زراعت ہمارے ملک کی معیشت میں ریڑھ کی ہڈی کی حیثیت رکھتی ہے،بھرپور توجہ دیکر غذائی ضروریات پوری کرسکتے ہیں، سید بازل نقوی

فیصل آباد ( اُردو پوائنٹ تاز ترین اخبار۔ 12جولائی 2014ء)وزیر اطلاعات ،زراعت ولائیو سٹاک سید بازل علی نقوی کا فیصل آباد زرعی یونیورسٹی کا دورہ ،زرعی کانفرنس میں شرکت،وزیر زراعت و لائیوسٹاک کی تجاویز کو شرکاء نے بہت پذیرائی دی ،ڈاکٹر مختار حسین نے والہانہ استقبال کیا ،یونیورسٹی کے مختلف شعبوں کا دورہ ،زرعی ماہرین سے مختلف ایشوز پر تبادلہ خیال ،کانفرنس سے خطاب کرتے ہوے وزیر زراعت ولائیو سٹاک سید بازل علی نقوی نے کہا کہ زراعت ہمارے ملک کی معیشت میں ریڑھ کی ہڈی کی حیثیت رکھتی ہے جس پر بھرپور توجہ دیکر ہی نہ صرف ہم اپنی غذائی ضروریات پوری کر سکتے ہیں بلکہ اس سے معیشت کا پہیہ بھی تیز ی سے حرکت کرے گا ۔

انہوں نے تجویز دی کہ چاروں صوبوں ،گلگت بلتستان اور آزادکشمیر کے زرعی ماہرین پر مشتمل ایک ایڈوائزری کونسل بنائی جائے جو ایک ماہ میں اپنی رپورٹ پیش کرے ۔

(جاری ہے)

انہوں نے کہا کہ اس رپورٹ کے مطابق زراعت کے شعبے میں آئندہ پانچ سال کی حکمت عملی طے کی جائے ۔انہوں نے کہا کہ ہمیں جنگی بنیادوں پر اپنے زراعت کے شعبے کو جدید خطوط پر استوار کرنے کی ضرورت ہے کیونکہ اس شعبے میں ترقی کے بغیر اہداف کا حصول ایک مشکل امر ہے ۔

انہوں نے شرکاء سے کہا کہ میں نے جب سے آزادکشمیر کے وزیر زراعت و لائیو سٹاک کا منصب سنبھالا ہے میں نوجوانوں کو موٹیویٹ کرتا رہتا ہوں کہ وہ نوکریوں کی تلاش میں وقت ضائع کرنے کی بجائے اپنی زمینداری پر توجہ دیں ،کچن گارڈننگ کو فروغ دیں ،مرغیاں پالیں اور جانوروں کی افزائش پر توجہ مرکوز کریں ،اس سے فائدہ یہ ہوگا کہ وہ کئی بیماریوں سے دور رہیں گے نہ صرف اپنا بلکہ اپنے خاندان کو پیٹ بھی پالیں گے اور کسی کو روزگار دینے کے قابل بھی ہو جائیں گے ۔

انہوں نے کہا کہ ہمیں اس شعبے کے لوگوں کو دو حصوں میں تقسیم کرنا ہوگا ایک وہ ہیں جو اپنے اپنے شعبے کے ماہر ہیں اور تحقیق میں اپنا وقت صرف کر رہے ہیں یہ ہمارے نہایت پروفیشنلز لوگ ہیں ہمیں نہ صرف ان کو معاشرے میں جائز مقام دینا ہوگا بلکہ ان کی صلاحیتوں سے فائدہ اٹھا نے کیلئے بھی کوششیں کرنا ہوں گی ،دوسرا طبقہ وہ ہے جس کو فیلڈ میں کام کرنے کی ضرورت ہے یہ جتنے فعال ہوں گے اتنا ہی یہ لوگوں کو اس جانب راغب کر سکیں گے ہمیں نہ صر ف انکو موٹیویٹ کرنے کی ضرورت ہے بلکہ ان میں یہ سوچ پیدا کرنا ہوگی کہ یہ اپنے فرائض مشن سمجھ کر انجام دیں۔

انہوں نے شرکاء سے کہا کہ میڈیا میں بھی اس حوالے سے کام کرنے کی ضرورت ہے ۔انہوں نے بتایا کہ پی پی پی کی حکومت نے وزیر اعظم چوہدری عبدالمجید کی قیادت میں زرعی ترقی کے حوالے سے کئی اقدامات کئے جن میں لائیو سٹاک اور زراعت کیلئے قرضہ جات کا حصول بھی شامل ہے۔انہوں نے کہا زرعی اور لائیو سٹاک کی ترقی کے حوالے سے ویژ ن 2020 بھی متعارف کروایا گیا ہے جس کا نعرہ اپنا اگاو اور اپنا کھاؤ ہو گا اس کا بڑا مقصد نوجوانوں کو اس جانب لانا ہے ۔

انہوں نے کہا میں نے محکمے کو واضح ہدایت دی ہے کہ زراعت ولائیو سٹاک کے حوالے سے قرضہ جات انہیں دئیے جائیں جو اس شعبے میں کام کریں میں خود ہر قرضے کا جائزہ لوں گا تاکہ اس کا صیحیح استعمال یقینی بنایا جائے ۔انہوں نے پاکستان میں زرعی شعبے میں فیصل آباد زرعی یونیورسٹی کے تحقیقی کام اور کوششوں کا سراہا اور زرعی ماہرین کی تعریف کی ۔ا س موقع پر وزیر زراعت کو یادگاری شیلڈ بھی دی گئی ۔