نواز شریف جتنا بڑا اثاثہ مشکل سے ملتا ہے؛ خواجہ آصف

اسلام آباد ( اُردو پوائنٹ اخبارتازہ ترین ۔ 18 ستمبر 2022ء ) وزیر دفاع اور مسلم لیگ ن کے رہنماء خواجہ آصف نے کہا ہے کہ نواز شریف میرے قائد اور پاکستان کا اثاثہ ہیں، اتنا بڑا اثاثہ مشکل سے ملتا ہے۔ میڈیا رپورٹس کے مطابق اپنے ایک بیان میں انہوں نے کہا کہ نواز شریف جلد پاکستان آئیں گے، اگر نواز شریف کو کل پاکستان آنا ہے تو میں چاہتا ہوں کہ وہ آج آجائیں لیکن نواز شریف کے ساتھ انصاف ہونا چاہیے اور ہم چاہتے ہیں نواز شریف کے ساتھ جو زیادتی ہوئی اس کا ازالہ ہو کیوں کہ سیاست میں اتنا بڑا اثاثہ مشکل سے ملتا ہے، نہیں چاہتے کوئی ایسا فیصلہ کریں جس سے ہماری مشکلات میں اضافہ ہو۔

ادھر مسلم لیگ ن کے رہنماء اور وفاقی وزیر احسن اقبال نے کہا ہے کہ یہ طے کرنا ہوگا کہ ملک میں بالادستی آئین کو حاصل ہے یا چند طبقوں کو؟ جب تک یہ معاملہ حل نہیں ہوگا تب تک مسئلہ حل نہیں ہوگا، جب معیشت کارگر اور مضبوط نہیں ہوگی تب تک پاکستان مضبوط نہیں ہوگا، پاکستان کی بیلٹ اور ووٹ کی تحریک کو ایوب خان نے راستے سے ہٹایا۔

(جاری ہے)

احسن اقبال نے کہا کہ تیل سبسڈی ختم کرنے کی وجہ سے پیٹرول مہنگا ہوگیا، پیٹرول اور ڈیزل مہنگا ہونے کی وجہ سے بجلی مہنگی ہوئی، پیٹرول ،ڈیزل اور بجلی کی قیمتیں بڑھنے سے افراط زر میں اضافہ ہوا، ہمیں عالمی مہنگائی کا بھی سامنا ہے، جیسے جیسے معیشت میں بہتری آئے گی مہنگائی میں بھی کمی ہوگی۔

وفاقی وزیر نے کہا کہ آئی ایم ایف معاہدے پر عمران نیازی نے دستخط کیے تھے، عمران خان جب آئی ایم ایف کے ساتھ معاہدے پر دستخط کررہے تھے اس وقت ہمیں تحفظات تھے، ہم نے عمران خان کو کہا تھا کہ اس معاہدے پر دستخط نہ کریں، عمران خان آئی ایم ایف کے سامنے سرنڈر کررہے تھے تو اس وقت حقیقی آزادی کہاں تھی؟۔