Live Updates

مسلم لیگ(ن) انتخابات کیلئے تیار ہے،مریم نواز کے ورکرز کنونشنز سے پارٹی مزید مضبوط ،مربوط اور فعال ہوگی،فرح نازاکبر

مسلم لیگ(ن) کی قیادت نے مشکل حالات میں اقتدار سنبھال کر اپنی سیاست کے بجائے ریاست کوبچایا،صدرشعبہ خواتین مسلم لیگ(ن)اسلام آباد

ہفتہ 4 مارچ 2023 19:20

اسلام آباد(اُردو پوائنٹ اخبارتازہ ترین - این این آئی۔ 04 مارچ2023ء) پاکستان مسلم لیگ(ن)شعبہ خواتین اسلام آباد کی صدر فرح ناز اکبرنے کہاہے کہ مسلم لیگ(ن) انتخابات کیلئے نہ صرف تیار ہے بلکہ ہم انشاء اللہ کامیابیاں حاصل کرکے تحریک انصاف کوسرپرائز بھی دیں گے اور اس کیلئے ہماری لیڈرشپ نے اپنا تمام ہوم ورک بھی مکمل کرلیا ہے،عمران نیازی کے جھوٹ کی فلم مزید نہیں چلے گی، اس نے جو چار سالہ حکومت میں سنہری کارنامے سرانجام دئیے تھے ان کا حساب اور جواب انتخابی مہم میں لازمی طورپر اس کو دینا ہی پڑے گا،عوام فیصلہ کرچکی ملکی مسائل کا حل صرف مسلم لیگ(ن) کے پاس ہے،نوازشریف کے دیوانے مسلم لیگ(ن) کودوبارہ بھاری اکثریت سے کامیاب کروائیںگے۔

اپنے بیان میںانہوں نے کہاکہ مسلم لیگ(ن) کی قیادت نے مشکل حالات میں اقتدار سنبھال کر اپنی سیاست کے بجائے ریاست کوبچایا،ریاست مدینہ کے دعویدار عمران نیازی نے آئی ایم ایف سے سخت شرائط پر کئے گئے معاہدوں کی وجہ ملک دیوالیہ ہونے کے قریب تھا لیکن مسلم لیگ(ن) نے اتحادی جماعتوں سے مل کر اپنی سیاست کی قربانی دے کر ریاست کوبچا لیا، عمران نیازی کے انقلاب مارچ، حقیقی آزادی مارچ اور جیل بھرو تحریک نیازی ٹولے کے ناکام تماشے تھے ۔

(جاری ہے)

مسلم لیگی رہنما نے کہاکہ عمران نیازی ملک میں سیاست اور معیشت سے کھیل رہے ہیں وہ چاہتے ہیں انڈسٹری اور لوگوں کے کاروبار بند رہیں یہی ملک دشمن قوتوں کا بھی ایجنڈا ہے جس کی یہ تکمیل کررہے ہیں، سابق وزیراعظم میاں نواز شریف کی قیادت میں حکومت ملکی ترقی اور عوام کی خوشحالی کیلئے بھرپور اقدامات اٹھا رہی ہے،تاریخ گواہ ہے کہ مسلم لیگ(ن) نے ہمیشہ بدترین معاشی حالات میں حکومت کو سنبھالادیا، قائد نوازشریف نے قوم کو موٹروے سمیت میگا پراجیکٹ دئیے ان کے دور حکومت میں سی پیک کے تحت اربوں ڈالر کی سرمایہ کاری کی گئی، لوڈشیڈنگ،دہشتگردی سمیت دیگر بحرانوں پر قابوپایامگرتبدیلی و سونامی کے دعویدار عمران نیازی کو مسلط کرکے ملکی ترقی وخوشحالی کا عمل سبوتاژ کیاگیا اور عوامی مسائل میں اضافہ کرکے قوم کو بدحالی کی دلدل میں دھکیلا جس کا خاتمہ موجودہ حکومت وزیراعظ شہبازشریف کی قیادت میں ہنگامی بنیادوں پر یقینی بنا رہی ہے۔