گورنرہائوس لاہور میں بھارت کیخلاف تاریخی فتح پر پاک فوج کو خراج تحسین پیش کرنے کے لیے آتش بازی کا مظاہرہ

لاہور(اُردو پوائنٹ اخبارتازہ ترین - این این آئی۔ 15 مئی2025ء)گورنرہائوس لاہور میں بھارت کے خلاف پاک فوج کی تاریخی فتح پر پاک فوج کو خراج تحسین پیش کرنے کے لیے آتش بازی کا مظاہرہ کیا گیا۔ اس موقع پر گورنر پنجاب سردار سلیم حیدر خان ، ڈپٹی سپیکر پنجاب اسمبلی ملک ظہیر اقبال چنڑ، پیپلز پارٹی کے سینئر رہنما عزیز الرحمن چن، پیپلز پارٹی کے ورکر، اور عوام کی بڑی تعداد موجود تھی۔

گورنر پنجاب نے عوام کے ہمراہ آتش بازی کا نظارہ دیکھا ۔ اس موقع پر میڈیا سے گفتگو کرتے ہوئے گورنر پنجاب نے کہا کہ قوم کو بھارت کی طرف سے مسلط کی گئی جنگ میں تاریخی فتح مبارکباد دیتا ہوں ۔اُنہوں نے کہا کہ اس تاریخی کامیابی پر صدر پاکستان،حکومت پاکستان اور تمام سیاسی جماعتوں کو بھی مبارکباد پیش کرتا ہوں، بالخصوص سپہ سالار کو مبارکباد پیش کرتا ہوں۔

(جاری ہے)

گورنر پنجاب نے کہا کہ ہماری پاک فضائیہ نے بھارت میں گھس کر دشمن کو مار گرایا۔اُنہوں نے کہا کہ جب بھی وطن عزیز پرامتحان پڑا پاک فوج نے ہمیشہ قوم کا سر فخر سے بلند کیا۔ گورنر پنجاب نے کہا کہ یہ اللہ کا انعام ہے کہ جنگ کی وجہ سے ہمیں ہر میدان میں دنیا نے تسلیم کیا ہے۔اُنہوں نے کہا کہ ثابت ہو گیا کہ مغرب چین کے جنگی آلات کا مقابلہ نہیں کرسکتا۔

گورنر پنجاب نے کہا کہ ہمارے پاکستانی پائلٹ نے جس طرح مقابلہ کیا بھارت کو چاروں شانے چت کردیا۔اُنہوں نے کہا کہ وسائل کی کمی کے باوجود ہمارے فوجی جوانوں، اور ٹیکنالوجی نے ثابت کیا کہ پاکستان کا دفاعی نظام کسی سے کم نہیں۔ گورنر پنجاب نے کہا کہ مودی اب اگر دوبارہ کوئی حرکت کرے گا تو ذلیل و رسوا ہوگا۔ اُنہوں نے کہا کہ مودی کا غرور ٹوٹ چکا، اسکو اپنے دفاعی آلات کا غرور تھا جو مسلح افواج نے خاک میں ملا دیا۔

گورنر پنجاب نے کہا کہ اس جنگ کے بعد بین الاقوامی سطح پر پاکستان کی عزت و وقار میں اضافہ ہوا ہے۔ انہوں نے کہا کہ پوری قوم اپنی فورسز ، سپہ سالار کو خراج تحسین پیش کرتی ہے۔گورنر پنجاب نے کہا کہ پوری دنیا نے بھارت کے بیانیے کو مسترد کیا اور پاکستان کے موقف کی حمایت کی۔ انہوں نے مزید کہا کہ بلاول بھٹو نے بین الاقوامی سطح پر پاکستان کا موقف موثرطریقے سے اجاگر کیا ۔ ایک سوال کے جواب میں گورنر پنجاب نے کہا کہ پیپلزپارٹی کے قائدین پر جتنے مظالم ہوئے اس کے باوجود ہم نے ہمیشہ پاکستان کھپے کا نعرہ لگایا۔