کرسمس

فرزانہ چودھری :
مسیحی برادری دنیا بھر میں کرسمس کاتہوار یسوع مسیح کی پیدائش کی یاد میں ہر سال 25دسمبر کو مناتی ہے ، دسمبر کا مہینہ شروع ہوتے ہی کرسمس تقریبات کاآغاز ہوجاتا ہے ۔ ان تقریبات میں کرسمس کیک کاٹنا‘ کرسمس ٹری سجانا اور سانتا کلاز کا بچوں میں تحائف بانٹنا‘ کینڈل لائٹ سروس کا انعقاد اور کرسمس کی خصوصی کیزلز گیت گانا خاص اہمیت کے حامل ہیں۔

کرسمس کارڈ بھیجنے کاسلسلہ نومبر کے وسط سے شروع ہوجاتا ہے جو کہ ایک اچھی روایت سمجھا ہے ۔ کرسمس کیک کاسلسلہ 16دسمبر سے نیوائیرتک جاری رہتا ہے ۔ شمالی امریکہ ‘ جرمنی ‘ یورپ اور پاکستان سمیت دنیا بھر میں کرسمس ٹری کو کرسمس سیزن کے آغاز اور زندگی کی علامت تصور کیاجاتا ہے ۔

(جاری ہے)

کرسمس ٹری ایروکیریاکا پودا ہے ۔ اس کااصل وطن یورپ ہے ، یہ سرد ماحول میں پھلتا پھولتا ہے اور اسے خوشحالی کی علامت تصور کیاجاتا ہے ۔

جرمنی اور برطانیہ میں کرسمس ٹری کو مذہب کے ساتھ وابستہ کرنے کی روایت پانچ سوسال سے زیادہ پرانی ہے ۔ اس کاآغاز جرمنی سے ہوا بعد میں یہ رسم یورپ کے دیگر ملکوں میں بھی اختیار کرلی گئی ۔ برطانیہ میں پہلا کرسمس ٹری ملکہ وکٹوریہ کے شوہر پرنس البرٹ نے 1841 ء میں ونڈسرمحل میں سجایاانہوں نے اس درخت میں موم بتیاں ٹافیاں اور کئی قسم کے پھل سجائے اس کے بعد ملک کے دیگر امیر لوگوں نے بھی اس کی پیروی کی ۔

1850 ء میں عظیم ناول نگار ۔ چارلس ڈکنز، نے کرسمس ٹری کوکھلونوں ‘ چھوٹے چھوٹے سازوں ‘ ٹافیوں اور پھلوں سے سجایا تھا۔ امریکہ میں پہلا کرسمس ٹری 1830 میں سجایا گیا تھا جسے جرمنی کے آباد کاروں نے ایک چرچ کے لئے چنداجمع کرنے کے لئے عمارت کے باہر رکھا تھا۔ پاکستان میں بھی کرسمس ٹری سجانے کا رواج مقبول ہوچکا ہے اور ہر مسیحی گھر میں کرسمس ٹری خوبصورتی سے سجا ہوا نظر آتا ہے ۔

کرسمس ٹری کوسجانے کی ذمہ دارخاص طور پر بچوں کے سپرد ہوتی ہے ۔ کرسمس کی روایت میں گرجا گھروں میں چرنی کو سجانا اور گھروں کی چھتوں اور گرجا گھروں میں ستارے روشن کرنا بھی شامل ہے ۔ مسیحی خاندانوں میں 24 دسمبر کی رات کرسمس ٹری کے پاس بچوں کے نام تحائف رکھ دئیے جاتے ہیں اس موقع پر غریب اور مستحق لوگوں میں تحائف بھی تقسیم کئے جاتے ہیں ۔

کتھیڈرل چرچ مال روڈ میں کرسمس منانے کی تیاریاں عروج پر ہیں کرسمس ٹری بہت خوبصورت سجایاگیا ہے ۔ بچے رنگ برنگے ملبوسات میں ملبوس ہیں۔ خواتین اور بچیاں ست رنگی پہناؤے زیب تن کیے ہوئے ہیں ان کے ہاتھ مہندی کے خوبصورت ڈیزائنوں سے آراستہ ہیں اور ان کی کلائیوں میں کھٹکتی چوڑیاں ان کی عید کی خوشیوں کو دوبالا کررہی ہے ۔ ہر چہرہ نوشی سے دمک رہا ہے جیسے چرچ کے آگن میں بہار اتر آئی ہو۔

سانتا کلازہر بچے اور بڑے کی توجہ کامرکز بناہوا ہے ۔ سانتا کلاز سے تحائف پا کر بچے پھولے نہیں سمارہے ہیں۔ چرچ میں کرسمس تقریبات شروع ہوچکی ہیں۔ بچوں نے ٹیبلوپیش کیا۔ کرسمس کی خصوصی کیرلز گیت گائے گئے ۔ لوگ گھروں سے مزے مزے کے کھانے پکا کر لائے ہوئے ہیں اور عبادت کرنے کے بعد سب مل کر کھائیں گے ۔ ڈرائی فروٹ کرسمس کے کھانوں کا لازمی جزو ہوتا ہے
گرجا گھروں میں کرسمس عبادات کاسلسلہ دسمبر کی پہلی اتوار سے شروع ہوجاتا ہے ۔

گرجا گھروں کو خوب سجایا جاتا ہے ۔ 24دسمبر کی رات گرجا گھروں میں عباد ت شروع ہو جاتی ہے اور رات 1 2 بجتے ہی ایک دوسرے کو کرسمس کی مبارکباد دینے کاسلسلہ شروع ہوجاتا ہے ۔ وہ رات کرسمس کی چاند رات ہوتی ہے ۔ ایسے گاؤں جہاں مسیحی ہی آباد ہیں وہاں لوگ گروپوں کی صورت میں نکل کرگاتے بجاتے ہیں اور گاؤں کے ہرگھر میں جاکرکرسمس کی مبارک باد دیتے ہیں ۔

اس موقع پر ڈرائی فروٹ سے مہمانوں کی تواضع کی جاتی ہے۔ کرسمس کے موقع پر کچھ لوگ خصوصی طور پر کیک بھی تیار کرواتے ہیں۔ کرسمس کی تیاریاں 24دسمبر کی رات تک اپنے نقطہ عروج تک پہنچ جاتی ہیں اور رات مڈنائٹ سروس کا اہتمام کیا جاتا ہے ۔ مسیحی میں موسیقی کاتصوریہ ہے کہ یہ خدا کی حمدوستائش کے لئے ہے اور یہ خداوند کوپسند ہے ۔ زبور مقدس کو باقاعدہ ترنم سے سنایاجاتا ہے۔