صوبہ بھر سے مختلف مدوں میں گزشتہ ماہ تک 11 ارب روپے سے زائد کا ریونیو حاصل کر لیا، لاہور سے 11575ملین روپے کے مقررہ ہدف کا نصف اکٹھا کر لیا گیا ہے، ترجمان محکمہ ایکسائز اینڈ ٹیکسیشن پنجاب

لاہور۔8 دسمبر(اُردو پوائنٹ اخبارتازہ ترین - اے پی پی۔08 دسمبر۔2015ء) محکمہ ایکسائز اینڈ ٹیکسیشن پنجاب نے صوبائی دارلحکومت لاہور سمیت صوبہ بھر کی 9 ڈویژنز سے مختلف مدوں میں 25ارب روپے کے مقررہ ہدف میں سے 30نومبر تک 11 ارب روپے سے زائد ریوینو حاصل کر لیا ،سب سے زیادہ ریونیوموٹروہیکل ٹیکس اورپراپرٹی ٹیکس کی مد میں10 ارب روپے حاصل ہوا،صوبائی دارلحکومت لاہور کے تین ریجنز میں 11575ملین روپے کے مقررہ ہدف میں سے 5480ملین روپے کا ریونیو اکٹھا کیا گیا۔

ایکسائز اینڈ ٹیکسیشن پنجاب کے ترجمان نے اُردو پوائنٹ اخبارتازہ ترین - اے پی پی۔08 دسمبر۔2015ء سے گفتگو کرتے ہوئے بتایا کہ پنجاب بھر کے 9 ڈویژنز میں سے محکمہ نے موٹروہیکل ٹیکس کی مد میں 4911ملین روپے، پراپرٹی ٹیکس کی مد میں4817ملین روپے، ایکسائز ڈیوٹی کی مد میں914ملین روپے،پروفیشنل ٹیکس کی مد میں 330ملین روپے،لگژری ہاؤس ٹیکس کی مد میں ساڑھے 8ملین،کاٹن فیس کی مد میں 138ملین روپے اور انٹر ٹینمنٹ کی مد میں 34ملین روپے ٹیکس وصول کیا گیا۔

(جاری ہے)

انہوں نے مزید بتایا کہ رواں مالی سال میں بہالپور ڈویژن کا کل ہدف 1181 ملین مقرر کیا گیا تھا جس میں سے گزشتہ ماہ اکتوبر تک 435 ملین کا ہدف حاصل کر لیا گیا ہے ، ڈیرہ غازی خان کے رواں مالی سال میں 624 ملین روپے کے ہدف میں سے 241 ملین روپے کا ہدف حاصل کر لیا گیا ہے،اسی طرح فیصل آباد اور گوجرانوالہ کا ہدف بالترتیب 2322 اور 1918 ملین مقرر کیا گیا ہے جس میں سے فیصل آباد 1083 ملین اور گوجرانوالہ میں926 ملین روپے کا ہدف حاصل کیا گیا ہے۔

علاوہ ازیں صوبائی دارلحکومت لاہور کو تین ریجنز میں تقسیم کیا گیا ہے جن کو لاہور اے ،لاہور بی اور لاہور سی کا نام دیا گیا ہے ان کو بالترتیب 2769,2584,6222 ملین روپے کا ہدف دیا گیا تھا جس میں سے لاہور اے میں 1261 ملین روپے،لاہور بی میں 1361 اور لاہور سی میں سے2919ملین روپے کا ہدف حاصل کیا گیا ہے ۔ ترجمان نے بتایاکہ ملتان ڈویژن،روالپنڈی ڈویژن ،ساہیوا ل ڈویژن اور سرگودھا ڈویژن کوبالترتیب 1916,4056,638,778 ملین روپے ٹیکس کا ہدف دیا گیا تھا جس میں سے ملتا ن ڈویژن میں 762ملین، راولپنڈی ڈویژن میں 1597 ملین، ساہیوال ڈویژن میں 273 ملین اور سرگودھا ڈویژن میں گزشتہ ماہ اکتوبر تک352 ملین روپے کا ہدف حاصل کر لیا ہے۔

انہوں نے کہا کہ محکمہ ایکسائز اینڈ ٹیکسیشن حکومت کی ترجیحات کے عین مطابق کام کر رہا ہے اور رواں مالی سال میں 25 ارب روپے ریوینیو کا ہدف پورا کرنے میں کامیاب ہو جائیں گے ۔ترجمان نے بتایا کہ محکمہ ایکسائز اینڈٹیکسیشن پنجاب نے پراپرٹی ٹیکس ڈیفالٹرز سے رقم کی وصولی کیلئے پکڑدھکڑاورٹیکس ڈیفالٹر زکی جائیدادیں سیل کرنے کا عمل شروع کر دیا ہے ۔

ترجمان نے بتایا کہ صوبہ بھر میں محکمہ ایکسائز اینڈٹیکسیشن کو رواں مالی سال کے دوران پراپرٹی ٹیکس کی مد میں ساڑھے8ارب روپے سے زائدکی ریکوری کا ہدف دیا گیا تھا جس میں سے محکمہ نے تقریبا 5ارب روپے کی ریکوری کر لی ہے ، باقی ریکوری کا ہدف رواں مالی سال میں پورا کر لیا جائے گا۔ انہوں نے مزید بتایا کہ محکمہ ایکسائز اینڈٹیکسیشن کو رواں مالی سال کے دوران صرف لاہور میں ساڑھے تین ارب روپے سے زائد کا ہدف دیا گیا تھا جس میں سے محکمہ نے 2ارب روپے سے زائد کی ریکوری کا ہدف پورا کر لیا ہے ،باقی ہدف رواں مالی سال میں پورا کر لیا جائے گا۔