قیمی پتھروں سے متعلق وزیراعظم کی ٹاسک فورس کا اجلاس،

شعبے میں متعلقہ فریقین کی فعال شرکت اور برآمدات میں اضافے کے طریقوں پر غور

جمعہ 18 ستمبر 2020 15:53

اسلام آباد (اُردو پوائنٹ اخبارتازہ ترین - اے پی پی۔ 18 ستمبر2020ء) قیمی پتھروں سے متعلق وزیراعظم کی ٹاسک فورس کا اجلاس چیئرمین گل اصغر خان کی زیر صدارت یہاں منعقد ہوا۔ اجلاس میںاس شعبے میں تمام متعلقہ فریقین کی فعال شرکت اور برآمدات میں اضافے کے لئے مختلف طریقوں پر غور کیا گیا۔ ٹاسک فورس کے چیئرمین نے اجلاس میں ملک میں قیمتی پتھروں کے شعبے میں پائی جانے والی استعداد، اس صنعت کو درپیش مسائل اور سرمایہ کار دوست ماحول کے فروغ کے لئے کئے جانے والے اقدامات سے شرکا کو آگاہ کیا۔

انہوں نے کہا کہ وزیر اعظم عمران خان کا وژن ہے کہ قیمتی پتھروں کی برآمدات میں اضافہ کیاجائے۔ ٹاسک فورس کو قیمتی پتھروں کے شعبے کی ترقی کے لئے سہولت فراہم کرنے اور رابطے کی ذمہ داری تفویض کی گئی ہے۔

(جاری ہے)

ٹاسک فورس میں فوکل پرسن وزارت اوورسیز پاکستانی و ہیومن ریسورس ڈویلپمنٹ عاطف اقبال، ٹاسک فورس کے شریک چیئرمین/ سی ای او اکواجیمز ذیشان خان، ڈائریکٹر جنرل منرلز پٹرولیم ڈویژن، معدنیات کے صوبائی سیکرٹری، تجارت و صنعت و پیداوار کی وزارتوں، سٹیٹ بینک، ایف بی آر، سرمایہ کاری بورڈ، کاروباری برادری اور بین الاقوامی سطح کے ماہرین شامل ہیں۔

اجلاس میں اس امر پر زور دیا گیا کہ سرمایہ کاروں کے لئے اس شعبے میں ون ونڈو آپریشن کے ذریعے کاروبار میں آسانی پیدا کرنے اور اسلام آباد میں ایک ماڈل جم سٹون و جیولری سٹی قائم کیا جانا چاہیے۔ اجلاس کے شرکا نے دیہی علاقوں میں اس شعبے کے ذریعے روزگار کے مواقع پیدا کرنے اور اقتصادی اہمیت پر زور دیا۔ اجلاس میں مختلف ورکنگ گروپس بھی قائم کئے گئے۔ کاروباری شعبے سے تعلق رکھنے والے اجلاس کے شرکا نے تام متعلقہ فریقین کو ایک فورم پر اکٹھا کرنے کے حوالے سے حکومت کے اقدام کو سراہا۔ ٹاسک فورس 60 دن میں اپنی سفارشات پیش کرے گی۔