پاک ‘بھارت بزنس کونسل کے رہنما نور محمد قصوری کی سی فوسٹر کو پاک ‘امریکہ بزنس ڈویلپمنٹ فورم ہیوسٹن چیپٹر کا چیئرمین بننے پر مبارکباد

بدھ 17 اکتوبر 2018 13:51

لاہور(اُردو پوائنٹ اخبارتازہ ترین - اے پی پی۔ 17 اکتوبر2018ء) پاک ‘بھارت بزنس کونسل کے رہنما نور محمد قصوری نے امریکی امیگریشن اٹارنی چارلس سی فوسٹر کو امریکہ پاکستان بزنس ڈویلپمنٹ فورم ہیوسٹن چیپٹر کا چیئرمین بننے پر مبارکباد پیش کی ہے، فورم کے ترجمان اختر شاہین رند کے مطابق ان کی ہیوسٹن میں فوسٹر ایل ایل بی کے نام سے اپنی لاء کمپنی بھی ہے۔

یہ فورم ویلس ٹیکساس میں پہلی بار قائم کیے گئے انٹرنیشنل کرکٹ سینٹرڈ ملٹی اسپورٹس کمپلیکس (آئی سی سی ایم سی ) کے تحت وجود میں آیا ہے۔ اس کے بانی معروف پاکستانی نژاد بزنس مین نوید عیسیٰ ہیں۔ فوسٹر کو چیمبرز اینڈ پارٹنرز، ٹیکساس کے ماہنامہ میگزین اور امریکن امیگریشن لاء فاؤنڈیشن کی جانب سے ان کی خدمات پر کئی بڑے ایوارڈز سے نوازا جا چکا ہے۔

(جاری ہے)

وہ ٹیکساس میں حکومت تھائی لینڈکے اعزازی قونصل جنرل کے طور پر خدمات انجام دے چکے ہیں، انہیں تھائی لینڈ کے بادشاہ کنگ بھومی بول ایڈل یادیج کی جانب سے چار شاہی اعزازات سے بھی نوازا گیا ہے۔ اس کے علاوہ چارلس سی فوسٹر ماضی میں 2001 میں ڈپارٹمنٹ آف جسٹس کے لیے بش، چینی صدارتی ٹرانزیشن کمیٹی کے رکن ، 2000 اور 2004 میں صدارتی مہم کے دوران جارچ ڈبلیو بش کے سینئر امیگریشن پالیسی ایڈوائزر اور 2008 میں باراک اوباما کی صدارتی مہم میں امیگریشن پالیسی مشاورتی کردار کے طور پر بھی خدمات انجام دے چکے ہیں۔

اس کے علاوہ یو ایس ہاؤس اور امیگریشن پر سینیٹ کی قائمہ کمیٹیوں میں بھی اپنی ماہرانہ رائے ریکارڈ کرا چکے ہیں۔نور محمد قصوری نے کہا کہ ان کے بطور چیئرمین پاکستان بزنس ڈویلپمنٹ فورم ہیوسٹن تعیناتی سے پاکستانیوں کے مسائل کے حل میں نہ صرف مدد ملے گی بلکہ پاکستانیوں میں احساس تحفظ اور بنیادی انسانی حقوق کی بہتر پاسداری کی حوصلہ افزائی بھی ہو گی۔