تحریک انصاف ٹکڑوں میں تقسیم ہوچکی ،ایک دوسرے کو چور کہنا شروع کردیا ہے، خواجہ آصف

پی ٹی آئی والوں کا لیڈر بین الاقوامی چور ہے، ایسے افراد بھی پی ٹی آئی کیساتھ ہیں جن کو گھر والے بھی ووٹ نہیں دیتے، تقریب سے خطاب

اتوار 6 اپریل 2025 20:50

تحریک انصاف ٹکڑوں میں تقسیم ہوچکی ،ایک دوسرے کو چور کہنا شروع کردیا ..

سیالکوٹ (اُردو پوائنٹ اخبارتازہ ترین - این این آئی۔ 06 اپریل2025ء)وزیر دفاع خواجہ آصف نے کہا ہے کہ پی ٹی آئی والوں نے ایک دوسرے کو چور کہنا شروع کردیا، تحریک انصاف ٹکڑوں میں تقسیم ہوچکی ہے۔سیالکوٹ میں تقریب سے خطاب کرتے ہوئے خواجہ آصف نے کہا کہ ہم نے تحریک عدم اعتماد کے ذریعے تحریک انصاف سے اقتدار حاصل کیا، جب اقتدار حاصل کیا اس وقت ہر طرف تباہی تھی، کہا جا رہا تھا ملک معاشی حالات کے باعث دیوالیہ ہوجائے گا، پی ڈی ایم کے رہنمائوں نے ملکر اس ملک کیلئے امید کی کرن پیدا کی۔

خواجہ آصف نے کہا کہ کوئی سوچ نہیں سکتا تھا کہ ملک میں بجلی سستی ہوگی، حکومتی پالیسیوں کی وجہ سے مہنگائی کی شرح میں کمی آئی، وزیراعظم شہباز شریف کی قیادت میں ملک کو مشکل حالات سے نکالا۔

(جاری ہے)

وزیر دفاع نے کہا کہ بانی پی ٹی آئی کے دور میں کرپشن عروج پر تھی، پی ٹی آئی والوں کا لیڈر بین الاقوامی چور ہے، بانی پی ٹی آئی ہمارے ساتھ میٹنگ میں نہیں بیٹھتا تھا، بانی پی ٹی آئی اب سیاست کر رہا ہے کہ مجھے میٹنگز میں لیکر جائیں۔

انہوں نے کہا کہ ایسے افراد بھی پی ٹی آئی کے ساتھ ہیں جن کو گھر والے بھی ووٹ نہیں دیتے۔انہوں نے کہا کہ شہباز شریف نے ایک سال کے اندر ناممکن کو ممکن کر دکھایا، وزیراعلی پنجاب مریم نواز صوبے کی ترقی کیلئے دن رات کوشاں ہیں، بلوچستان اور خیبر پختونخوا میں دہشتگردی کی لہر ہے، پاک فوج کے جوان قربانیاں دیکر ملک کی حفاظت کر رہے ہیں۔انہوں نے کہا کہ بجٹ سے پہلے عوام کو خوشخبریاں سنائیں گے۔