پاکستان بحرین کاروباری مواقع بارے دوسری کانفرنس( کل )سے اسلام آباد میں شروع ہو رہی ہے، پاکستان کو خلیج تعاون کونسل نے آزدانہ تجارتی معاہدہ کرنے کی دعوت دی ہے

اسلام آباد(اُردو پوائنٹ اخبارتازہ ترین - آئی این پی۔ 29 مارچ2017ء) وفاقی وزیر تجارت انجینئر خرم دستگیر خان نے کہا ہے کہ پاکستان بحرین کاروباری مواقع بارے دوسری کانفرنس(کل ) جمعرات سے اسلام آباد میں شروع ہو رہی ہے پاکستان کو خلیج تعاون کونسل نے آزدانہ تجارتی معاہدہ کرنے کی دعوت دی ہے ۔ انہوں نے یہ بات بحرین کے اعلی سطحی وفد کے ساتھ بات چیت کرتے ہوئے کہی جس نے بحرین کے وزیر تجارت و صنعت زائدلزیانی کی قیادت میں وزیر تجارت انجینئر خرم دستگیر خان سے ملاقات کی ۔

وفاقی وزیر نے وفد کا خیر مقدم کرتے ہوئے کہا کہ پاکستان بحرین کے ساتھ اپنے تعلقات کو بڑی اہمیت دیتا ہے ۔ انہوں نے کاروباری مواقع بارے پاکستان بحرین دوسری کانفرنس میں وفد کی شرکت کو سراہا ۔ وزیر انجینئر خرم دستگیر خان نے خلیج تعاون کونسل کے ساتھ آزادانہ تجارتی معاہدوں کے آئیڈیا کی حمایت کی ۔

(جاری ہے)

خلیج تعاون کونسل 6 ممالک پر مشتمل ہے اور کونسل بحرین ، کویت ، اومان ، قطر ، سعودی عرب اور متحدہ عرب امارات پر مشتمل ہے ۔

خرم دستگیر نے وزارت تجارت کے متعلقہ حکام کو خلیج تعاون کونسل معاہدہ کے دائر کار کا مسودہ فوری طور پر خلیجی ممالک کو بھیجنے کی ہدایت کی ۔خرم دستگیر نے کہا کہ پاکستان بحرین کاروباری مواقع بارے اسلام آباد میں آج سے شروع ہونے والی دوسری کانفرنس کی صدارت پاکستان اور بحرین کے وزراء تجارت مشترکہ طور پر کریں گے اور اس سے مزید کاروباری مواقع کے امکانات کی راہ ہموار ہو گی اور دونوں ممالک کے مابین تجارت میں اضافہ ہو گا۔

2015-16ء میں پاکستان اور بحرین کے مابین تجارتی حجم143.10 ملین ڈالر تھا جن میں پاکستان سے 66.47ملین ڈالرز کی برآمدات اور بحرین سے 76.63ملین ڈالرز کی درآمدات شامل ہیں ۔ ملا قات کے دوران زاید الزیانی نے وزیر تجارت کی میزبانی اور پرتپاک خیر مقدم کو سراہا اور تجارت میں اضافہ کیلئے خلیج تعاون کونسل ممالک کے ساتھ آزادانہ تجارتی معاہدہ کی دعوت دی ۔

انہوں نے سٹریٹجک کمیٹی کو فعال بنانے کی ضرورت پر بھی زور دیا۔ زاید الزیانی نے پاکستان کو بحرین میں فوڈ اینڈ کلچرل فیسٹول کے انعقاد کی دعوت بھی دی ۔وزیر تجارت انجینئر خرم دستگیر خان نے بحرینی اپنے ہم منصب کی دعوت کا خیر مقدم کیا اور کہا کہ پاکستان اس سال اکتوبر میں بحرین میں فوڈ اینڈ کلچرل فیسٹول منعقد کرے گا ۔ انہوں نے بحرین کو پاکستان میں تجارتی نمائش کے انعقاد اور اس میں حصہ لینے کی دعوت بھی دی ۔ قبل ازیں وفد نے وزیر اعظم پاکستان سے ملا قات کی اور بورڈ آف انویسٹمنٹ پاکستان کا دورہ کیا ۔