نیشنل بینک آف پاکستان کا اپنے تمام ڈیٹا کو مزید محفوظ بنانے کے لیے ڈیل ای ایم سی سے معاہدہ

منگل 9 اکتوبر 2018 23:45

کراچی۔ (اُردو پوائنٹ اخبارتازہ ترین - اے پی پی۔ 09 اکتوبر2018ء) نیشنل بینک آف پاکستان نے اپنے تمام ڈیٹا کو مزید محفوظ بنانے کے لیے ڈیل ای ایم سی سے معاہدہ کیا ہے۔ میگا پلس پہلے سے ہی نیشنل بینک آف پاکستان کے ساتھ بیک اپ سولوشن کے پروجیکٹ پر کام کررہا ہے۔ اب میگا پلس کے ساتھ ڈیل ای ایم سی بھی ڈیٹا کو محفوظ بنانے کے عمل میں شراکت دار ہوگا۔

ڈیل ای ایم سی کے ساتھ معاہدہ پر دستخط کرنے کی تقریب نیشنل بینک ہیڈ آفس میں ہوئی جس میں نیشنل بینک کے صدر طارق جمالی ، بینک کے آئی ٹی کے سربراہ شاہد سعید، ڈیل ای ایم سی کے نوید سراج ، میگا پلس کے سربراہ عاصم بخاری اور بینک کے انفرا اسٹرکچر اور ٹیکنالوجی ڈویڑن کے صدر شاہ نواز خان بھی موجود تھے۔ اس موقع پر خطاب کرتے ہوئے نیشنل بینک کے چیف انفارمیشن آفیسر سینئر ایگزیکٹو وائس پریذیڈینٹ شاہد سعید نے خطاب کرتے ہوئے کہا کہ بینک آئی ٹی کے شعبے میں بھاری سرمایہ کاری کررہا ہے تاکہ آئی ٹی بینکنگ کو مکمل طور پر اختیار کیا جاسکے۔

(جاری ہے)

انہوں نے کہا کہ بینک اپنے کھاتہ داروں کو بہتر سے بہتر سہولیات کے لیے انسانی وسائل اور ٹیکنالوجی کے حصول پر مزید سرمایہ کاری کرنے کا عزم رکھتا ہے۔ انہوں نے کہا کہ ڈیٹا کی حفاظت بینک کی پہلی ترجیح ہے تاکہ صارفین کی حساس معلومات کا تحفظ یقینی بنایا جاسکے۔ انہوں نے بتایا کہ کسی ناگہانی کی صورت میں اگر صارفین کا ڈیٹا غائب ہوجائے تو بیک اپ سولوشن کے تحت اسے دوبارہ حاصل کرنا ممکن ہوگا۔

میگا پلس کے سربراہ عاصم بخاری نے کہا کہ میگا پلس اور ڈیل ای ایم سی پاکستان میں صف اول کے شراکت دار ہیں اور کئی کلیدی پروجیکٹس پر کام کررہے ہیں۔ ڈیل ای ایم سی کے سربراہ نوید سراج نے کہا کہ ان کی فرم کا اپنے شراکت دار میگا پلس کے ساتھ نیشنل بینک کو بہترین ٹیکنالوجی کے ساتھ ساتھ مسائل کے فوری حل کا عزم رکھتی ہے۔ نیشنل بینک کے آئی ٹی کے شعبہ کے سربراہ شاہ نواز خان نے اپنے خطاب میں کہا کہ صارفین کے ڈیٹا کو محفوظ رکھنا اور کسی وجہ سے غائب ہونے کی صورت میں اس کی ریکوری ایک چیلنج ہے۔