رواںمالی سال میں دودھ، کریم اور نوزائدہ بچوں کی خوراک کیلئے استعمال ہونے والے دودھ کی درآمدات میںسب سے زیادہ کمی

اتوار 8 دسمبر 2019 09:55

اسلام آباد ۔ (اُردو پوائنٹ اخبارتازہ ترین - اے پی پی۔ 08 دسمبر2019ء) جاری مالی سال میں فوڈ گروپ میں سب سے زیادہ کمی دودھ، کریم اور نوزائیدہ بچوں کی خوراک کیلئے استعمال ہونے والے دودھ کی درآمدات میں ہوئی اور درآمدات کا حجم میں33.41 فیصد یعنی 2 کروڑ 40 لاکھ 29 ہزار ڈالر تک کم ہو گیا۔ ادارہ برائے شماریات پاکستان (پی بی ایس) کی رپورٹ کے مطابق جولائی تا اکتوبر 2019ء کے دوران درآمدات کا حجم 4 کروڑ 78 لاکھ 94 ہزار ڈالر تک کم ہو گیا جبکہ گذشتہ مالی سال کے اسی عرصہ کے دوران 7 کروڑ 19 لاکھ 23 ہزار ڈالر کی درآمدات کی گئی تھیں۔

اسی طرح فوڈ گروپ میں دوسرے نمبر پر چائے کی درآمدات میں 28.16 فیصد کمی ہوئی اور درآمدات کا حجم جولائی تا اکتوبر 2018ء کی درآمدات 19 کروڑ 84 لاکھ 68 ہزار ڈالر کے مقابلہ میں جولائی تا اکتوبر 2019ء میں 14 کروڑ 25 لاکھ 71 ہزار ڈالر تک کم ہو گیا۔

(جاری ہے)

اس طرح مالی سال کے پہلے چار ماہ کے دوران صرف چائے کی درآمدات کی مد میں 5 کروڑ 58 لاکھ 97 ہزار ڈالر کے قیمتی زرمبادلہ کی بچت ہوئی ہی. پی بی ایس کے اعدادوشمار کے مطابق رواں مالی سال کے دوران چینی اور دالوں کی درآمدات میں بھی 26.55 اور 23.33 فیصد کی نمایاں کمی ریکارڈ کی گئی ہے۔

رپورٹ کے مطابق جولائی تا اکتوبر 2018ء کے دوران چینی کی درآمدات 11 لاکھ 94 ہزار ڈالر رہی تھیں جو جاری مالی سال میں جولائی تا اکتوبر 2019ء کے دوران 8 لاکھ 77 ہزار ڈالر تک کم ہو گئیں جس سے 3 لاکھ 17 ہزار ڈالر کے زرمبادلہ کی بچت ہوئی اور اسی طرح دالوں کی درآمدات میں بھی 4 کروڑ 71 لاکھ 83 ہزار ڈالر کے زر مبادلہ کی بچت ہوئی اور درآمدات کا حجم جولائی تا اکتوبر 2018ء کی درآمدات 20 کروڑ 22 لاکھ 44 ہزار ڈالر کے مقابلہ میں جولائی تا اکتوبر 2019ء کے دوران 15 کروڑ 50 لاکھ 61 ہزار ڈالر تک کم ہو گیا۔

اقتصادی تجزیہ کاروں نے کہا ہے کہ اندرون ملک پیدا ہونے والی اجناس اور مصنوعات کی غیر ضروری درآمدات کی حوصلہ شکنی سے نہ صرف تجارتی خسارہ کو کم کرنے میں مدد ملے گی بلکہ اس سے قومی معیشت کی ترقی کے مطلوبہ اہداف کے حصول کو بھی یقینی بنایا جا سکے گا۔