وزیراعظم مقامی صنعت کو تحفظ دینے کیلئے رعائتی پیکج کو حتمی شکل دینے کیلئے نئے ہفتے کے دوران برآمد کنندگان ، صنعتکاروں اور تاجروں سے ایک بار پھر ملاقات کریں گے ‘ 100 ارب روپے کے ٹیکس ریفنڈ کلیم ایک ہفتے میں ادا کرنے ، جی آئی ڈی سی 100 روپے فی یونٹ ‘بجلی پر چارج ختم کرنے کا اعلان کیا جائیگا

اسلام آباد(اُردو پوائنٹ اخبارتازہ ترین - آئی این پی۔13ستمبر۔2015ء) وزیراعظم نواز شریف مقامی صنعت کو تحفظ دینے کیلئے رعائتی پیکج کو حتمی شکل دینے کیلئے نئے ہفتے کے دوران برآمد کنندگان ، صنعتکاروں اور تاجروں سے ایک بار پھر ملاقات کریں گے ، 100 ارب روپے کے ٹیکس ریفنڈ کلیم ایک ہفتے کے اندر ادا کرنے ، جی آئی ڈی سی 100 روپے فی یونٹ جبکہ بجلی پر چارج ختم کرنے کا اعلان کیا جائے گا ۔

اتوار کو اعلیٰ سطح کے حکومتی ذرائع نے بتایا کہ جمعہ کو برآمد کنندگان ، آل پاکستان ٹیکسٹائل ملزم ایسوسی ایشن کے عہدیداروں اور دیگر صنعتی ایسوسی ایشنوں کے عہدیداروں سے ملاقات کے بعد حکومت نے مقامی صنعت کو تحفظ دینے اور بحران سے نکالنے کیلئے ایک رعائتی پیکج تیار کرلیا ہے تاہم اسے حتمی شکل دینے کیلئے نئے طبقے کے دوران وزیراعظم نواز شریف ان سے دوبارہ ملاقات کریں گے ۔

(جاری ہے)

اس حوالے سے ذرائع کا کہنا ہے کہ حکومت نے اصولی طور پر کیپٹو پاور اسٹیشنوں کیلئے گیس انفراسٹرکچر ڈویلپمنٹ سیس 200 روپے سے کم کرکے 100 روپے فی ایم ایم بی ٹی یو کرنے جبکہ ٹیکسٹائل ملوں و ویلیو ایڈڈ یونٹس کیلئے بجلی پر سرچارج کے خاتمہ کا فیصلہ کرلیا ہے اور حکومت اس پر سبسڈی دے گی ۔ نیز حکومت نے صنعتکاروں و تاجروں کو 100 ارب روپے سیلز ٹیکس و انکم ٹیکس ریفنڈ اور کسٹم ری بیٹ کلیم ایک ہفتے کے اندر ادا کرنے کی یقین دہانی کرائی ہے اور اس حوالے سے ایف بی آر کو کلیموں کی ادائیگی کا عمل تیز کرنے اور شافاف نظام وضع کرنے کی ہدایت جاری کی گئی ہیں جبکہ برآمد کنندگان اور صنعتکاروں نے اس سے اتفاق کیا ہے البتہ حکومت نے ان کے تین بڑے مطالبات ماننے سے یکسر انکار کردیا جن میں روپے کی قدر کم کرنے ، بھارتی دھاگے پر ریگولیٹری ڈیوٹی عائد کرنے اور ٹیکسٹائل ، ہوزری و گارمنٹس کے شعبے کو برآمدات کیلئے زیرو ٹیکس ریٹنگ قرار دینے کے مطالبات شامل ہیں ۔

گزشتہ روز اس حوالے سے آل پاکستان ٹیکسٹائل ملز ایسوسی ایشن کے جنرل سیکرٹری محمد انیس نے بتایا کہ بھارت سے درآمد کیے جانے والے سوتی دھاگے کی وجہ سے مقامی ٹیکسٹائل کی صنعت کو شدید مشکلات پیش آرہی ہیں جبکہ بھارت نے پاکستان دھاگے پر 28 فیصد ڈیوتی عائد کر رکھی ہے ۔ اس طرح ریفنڈ کلیموں کا معاملہ ہے ، ٹیکسٹائل ملزم مالکان کو اپنا پیسہ واپس لینے کیلئے ایف بی آر کے گیٹ پر بھکاریوں کی طرح کھڑا ہونا پڑتا ہے لہٰذا حکومت کو چاہیے کہ ٹیکسٹائل مصنوعات مقامی مارکیٹ میں فروخت کی جاتی ہیں ان کے اوپر تو سیلز ٹیسک وصول کرے تاہم برآمدی صنعت کو زیرو ریٹنگ قرار قرار دیا جائے ۔

اس کے برعکس پاک افغان مشتسرکہ جوائنٹ چیمبر آف کامرس اینڈ انڈسٹری کے مشترکہ صدر زبیر موتی والا کا کہنا تھا کہ اگر بھارتی دھاگے پر ریگولیٹری ڈیوٹی عائد کی گئی تو لاگت بڑھ جائے گی جس سے برآمدات مزید کم ہو جائیں گی ۔ انہون نے کہا کہ ٹیکسٹائل کے شعبے کو زیرو ریٹنگ قرار دیا جائے اور روپے کی قدر کم نہ کرنے کا حکومتی فیصلہ بھی درست نہیں ۔ زبیر موتی والا نے کہا کہ حالیہ دنوں میں چین نے اپنی کرنسی کی قدر کم کی جبکہ وزیر خزانہ اسحق ڈار مسلسل ہٹ دھرمی سے کام لے رہے ہیں ۔ انہو نے مصنوعی طور پر کرنسی کی قدر بڑھا رکھی ہے ۔