آزاد کشمیر میں سیاحت کو فروغ دے کر بھاری زر مبادلہ کمایا جا سکتا ہے ،چوہدری محمدیاسین

برلن( اُردو پوائنٹ اخبار تازہ ترین۔3 نومبر 2014ء ) آزادکشمیر کے سینئروزیرووزیرلوکل گورنمنٹ وپاور ڈویلپمنٹ آرگنائزیشن چوہدری محمدیاسین نے کہاہے کہ حکومت آزاد کشمیر اس خطہ میں سیاحت ،ہائیڈرل اور معدنیات کی صنعتوں کو فروغ دینے کیلئے نئی حکمت عملی طے کی ہے اس سلسلے میں بیرون ممالک کے سرمایہ کاروں کو خصوصی مراعاتی پیکج دینے کا اعلان کر رکھا ہے اس سلسلے میں بیرون ممالک میں کشمیری صنعتکاروں کو خصوصی ٹاسک دیا گیا ہے کہ وہ بیرون ممالک کے سرمایہ کاروں کو آزاد کشمیر کا دورہ کروائیں ،آزاد کشمیر میں سیاحت کو فروغ دے کر بھاری زر مبادلہ کمایا جا سکتا ہے ۔

آزاد جموں و کشمیر کے سینئر وزیر چودھری محمد یٰسین گزشتہ روز مختصر دورے پر جرمنی کے دارالحکومت برلن پہنچے جہاں پر ممتاز کشمیر صنعتکاروں اور پیپلز پارٹی جرمنی کے صدر چودھری رحمان ،سجاد نقوی ،چودھری نثار،چودھری شبیر اور دیگر نے انکا شاندار استقبال کیا ،سینئر وزیر کے اعزاز میں دوسرے روز یہاں برلن میں تارکین وطن کشمیری اور پاکستانی کمیونٹی نے شاندار استقبالیہ دیا جس میں سینکڑوں افراد نے شکرت کی سینئر وزیر چوہدری محمد یٰسین نے برلن میں کشمیر ی کمیونٹی اور وہاں کے صنعت کاروں سیکی جانب سے دیئے گئے عشائیہ سے خطاب کرتے ہوئے کہا کہ حکومت آزادکشمیر اس خطہ کو ترقی دینے کیلئے بیروں سرمایہ کاروں کیلئے ایک خصوصی مراعاتی پیکج کا اعلان کیا ہے، سرمایہ کار اس پیکج سے فائدہ اٹھائیں ،حکومت بیرون سرمایہ کاروں کو مکمل تحفظ فراہم کرے گی۔

(جاری ہے)

انہوں نے کہاکہ آزاد کشمیر میں قائم پیپلز پارٹی کی حکومت مشنری جذبے کے تحت کام کر رہی ہے مفاہمتی پالیسی کوجاری رکھتے ہوئے اپوزیشن کے اراکین کو حکومتی اراکین کے برابر مراعات دینے کی پالیسی پرگامزن ہے ہم تعمیروترقی کے ذریعے آزادکشمیرکو ایک حقیقی فلاحی سٹیٹ بناناچاہتے ہیں اس کیلئے اپوزیشن حکومت کاساتھ دے تاکہ ہم بڑے بڑے میگاپراجیکٹس کی تکمیل کرسکیں ۔

انہوں نے کہاکہ یہ میگاپراجیکٹس صرف پیپلزپارٹی کے کارکنوں کیلئے نہیں بلکہ یہ آزادکشمیر کے عوام کے زیراستعمال ہوں گے ۔انہوں نے کہاکہ پیپلزپارٹی کے کوچےئرمین آصف علی زرداری اورآزاد کشمیر سیاسی امورکی انچارج محترمہ فریال تالپور کے ویژن کے مطابق آزادکشمیرمیں تعمیروترقی کے منصوبوں کا جال پھلایاجارہاہے ۔پیپلزپارٹی کی پارلیمانی پارٹی متحدومتفق ہے۔

ہم آزادکشمیر کی تعمیروترقی کیلئے جانفشانی سے کام میں مصروف ہیں دوسال کے عرصہ میں آزادکشمیر کے تمام میگاپراجیکٹس مکمل ہوجائیں گے ا س کے علاوہ آزادکشمیرمیں توانائی کے بحران کوختم کرنے کیلئے ایک درجن سے زائد ہائیڈل کے منصوبوں پرکام جاری ہے ۔ ان پراجیکٹس سے بجلی کی پیداوارشروع ہوجائے گی2016 ء تک ہم توانائی کے بحران پربڑی حدتک قابوپالیں گے ۔

دریں اثناچودھری محمد یٰسین نے برطانیہ میں پیپلز پارٹی کے جلسے کے حوالے سے بھی پیپلز پارٹی کے رہنماؤں سے گفت و شنید کی اور اس جلسے کو کامیاب بنانے کے لئے پیپلز پارٹی جرمنی کے صدر چودھری رحمان کو ٹاسک دیا اور پی پی جرمنی کے کارکنان سے اپیل کی وہ جلسے کو کامیاب بنانے کے لیے اپنا کردار ادا کریں انہوں نے کہا کہ پیپلز پارٹی کے برطانیہ میں ہونے والے جلسے سے یورپ بھر سے پی پی کارکنان اور عہدیداران شرکت کریں گے انشا ء اللہ پیپلز پارٹی کا یہ جلسہ ایک نئی تاریخ مرتب کرے گا