپنی اپنی چوری بچانے کے لیے ایک ساتھ کھڑے ہیں ، آج کا نوجوان باشعور ہے، یہ سوشل میڈیا کا دور ہے جہاں کچھ بھی چھپانا مشکل ہے ، ضمیر فروشوں کا گھر سے باہر نکلنا ، تقاریب میں جانا مشکل ہوجائے گا ، لوگ ضمیر بیچنے والوں کو معاف نہیں کریں گے ، عوام ان تھری اسٹوجز کو جانتے ہیں، آپ جتنی چاہے وضاحت کرلیں لوگ سمجھتے ہیں کہ آپ نے ضمیر کا سودا کیوں کیا۔

انہوں نے کہا کہ میں اپنے ضمیر کا سودا نہیں کرسکتا ، اگر ضمیر کا سودا کرکے اپنی حکومت بچاؤں تو میں ایسی حکومت پر لعنت بھیجتا ہوں ، ایم این ایز کو پیغام دیتا ہوں کہ غلطیاں ہوجاتی ہیں میں آپ کو معاف کررہا ہوں واپس آجائیں ، اپنے بچوں کے مستقبل کے واسطے یہ غلطی نہ کریں ، پیسے لے کر اپنا اور اپنے بچوں کا مستقبل تباہ نہ کریں۔