پاکستان کی مجموعی قومی پیداوار میں برآمدات کا تناسب 10فیصد سے بھی کم ہے،پاکستان کارپٹ مینو فیکچررز اینڈ ایکسپورٹرز ایسوسی ایشن

ہفتہ 22 فروری 2020 14:06

لاہور (اُردو پوائنٹ اخبارتازہ ترین - اے پی پی۔ 22 فروری2020ء) پاکستان کارپٹ مینو فیکچررز اینڈ ایکسپورٹرز ایسوسی ایشن نے کہا ہے کہ پاکستان کی مجموعی قومی پیداوار (جی ڈی پی) میں برآمدات کا تناسب 10فیصد سے بھی کم ہے جو عالمی معیار سے مطابقت نہیں رکھتا، برآمدات کے فروغ کیلئے اسٹیک ہولڈرزکی مشاورت سے موثر اورطویل المدت پالیسیاں تشکیل دینا ناگزیر ہے جس میںوفود کی سطح پر تبادلے، سنگل کنٹری نمائشوںکا انعقاد اور سفارتخانوں کیلئے اہداف شامل ہیں ۔

ایسوسی ایشن کا اجلاس ہفتہ کو منعقد ہوا جس میں چیئر پرسن کارپٹ ٹریننگ انسٹی ٹیوٹ پرویزحنیف، وائس چیئرمین شیخ عامر خالد سعید، سینئر مرکزی رہنما عبد الطیف ملک، سینئر ممبر ریاض احمد، سعیدخان، محمداکبر ملک، اعجاز الرحمان، میجر(ر) اخترنذیر سمیت انڈسٹری سے وابستہ دیگر نمائندے شریک ہوئے۔

(جاری ہے)

اجلاس کے شرکاء نے اس بات پر زور دیا کہ برآمدات میں اضافے کیلئے فی الفور برآمدی شعبے کے اسٹیک ہولڈرز اور حکومتی نمائندوں پر مشتمل اعلیٰ سطحی کمیٹی تشکیل دی جائے جوبرآمدات میں دنیا کے کامیاب ممالک کو سٹڈی کرکے سفارشات مرتب کرے ان پر من و عن عملدرآمدکیا جائے ۔

محمد اسلم طاہر نے کہاکہ عالمی نمائشوںمیں پاکستانی برآمدکنندگان اور سٹالز کی تعدادکم ہوتی جا رہی ہے جس سے روایتی حریف اور خطے کے دیگر ممالک بھرپور فائدہ اٹھا رہے ہیں ۔ برآمدات میں اضافہ کئے بغیر ہم معیشت کو ترقی نہیں دے سکتے اس لئے ایمرجنسی کی طرز پر اقدامات اٹھانے کی ضرورت ہے۔ انہوں نے کہاکہ وزیر اعظم عمران خان کے واضح اعلانات کے باوجود آج بھی برآمدی شعبے کے کئی دیرینہ مسائل حل طلب ہیں لیکن اب وقت آ گیا ہے کہ اعلانات سے آگے بڑھ کرعملی اقدامات اٹھائے جائیں، وزیراعظم عمران خان برآمدات سے متعلق فیصلوںپر عملدرآمد کیلئے خود مانیٹرنگ کریں اور ہر ماہ جائزہ اجلاس بلایا جائے۔

انہوں نے کہا کہ ایک وقت میں ہاتھ سے بنے ہوئے قالینوں کی برآمدات میں پاکستان کو عروج حاصل تھا لیکن آج یہ صنعت تنزلی کا شکار ہے، اسے دوبارہ عروج دینے کے لئے حکومتی سرپرستی اور معاونت کی اشد ضرورت ہے۔