خودی نہ بیچ غریبی میں نام پیدا کر

حضور نبی کریم صلی اللہ علیہ وآلہ وسلم اس دنیا کی سب سے عظیم ہستی اور بہترین شخصیت ہیں۔ اللہ رب العزت نے اپنی لاریب کتاب قرآن مجید میں آپ صلی اللہ علیہ وسلم کی مبارک زندگی کو قیامت تک کے انسانوں کے لیے بہترین نمونہ قرار دیا ہے۔ محسن انسانیت، رحمت اللعالمین، مصلح عالم، عالم ہادی برحق کی مبارک اور جامع ترین سیرت پاک میدان حرب کے بہادر جرنیل سے لےکر تجارتی منڈی کے بہترین تاجر اور معیشت دان تک ہر شعبہ ہائے زندگی سے منسلک شخص کے لیے مکمل رہنمائی کا واحد سرچشمہ ہے۔

شہنشاہ عرب و عجم نے زندگی کے ہر شعبے میں انسانیت کی مکمل اور کامل ترین رہنمائی فرمائی ہے۔حضور نبی کریم علیہ الصلوۃ والسلام کی مبارک ہستی کی نظر میں دفاع کی اہمیت کا اندازہ اس بات سے لگایا جاسکتا ہے کہ وصال کے وقت آپ صلی اللہ علیہ وسلم کے حجرہ مبارک میں دیا جلانے کے لئے تیل تو موجود نہیں تھا مگر مستند روایات کے مطابق آپ صلی اللہ علیہ وسلم کے حجرہ مبارک میں نو یا گیارہ تلواریں موجود تھیں۔

(جاری ہے)

کائنات کی سب سے شفیق، مہربان اور دانا ترین شخصیت کی ملکیت میں بیک وقت نو تلواروں کا موجود ہونا جبکہ شہنشاہ عرب و عجم کا بعض ایام فاقہ کشی میں گزارنا تمام انسانیت کو دفاع کی اہمیت اور باقی امور پر اس کی فوقیت واضح کرنے کے لیے کافی ہے۔  
اگر ہم انفرادیت کی بہترین مثال سے اجتماعیت کی بہترین مثال کی طرف بڑھیں تو اسلام بطور دین دنیا بھر میں امن و سلامتی، محبت و اخوت اور بھائی چارے کا داعی دین ہے۔

اسلام کا دامن انتہا پسندی، نفرت،  دہشت گردی اور شدت پسندی سے بالکل پاک ہے۔ یہ دین محبتیں بانٹنے والا اور بھائی چارے کو فروغ دینے والا دین ہے مگر اسلام میں بھی شرانگیزی سے نبرد آزما ہونے اور ریاست کے مضبوط دفاع کا واضح حکم ہے۔ اللہ پاک نے دفاع کو مضبوط رکھنے کا حکم صادر فرمایا ہے اور دفاعی نظام کی بہتری اور عسکری قوت کی مضبوطی کے لئے قرآن مجید میں باقاعدہ آیات کا نزول فرمایا ہے۔

اسلام میں ریاست کے دفاع کو عبادت کا درجہ حاصل ہے اور دفاع ریاست کی خاطر جان کا نذرانہ پیش کرنے والے شہداء کے لئے بہت زیادہ اجر و ثواب اور مرتبہ ہے۔
اگر ہم اسلام سے ہٹ کر بھی بات کریں تو بھی مضبوط دفاع اور بہترین عسکری قوت ریاستی قیام، اس کے تحفظ، اس کی سالمیت کی حفاظت اور حکمرانی کو قائم رکھنے کیلیے کلیدی اہمیت کی حامل ہے۔ تاریخ انسانی ایسی بے شمار مثالوں سے بھری پڑی ہے جہاں مضبوط عسکری قوت کے حامل چھوٹے ممالک یا قبائل نے بڑے بڑے ممالک پر حکمرانی کی ہے۔

برطانیہ جیسے چھوٹے سے جزیرے نے بندوق کے زور پر اس دور کی مضبوط ترین معیشت برصغیر پاک و ہند سمیت پوری دنیا پر حکمرانی کی۔ پرتگال فرانس، جرمنی اور سپین کا بھی یہی حال ہے۔ اگر تھوڑا اور پیچھے جائیں تو ماضی ہمیں یاد دلائے گا کہ معاشی طور پر کمزور مگر عسکری طور پر مضبوط ایک چھوٹے سے ترک قبیلے (قبیلہ قائی) نے تین براعظموں پر محیط ساڑھے چھ سو سال تک قائم رہنے والی خلافت عثمانیہ کی بنیاد رکھی۔

اگر زمانہ حال کی مثال لی جائے تو اس وقت امریکہ پوری دنیا میں قائم کردہ اپنی فوجی چھاؤنیوں کے ذریعے دنیا پر اپنی دھاک بٹھائے ہوئے ہے۔
اس ساری  تمہید کا مقصد پاکستان کے سالانہ بجٹ میں محکمہ دفاع اور عسکری قوت کے لیے مختص رقم اور اس پر ہونے والی تنقید برائے تنقید کو حقائق کی روشنی میں زیر بحث لانا ہے۔ ہمارے یہاں چند سالوں سے کچھ ضمیر فروش، خائن اور ننگ ملت لوگ ملک دشمن عناصر کے آلہ کار بن کر کر ہر سال دفاع کے لیے مختص بجٹ کو سوچی سمجھی منصوبہ بندی کے تحت تنقید کا نشانہ بناتے ہیں اور مختلف پروپیگنڈوں کے ذریعے عوام کو گمراہ کرنے کی کوشش کرتے ہیں۔

تو آئیے سب سے پہلے میسر اعداد و شمار کی مدد سے پاکستان کی عسکری قوت پر خرچ ہونے والی رقم کا دنیا کے دیگر ممالک کے ساتھ موازنہ کرتے ہیں  اور یہ جاننے کی کوشش کرتے ہیں کہ کیا پاکستان واقعی باقی دنیا کی نسبت  اپنے بجٹ میں ایک خطیر رقم دفاعی امور کے لیے مختص کرتا ہے؟  راقم الحروف کو جو اعداد وشمار میسر آئے ہیں اس کے مطابق پوری دنیا کے دفاعی بجٹ کا تقریبا 36فیصد حصہ امریکہ، 10 فیصد چین، پانچ فیصد روس اور چار چار فیصد سعودیہ اور بھارت خرچ کرتے ہیں جبکہ باقی کا چالیس فیصد پوری دنیا کے ممالک استعمال کرتے ہیں۔

اگر ہم اپنے ازلی دشمن اور حریف ملک بھارت کے دفاعی بجٹ کا جائزہ لیں تو ہمیں اندازہ ہوتا ہے کہ کہ ان کا دفاعی بجٹ ہمارے کل بجٹ کے برابر ہوتا ہے اور فاشسٹ مودی کے آنے کے بعد انڈیا بھاری اسلحہ امپورٹ کرنے کی دوڑ میں سب سے پہلا ملک بن چکا ہے۔ ایسی صورتحال میں بجٹ میں دفاع کے لیے مختص رقم میں کمی کا مطالبہ کرنا کسی صورت بھی دانشوری نہیں ہوگی۔

 دفاعی بجٹ کو مضبوط رکھنے کی دوسری بڑی وجہ پاکستان کا جغرافیائی محل وقوع ہے کیونکہ جغرافیائی اہمیت کی بنیاد پر پاکستان کو گولڈن لینڈ برج یا بین الاقوامی چوراہا/ گزر گاہ سمجھا جاتا ہے۔ پاکستان وسط ایشیائی ممالک اور مشرق وسطیٰ اور جنوبی ایشیائی ممالک کو بحیرہ عرب کے ذریعے آپس میں ملانے کا کام کرتا ہے۔ پاکستان چین روس اور افغانستان سمیت کئی ممالک کو گرم پانیوں تک رسائی فراہم کرتا ہے۔

ایسی اہم ترین گزر گاہ ہونے اور حساس جغرافیائی محل وقوع پر موجود ہونے کی وجہ سے پاکستان کو اپنے تحفظ اور اپنی سالمیت کو برقرار رکھنے کے لئے ہمہ وقت ایک مضبوط عسکری قوت کی اشد ضرورت ہے۔
پاکستان کے مضبوط دفاعی بجٹ کی تیسری بڑی وجہ یہ ہے کہ پاکستان ایک طویل ورکنگ باؤنڈری رکھنے کے ساتھ ساتھ بین الاقوامی پراکسی وار کا ایک اہم ترین رکن ہے۔

جس کے باعث سرد یا کھلی جنگ کے خطرات ہر وقت ہماری ریاست پر منڈلاتے رہتے ہیں۔ پاکستان دو دہائیوں سے ملک کے اندر افغان سرحد، وزیرستان اور بلوچستان میں دہشت گردی کے خلاف اہم ترین اور طویل جنگ لڑ رہا ہے جس میں ہمارے کئی بہادر نوجوانوں نے قیام امن کی خاطر اپنی جانوں کا نذرانہ پیش کیا ہے۔ ایک طرف پاکستان کو مشرقی سرحد پر انڈیا جیسے انتہا پسند اور جنگی جنون رکھنے والے دشمن کا سامنا ہے جو آئے روز لائن آف کنٹرول پر بلااشتعال فائرنگ کے ذریعے ہماری عوام اور املاک کو ٹارگٹ کرتا ہے۔

فاشسٹ مودی اور ہندو انتہا پسند بی جے پی کے برسراقتدار آتے ہی خطے میں امن و سلامتی کی فضا بری طرح متاثر ہوئی ہے۔ آئے روز بارڈر پر چھوٹی موٹی جھڑپوں کی اطلاعات موصول ہوتی رہتی ہیں۔ انڈیا ہر وقت پاکستان پر حملے کے لیے پر تولتا ہوا نظر آتا ہے مگر افواج پاکستان کی مضبوط وقت عسکری قوت ہمیشہ سے اپنے دشمن کے ناپاک عزائم کو کو ناکام بنائے ہوئے ہے۔

دوسری جانب NDS کے ساتھ مل کر افغان سرحد کے ساتھ موجود دہشت گردوں کی مدد کرکے بھارت پاکستان کا امن مسلسل خراب کیے ہوئے ہے۔  بھارت اور افغانستان بد نام زمانہ خفیہ ایجنسیوں راء اور این ڈی ایس کے ذریعے پاکستان میں ہر وقت تخریب کاری کے لیے منصوبے بناتا ہے جسے پاکستان صرف اپنی مضبوط عسکری قوت کے بل بوتے پر ہی ناکام بنانے میں کامیاب ہوا ہے۔

لہذا اگر ہم نے اپنی دفاعی طاقت میں کمی کی تو اس کے سنگین نتائج اور نہ ختم ہونے والے دفاعی مسائل کا سامنا کچھ اچنبے کی بات نہ ہوگی
 قصہ مختصر پاکستان اس وقت کولڈ سٹارٹ ڈاکٹرائن، ففتھ جنریشن وار اور پراکسی وار جیسی تمام عسکری مہمات میں گھرا ہوا ہے۔ ایسی صورتحال میں پاکستان کو اپنی سالمیت اور خود مختاری برقرار رکھنے اور اپنے وجود کو قائم رکھنے کے لیے ایک مضبوط دفاعی قوت کی ہر دوسری چیز سے زیادہ ضرورت ہے۔

اندرونی و بیرونی ملک دشمن قوتیں پاکستان کو توڑنے کی ایک عرصہ دراز سے کوششوں میں ناکامی کے بعد اس نتیجہ پر پہنچی ہیں کہ عسکری طور پر مضبوط پاکستان کسی صورت بھی توڑا نہیں جاسکتا اور یہ ملک اس وقت تک نا قابل تسخیر رہے گا جب تک اسے بھی لیبیا کی طرح دفاعی طور پر کمزور نہ کر دیا گیا۔ لہذا اب وہ عوام کے دلوں میں منافرت پیدا کرکے اپنے مذموم مقاصد حاصل کرنے کی کوشش کر رہے ہیں اور عوام کو یہ باور کرانے کی کوشش کر رہے ہیں کہ محکمہ دفاع ان کے حقوق کا استحصال کر رہا ہے۔

ملک دشمن عناصر اور ان کے آلہ کار عوام کو مختلف الجھنوں میں الجھا کر اس ضد پر آمادہ کر رہے ہیں کہ وہ دفاعی طاقت کو کم کرنے کے لیے حکومت پر دباؤ ڈالیں۔ میرے عزیز ہم وطنو ترقی اور خوشحالی کا وجود سالمیت اور خود مختاری سے جڑا ہوا ہے اگر آپ ناقابل تسخیر ہوں گے تو ہی آپ ترقی کر سکیں گے لیکن خدانخواستہ اگر آپ محکوم ہو جائیں گے تو غلامی کی زنجیر پھر سے گلے کا پھندا بن جائے گی۔

ہمیں اس ملک کے سب سے ذہین اور محب وطن وزیر اعظم محترم ذوالفقار علی بھٹو شہید کی بات کو پھر سے ذہن میں لانا ہوگا کہ "گھاس کھا لیں گے لیکن ایٹم بم بنائیں گے" یعنی اپنا دفاع مضبوط کریں گے۔ پاکستان اس وقت بھی شدید خطرات میں گھرا ہوا ہے۔ ہمیں اپنی سالمیت،خودی، حمیت، آزادی اور خود مختاری کا ہر صورت دفاع کرنا چاہیے اور ہمیں سالمیت ارض مقدس کا سودا کسی بھی قیمت پر نہیں کرنا چاہیے۔

ہمارے اسلاف کا بھی یہی درس رہا ہے کہ اپنے دفاع کو ہرصورت مضبوط رکھا جائے اور اور کبھی بھی غلامی کی لعنت کو قبول نہ کیا جائے۔ اس بلاگ سے متعلق آپ کے تمام سوالات کے جواب دینے کے لیے راقم الحروف ہر وقت حاضر خدمت ہے آپ  مجھے اپنے تحفظات اور سوالات میرے ای میل ایڈریس  اور میرے ٹویٹر اکاؤنٹ پر  ارسال کر سکتے ہیں۔ جس کا فورا ترجیحی بنیادوں پر آپکو جواب ارسال کیا جائے گا اور آپکے تحفظات دور کرنے کی ہر ممکن کوشش کی جائے گی۔

یاد رکھیں ان دنوں ہمیں دفاعی بجٹ کو کم کرنے کے لیے بہترین معیشت، تعلیم، صحت اور خوشحالی جیسے کئی لالی پوپ دیے جائیں گے مگر عزیز ہم وطنو ہمیں کسی بہکاوے میں آکر اپنے متاع غرور کا سودا نہیں کرنا۔
 میں اپنی تحریر علامہ اقبال رحمۃ اللہ علیہ کے کلام کے اس شعر پر کروں گا؛
 تیرا طریق امیری نہیں فقیری ہے
خودی نہ بیچ غریبی میں نام پیدا کر
اللہ رب العزت میرے وطن کو بات قیامت قائم و دائم رکھے اور خدا کرے کہ ارض پاک کی امت کی صبح ہونے تک ناقابل تسخیر ہے رہے۔