حیدرآباد کے عوام نے قلعہ گرانڈ میں پی پی کی سیاسی قبر بنا دی ہے، خالد مقبول صدیقی

ہفتہ 3 فروری 2024 22:47

حیدرآباد(اُردو پوائنٹ اخبارتازہ ترین - این این آئی۔ 03 فروری2024ء) ایم کیو ایم کے کنوینر ڈاکٹر خالد مقبول صدیقی اور ڈپٹی کنوینر انیس قائم خانی نے کہا ہے کہ پیپلز پارٹی کی سندھ حکومت نے 15 سال میں شہروں کے عوام کو کچھ نہیں دیا، 22 ہزار روپے کی ٹیکسوں کی آمدنی سے کھربوں روپے لوٹے ہیں پکا قلعہ کی دیواریں پیپلز پارٹی کے ظلم کی گواہ ہیں، آج حیدرآباد کے عوام نے قلعہ گرانڈ میں پی پی کی سیاسی قبر بنا دی ہے، پی پی کو ایم کیو ایم کے بائیکاٹ سے بھیک میں کراچی اور حیدرآباد کی میئر شپ ملی تھی، اب بائیکاٹ نہیں ہو گا، عوام نے فیصلہ کر دیا ایم کیو ایم جیت چکی ہے۔

ایم کیو ایم ضلع حیدرآباد کے زیرِاہتمام پکا قلعہ گرانڈ میں جلسہ عام منعقد کیا گیا جلسے سے کنوینر ڈاکٹر ڈاکٹر خالد مقبول صدیقی، ڈپٹی کنوینر انیس احمد قائم خانی، سہیل مشیدی، ظفر احمد صدیقی، ڈاکٹر عرفان گل مگسی و دیگر رہنماں نے خطاب کیا۔

(جاری ہے)

کنوینر ایم کیو ایم ڈاکٹر خالد مقبول صدیقی نے کہا کہ حیدرآباد والو تم نے آج قوم کی عزت رکھ لی ہے، قلعہ گرانڈ چھوٹا پڑ گیا ہے، ایسا جلسہ کوئی جماعت نہیں کر سکی، انہوں نے کہا کہ آپ کا دشمن آج اپنی موت آپ مر گیا ہے، آج حیدرآباد کے انتخابات کا نتیجہ سامنے آ گیا ہے، انہوں نے کہا کہ یہ قوم پیپلزپارٹی سے سوال کرتی ہے 15 سال میں سندھ کے شہری علاقوں کے عوام کے لئے تم نے کیا کیا ہے، ان کے حلال کمائی کے ٹیکس کے 22 ہزار ارب میں سے کھربوں کی کرپشن کی، اس کا اب ایک ایک پیسے کا حساب یہ شہر لے گا، انہوں نے کہا کہ 30 ستمبر 1988 کو پیپلز پارٹی کے مسلح دہشت گردوں نے ہی سینکڑوں مہاجر نوجوانوں کو شہید کیا تھا ہم نے پھر بھی صبر سے دل بڑا کر کے محترمہ بے نظیر بھٹو کو وزیراعظم بنوایا تھا مگر انہوں نے اقتدار میں آ کر ایم کیو ایم پر دو بار آپریشن مسلط کئے ہیں، پکا قلعے کی دیواریں پیپلز پارٹی کے ظلم کی گواہ ہیں لیکن آج حیدرآباد کے عوام نے پیپلز پارٹی کی سیاسی قبر اس پکا قلعہ گرانڈ میں بنا دی ہے، انہوں نے کہا کہ 75 سال بعد یہ تسلیم کر لیا گیا ہے یہ پاکستان بنانے والوں کی اولادیں ہی پاکستان چلا سکتی ہیں، ڈاکٹر خالد مقبول صدیقی نے کہا کہ موروثی خاندانوں کے بجائے 23 کروڑ عوام کی حکمرانی کی جو گارنٹی دے گا حیدرآباد ان کے ساتھ چلے گا، میرپور خاص بھی جیتے گا، 8 فروری کو ظالموں کا سورج ڈوب چکا ہو گا۔

ڈپٹی کنوینر انیس احمد قائم خانی نے کہا کہ 21 جنوری کو کراچی کے عوام نے فیصلہ دے دیا تھا اور آج حیدرآباد کے عوام نے بھی ایم کیو ایم کے حق میں فیصلہ دے دیا ہے، انہوں نے کہا کہ پیپلز پارٹی سن لے کہ ایم کیو ایم نے بائیکاٹ کیا تو خیرات میں تمہیں کراچی اور حیدرآباد کی میر شپ بھیک میں ملی اب کوئی بائیکاٹ نہیں ہو گا۔رکن رابطہ کمیٹی سہیل مشہدی نے کہا کہ کچھ عرصہ پہلے کچھ لوگ بول رہے تھے کہ ایم کیو ایم فنا ہو گئی اس کی سیاست ہمیشہ کے لئے ختم ہو گئی لیکن آج کا جلسہ یہ ثابت کر رہا ہے کہ ایم کیو ایم پہلے سے زیادہ مضبوط اور مستحکم ہو گئی ہے۔

پیپلز پارٹی سے ایم کیو ایم میں شامل ہونے والے سابق صوبائی وزیر ڈاکٹر عرفان گل مگسی نے کہا کہ پی ہی کے جو لوگ سائیکل پر چلتے تھے آج ان کے پاس چار چار لینڈ کروزر ہیں، پی پی نے دونوں ہاتھوں سے ملک کو لوٹا ہے۔ایم کیو ایم کے ڈسٹرکٹ انچارج حیدرآباد ظفر صدیقی، این اے 219 کے نامزد امیدوار عبدالعلیم خانزادہ، امیدوار پی ایس 64 راشد خان، امیدوار پی ایس 62 صابر قائم خانی، پی ایس 65 کے امیدوار ناصر قرشی نے بھی خطاب کیا۔