ایشیائی ترقیاتی بینک نے پاکستان کیلئے 200 ملین ڈالر کے قرض کی منظوری دیدی

ایشیائی ترقیاتی بینک پاکستان کو 3سال میں7 ارب ڈالر دیگا: نائب صدر ایشیائی ترقیاتی بینک شی زن کا اعلان

عثمان خادم کمبوہ پیر 7 اکتوبر 2019 19:41

ایشیائی ترقیاتی بینک نے پاکستان کیلئے 200 ملین ڈالر کے قرض کی منظوری دیدی

اسلام آباد (اُردو پوائنٹ اخبارتازہ ترین۔ 07 اکتوبر2019ء) ایشیائی ترقیاتی بینک نے بینظیر انکم سپورٹ فنڈ کیلئے 20 کروڑ ڈالر کے اضافی قرض کی منظوری دیدی ۔ ایشیائی ترقیاتی بینک کے اعلامیہ کے مطابق اے ڈی بی کی طرف سے فراہم کردہ رقم غریب افراد کی نقد امداد کے علاوہ ادارہ جاتی بہتری کے منصوبوں میں استعمال کی جائے گی ۔اعلامیہ کے مطابق قرض کی رقم سے بی آئی ایس پی میں نقد امداد کی بہتر تقسیم کیلئے ریسرچ یونٹ بھی قائم کیا جائیگا۔

اعلامیہ میں کہاگیاکہ بینظیر انکم سپورٹ پروگرام 50 لاکھ خاندانوں کی مالی کفالت کرتا ہے ،پروگرام کے تحت اب تک 3 ارب 60 کروڑ ڈالر کی رقم تقسیم کی جا چکی ۔ اس کے علاوہ ایشیائی ترقیاتی بینک کے نائب صدرشی زن چن نے کہا ہے کہ آئندہ 3 سال میں پاکستان کو 7 ارب ڈالر مالیت کی معاونت فراہم کی جائے گی۔

(جاری ہے)

شی زن چن نے 2 روزہ دورہ پاکستان کے اختتام پرجاری ہونے والے بیان میں کہا کہ گزشتہ 5 دہائیوں میں پاکستان اوراے ڈی بی نے بنیادی ڈھانچہ کی تعمیر، برآمدات کے فروغ، نجی شعبہ کی استعداد میں بہتری، سرکاری شعبوں کی کارکردگی میں بہتری اوراصلاحات، ملکی مالیاتی مارکیٹوں کے فروغ اور استحکام اورشہری خدمات کی فراہمی سمیت متنوع شعبوں میں مل کرکام کیا ہے۔

انہوں نے کہاکہ پائیدارترقی کی منزل کے حصول کے ہدف کیلیے پاکستان کی حکومت کے اصلاحات کے ایجنڈا کو کامیاب بنانے میں ایشیائی ترقیاتی بنک پرعزم ہے۔ اس دورے کے دوران کے دوران ایشیائی ترقیاتی بینک کے صدر نے وزیراعظم عمران خان، مشیر خزانہ ڈاکٹرعبدالحفیظ شیخ، وفاقی وزیراقتصادی امورحماداظہر، بے نظیر انکم سپورٹ پروگرام کی چیئرپرسن ڈاکٹرثانیہ نشتر، وفاقی وزیرتوانائی عمرایوب خان، وزیرمنصوبہ بندی مخدوم خسرو بختیار سے ملاقاتیں کیں اور بینک کے تعاون سے جاری مختلف منصوبوں کا دورہ بھی کیا۔