اللہ کا شکر ہے کہ پاکستان کا تنزلی کی طرف سفر رک گیا ہے، نواز شریف

لاہور(اردوپوائنٹ اخبار تازہ ترین۔07 فروری 2025)پاکستان مسلم لیگ ن کے صدر نواز شریف کا کہنا ہے کہ اللہ کا شکر ہے کہ پاکستان کا تنزلی کی طرف سفر رک گیا ہے، نیت ٹھیک ہو تو اللہ تعالیٰ کی مدد آتی ہے۔،معاشی بہتری اور مہنگائی میں کمی ملک و قوم کی بہتری کے اشارے ہیں،وزیراعظم شہباز شریف بڑی محنت کر رہے ہیں،پاکستان مسلم لیگ (ن) کے صدر نواز شریف اور وزیراعلیٰ پنجاب مریم نواز شریف سے فیصل آباد، چنیوٹ، ٹوبہ ٹیک سنگھ اور جھنگ سے تعلق رکھنے والے ارکان پنجاب اسمبلی نے ملاقات کی جس میں ملک کی مجموعی صورتحال، پنجاب میں ترقیاتی کاموں اور عوام کی خدمت کے منصوبوں پر غور کیا گیا۔

اجلاس میں عوامی فلاح کے منصوبوں اور مستقبل کی سیاسی حکمت عملی پر مشاورت بھی کی گئی۔ پارٹی کے سینئر رہنما سینیٹر پرویز رشید، رانا ثناءاللہ، پنجاب کی سینئر وزیر مریم اورنگزیب اور راشد نصراللہ بھی اجلاس میں شریک تھے۔

(جاری ہے)

اس موقع پر گفتگو کرتے ہوئے صدر مسلم لیگ ن نے کہا کہ اداروں اور نظام کی اصلاح پر ٹھوس پیش رفت جاری ہے۔ معاشی ترقی کے تسلسل سے ہی عوام کے حالات بدل سکتے ہیں۔

عوام کی خدمت سب سے بڑی عبادت ہے اور اس کا صلہ اور انعام اللہ ہی دیتا ہے۔ نیک نیتی اور محنت سے کام کریں تو اللہ تعالیٰ بھی مدد فرماتا ہے۔ مریم نواز نے وزیراعلی پنجاب کے طور پر میرا اور پارٹی کا سر فخر سے بلند کیا۔معاشی بہتری اور مہنگائی میں کمی ملک و قوم کیلئے اچھے اشارے ہیں۔ 30 ہزار پر آنے والی اسٹاک ایکسچینج آج 1 لاکھ 20 ہزار پوائنٹس کی حدوں کو چھو رہی ہے جو معاشی ترقی کے تسلسل کا ثبوت ہے۔

اراکین اسمبلی سے گفتگو کرتے ہوئے نواز شریف نے وزیراعلیٰ پنجاب مریم نواز کی کارکردگی کو سراہتے ہوئے کہا کہ انہوں نے اپنی محنت اور خدمت سے نہ صرف پنجاب کے عوام کا دل جیتا بلکہ پارٹی کا سر بھی فخر سے بلند کیا ہے۔ارکان پنجاب اسمبلی نے وزیراعلیٰ مریم نواز شریف کو پنجاب میں ترقیاتی منصوبوں، ستھرا پنجاب، کسان کارڈ، سکالرشپ پروگرام، سڑکوں کی تعمیر و بحالی، دھی رانی پروگرام، بنیادی و دیہی مراکز اور صحت کے اپ گریڈیشن پروگرامز پر خراج تحسین پیش کیا۔

ان کا کہنا تھا کہ قائد نواز شریف، شہباز شریف اور مریم نواز شریف کے کاموں کی ماضی اور حال میں کوئی مثال نہیں ملتی۔ ایک سال میں پنجاب کے ہر شعبے اور ہر علاقے میں ترقیاتی منصوبوں نے عوام کو نیا اعتماد دیا ہے۔ اس موقع پر وزیر اعلی پنجاب مریم نواز شریف نے گفتگو میں کہا کہ پاکستان کو ترقی مسلم لیگ (ن) ہی دیتی ہے، عوامی خدمت نواز شریف ، شہباز شریف اور مسلم لیگ (ن) کی پہچان ہے۔ یہ معیار اور روایت ہی ہمارا اصل امتحان ہے۔ قیادت کی رہنمائی اور آپ سب کی تائید و حمایت ہماری قوت اور کامیابی کی ضمانت ہے۔