آل پاکستان انجمن تاجران کا چیئرمین ایف بی آر کے اقدامات کا خیر مقدم

تجارتی مراکز میں پارکنگ انتظامات ، سکیورٹی تعینات کی جائے، مرکزی صدر اشرف بھٹی سے وفد کی ملاقات

آل پاکستان انجمن تاجران کا چیئرمین ایف بی آر کے اقدامات کا خیر مقدم
لاہور (اُردو پوائنٹ اخبارتازہ ترین - اے پی پی۔ 15 مئی2019ء) آل پاکستان انجمن تاجران کے صدر اشرف بھٹی نے چیئرمین ایف بی آر کی جانب سے کاروباری مراکز ،دفاتر پر چھاپوں اور پیشگی اطلاع دیئے بغیر بینک اکائونٹس منجمدکرنے پر پابندی عائد کرنے کا خیر مقدم کرتے ہوئے کہا ہے کہ ٹیکس دہندگان کا اعتماد بحال کرنے اور نئے لوگوں کو ٹیکس نیٹ میں لانے کیلئے اس طرح کے اقدامات نا گزیر ہیں، معیشت کو دستاویزی کر کے مربوط ڈیٹا مرتب کیا جائے ۔

ان خیالات کا اظہارا نہوں نے اپنے دفتر میں ملاقات کیلئے آنے والے تاجروں کے وفد سے گفتگو کرتے ہوئے کیا ۔ اس موقع پر تجارتی مراکز میں پارکنگ اور سکیورٹی مسائل بارے بھی تبادلہ خیال کیا گیا ۔ اشرف بھٹی نے کہا کہ ہمارا مطالبہ ہے کہ عید الفطر کی خریداری کیلئے آنے والوں کیلئے پارکنگ انتظامات اور پولیس سکیورٹی تعینات کرنے کیلئے فی الفور اقدامات کئے جائیں ۔

(جاری ہے)

انہوں نے مزید کہا کہ مختلف ممالک نے ٹیکس نظام میں اصلاحات اور ای ٹیکسیشن کے ذریعے اپنی آمدنی میں اضافہ کیا ہے لیکن بد قسمتی سے ہم ابھی تک فرسودہ نظام سے چھٹکارا حاصل نہیں کر سکے ، نئے تعینات ہونے والے چیئرمین ایف بی آرکی جانب سے مثبت اقدامات اٹھائے گئے ہیں جن کا تاجر برادری خیر مقدم کرتی ہے لیکن انہیں چاہیے کہ ٹیکس دینے والوں کو درپیش مسائل سے آگاہی کیلئے ملاقاتوں کا سلسلہ شروع کریں اور ان سے تجاویز لی جائیں ،ٹیکسیشن کے نظام کو سہل بنایا جائے اور اپنے افسران اور ملازمین کیلئے بھی سخت مانیٹرنگ کی پالیسی لائی جائے، ٹیکس کی شرح میں کمی کی جائے ، ٹیکس دینے والوں کو عزت و احترام دیا جائے اور انہیں یوٹیلٹی بلز سمیت دیگر مدوں میں ریلیف دیا جائے ۔

Your Thoughts and Comments