اپوزیشن اتحاد کا پارلیمنٹ کو خود مختار اور مداخلت سے پاک کرنے کا مطالبہ

پشین ( اُردو پوائنٹ اخبارتازہ ترین۔ 13 اپریل 2024ء ) صوبہ بلوچستان کے علاقہ پشین میں جلسہ عام میں تحریک تحفظ آئین پاکستان کی جانب سے پارلیمنٹ اور اداروں سے متعلق قرارداد پیش کردی گئی۔ تفصیلات کے مطابق پشین میں اپوزیشن جماعتوں کے اتحاد ’تحریک تحفظ آئین پاکستان‘ کے تحت پہلا جلسہ منعقد کیا گیا، جس سے عمر ایوب، محمود خان اچکزئی، اختر مینگل اور دیگر قائدین نے خطاب کیا، اس موقع پر پشین جلسے میں اپوزیشن کی جانب سے قرار داد پیش کی گئی، جس میں پارلیمنٹ کو خود مختار اور اداروں کی مداخلت سے پاک کرنے کا مطالبہ کیا گیا۔

اپوزیشن اتحاد کی قرار داد میں کہا گیا کہ پاکستان کے تمام ادارے اپنی اپنی حدود میں رہ کر کام کریں، ملک کے تمام ادارے عوام کے منتخب کردہ پارلیمنٹ کے تابع ہوں، ملک بھر میں فام 45 کے تحت انتخابی نتائج مرتب کرکے اعلان کیا جائے۔

(جاری ہے)

اپوزیشن اتحاد ’تحریک تحفظ آئین‘ کے زیر اہتمام پہلے جلسہ عام سے خطاب کرتے ہوئے پاکستان تحریک انصاف کے سیکریٹری جنرل اور قومی اسمبلی میں اپوزیشن لیڈر عمر ایوب خان نے کہا ہے کہ بلوچستان کی ترقی سے پاکستان کی ترقی ہے لیکن حکومت بلوچستان نے پشین کے راستے میں جگہ جگہ ناکے لگائے ہوئے ہیں جہاں سے کارکنوں اور پارٹی کے جھنڈوں کو نہیں چھوڑا جارہا لیکن ہم ملک میں جہاد کے لیے نکلے ہیں یہ جہاد ملک کی آئین اور بالادستی کے لیے ہے اور اس تحریک کے ذریعے اپنا حق لے کر رہیں گے۔

قائد حزب اختلاف نے کہا کہ 9 مئی کی سی سی ٹی وی ویڈیو سے سب عیاں ہو جائے گا، ملک کے عوام ہمیشہ تحریک کو کامیاب بنانے کے لیے پیش پیش رہے، اپوزیشن اتحاد پورے ملک میں جلسے کرے گا، ہر طبقے کے پاس جائیں گے، آئین کی پاسداری ہوئی تو عمران خان اور دیگر قائدین جیلوں سے باہر آسکیں گے۔ اسی جلسہ عام سے خطاب میں بلوچستان نیشنل پارٹی کے سربراہ سردار اختر مینگل نے کہا کہ مرکز میں بنی ہوئی حکومت کو پاکستان کی حکومت نہیں سمجھتا بلکہ یہ حکومت فارم 47 کی حکومت ہے، یہ الیکشن کمیشن کی حکومت ہے،آپ ایک مرغی چور اور موٹر سائیکل چور کو پکڑ سکتے ہیں، ملک کے عوام کا مینڈیٹ چوری کیا گیا، بلوچستان میں ایسے لوگ کامیاب کرائے گئے جن کو ان کے محلے والے نہیں پہچانتے، اسی وجہ سے ملک کے عوام آج بھی بدحال، بے روزگار اور ایک وقت کی روٹی کے لیے ترس رہے ہیں۔

جلسے سے خطاب میں پاکستان تحریک انصاف کے رہنماء شیر افضل خان مروت نے کہا کہ اسٹیبلشمنٹ، بیوروکریسی، عدلیہ، ریٹرننگ افسران نے جمہوریت کا گلہ گھونٹ دیا، پنجاب میں احتجاج شروع کرنے جا رہے ہیں، ہم لاہور میں تاریخی جلسہ کریں گے اور یہ مینڈیٹ اُن کے حلق سے چھین لے گئے اگر خان کی آزادی چاہتے ہوتو ہمارے ساتھ نکلو، تاریخ دلیر اور بزدل دونوں کو نہیں بھولتی۔

انہوں نے کہا کہ بلوچستان سے اسمگلنگ ہورہی ہے، کوئلہ، گاڑیاں، ڈرائی فروٹ کا بھتہ بی ایل اے یا سرکاری اداروں کو جاتا ہے کیوں کہ ايران اور افغانستان سے بلوچستان میں جو سمگلنگ ہوتی ہے اس میں ہمارے ادارے خود ساتھ ملے ہوتے ہیں، آج کوئٹہ سے پشین آتے ہوئے ہر موڑ پہ پولیس کی چار چار گاڑیاں اور ہر جگہ انہوں نے ہمیں روکنا چاہا، آپ کے چمن کے علاقے سے آیا ہوا ایرانی پٹرول میرے لکی مروت سے ہوتا ہوا اسلام اباد پہنچ جاتا ہے لیکن پولیس کا ناکہ کبھی بھی نہیں لگا ہوتا، ہماری ایجنسیوں اور پولیس نے جتنا زور آج جلسہ ناکام بنانے میں لگایا اگر اتنا زور یہ اسمگلنگ ناکام بنانے میں لگاتے تو بلوچستان ترقی یافتہ ہوتا۔