وزیر ریلوے محمد حنیف عباسی کا اٹک میں شاندار استقبال،افواج پاکستان کی قربانی کی بدولت وطن عزیز میں امن اور سلامتی ہے ،اٹک کے عوام کا شکرگزار ہوں ،محمد حنیف عباسی کا عوامی جلسہ سے خطاب

اٹک (اُردو پوائنٹ اخبارتازہ ترین - اے پی پی۔ 19 مئی2025ء) وزیر ریلوے محمد حنیف عباسی نے کہا ہے کہ آج ہم فتح کا دن منا رہے ہیں اور یہ دن یوم تشکر اور فخر کا دن ہے،افواج پاکستان کی قربانی کی بدولت وطن عزیز میں امن اور سلامتی ہے ،اٹک کے عوام کا شکرگزار ہوں جنہوں نے ہرمشکل وقت میں میرا ساتھ دیا ہے، ان خیالات کا ا ظہار انہوں نے اتوار کو اٹک میں جلسہ سے خطاب کرتے ہوئے کیا، قبل ازیں اٹک آمد پر وفاقی وزیر کا شاندار استقبال کیا گیا۔

اس موقع پر اٹک کے عوام، سیاسی رہنمائوں اورسماجی شخصیات نے بڑی تعداد میں شرکت کی ، ضلعی انتظامیہ کے افسران بھی اس موقع پر موجود تھے ۔اجتماع سے خطاب کرتے ہوئے انہوں نے اٹک کے عوام سے اظہار تشکر کرتے ہوئے کہاکہ آپ نے ہر مشکل وقت میں میرا ساتھ دیا۔

(جاری ہے)

انہوں نے اپنی سیاسی جدوجہد اور مشکلات کا ذکر کرتے ہوئے کہا کہ میں نے ہمیشہ عدالتوں کا سامنا کیا اور قید کے باوجود اپنے موقف سے پیچھے نہیں ہٹا اور اصولوں پر قائم رہ کر خدمت کا جذبہ برقرار رکھا۔

وزیر ریلوے نے کہا کہ ناموسِ رسالت کے معاملے پر ہمیشہ حق کا دفاع کیا ہے اور آئندہ بھی کریں گے۔انہوں نے کہا کہ آج ہم فتح کا دن منا رہے ہیں اور یہ دن یومِ تشکر اور فخر کا دن ہے۔ اس موقع پر انہوں نے پاک فوج کو خراج تحسین پیش کیا اور کہا کہ پاک فوج کی قربانیوں کی بدولت ہی آج ہم وطن عزیز میں امن اور سلامتی سے رہ رہے ہیں ۔ انہوں نے کہا کہ دشمن نے رات کی تاریکی میں حملہ کیا لیکن ہم نے بھرپور جواب دیا۔

حنیف عباسی نے بھارت کی جانب سے پاکستان کے پانی روکنے کی دھمکیوں کا حوالہ دیتے ہوئے بتایا کہ اس معاملے پر وزیراعظم نے نیشنل سکیورٹی کونسل کا اجلاس بلایا اور واضح کیا کہ اگر بھارت نے پانی بند کیا تو پاکستان بھرپور جواب دے گا۔ انہوں نے کہا کہ ہماری فوج نے بھارت کے پانچ جنگی جہاز مار گرائے اور دشمن کو اپنی حدوں میں رہنے پر مجبورکر دیا ۔

انہوں نےکہا کہ نورخان ائیر بیس پر دشمن کے حملےکو ناکام بنایا اور پوری قوم نے اپنے جوانوں کے حوصلے بڑھائے ۔ حنیف عباسی نے اپنی پریس کانفرنس کا حوالہ دیا جو اب بھی بھارتی میڈیا چلا رہا ہے۔وزیر ریلوے نے کہا کہ دشمن کی جارحیت کا ہماری مسلح افواج نے منہ توڑ جواب دیا ۔انہوں نے کہا کہ بری فوج کے سربراہ جنرل سید عاصم منیر نے پاکستان کو عالمی سطح پر عزت بخشی اور دشمن کو شکست دی۔

انہوں نے کہا کہ شیر کو شیر ہی لیڈ کرتا ہے اور ہمارے ملک کے کمانڈر جنرل عاصم منیر ہیں۔وزیر ریلوے نے مزید کہا کہ بھارت سمجھتا تھا کہ اس کی جارحیت کے بعد دنیا اس کے ساتھ کھڑی ہو جائے گی، مگر چین، ترکی سمیت کئی دوست ممالک نے پاکستان کے ساتھ کھڑے ہو کر اس کی سوچ کو غلط ثابت کردیا۔ انہوں نے کہا کہ وزیراعظم شہبازشریف پاکستان کو نئی بلندیوں پر لے جانے اور غیر ملکی سرمایہ کاری کے لیے پرعزم ہیں ۔

حنیف عباسی نے وزیر اعلی مریم نواز کا بھی شکریہ ادا کیا جنہوں نے پاکستان ریلوے کی بہتری کے لیے حوصلہ دیا۔ انہوں نے کہا کہ پنجاب حکومت کے ساتھ مل کر ریلوے کی کارکردگی کو بہتر بنا رہے ہیں اور جلد راولپنڈی سے لاہور ریل کے ذریعے دو گھنٹوں میں پہنچنے کی سہولت فراہم کریں گے۔ آر آئی سی ہسپتال میں بہترین طبی سہولیات فراہم کی جائیں گی جس سے عام آدمی کا لاکھوں روپے کا علاج بالکل مفت کیا جائیگا۔انہوں نے کہا کہ سندھ اور بلوچستان ہم سے ترقیاتی کاموں میں مقابلہ کرنا چاہ رہے ہیں اس حوالے سے یہ مقابلہ بازی خوش آئند ہے۔ آخر میں انہوں نے پاکستان زندہ باد، پاک فوج پائندہ باد کے نعرے لگائے۔