Live Updates

بھارت طالبان کی مخالفت کرتا رہا ہے، اب ان سے ملاقاتیں کر رہا ہے‘ شیری رحمان

پیر 19 مئی 2025 22:08

اسلام آباد(اُردو پوائنٹ اخبارتازہ ترین - آن لائن۔ 19 مئی2025ء)پیپلزپارٹی کی مرکزی رہنما سینیٹر شیری رحمان نے کہا ہے کہ مغربی بارڈر ہمارے لیے حساس ہی رہے گا، بھارت طالبان کی مخالفت کرتا رہا ہے اور اب ان سے ملاقاتیں کر رہا ہے۔نجی ٹی وی سے گفتگو کے دوران شیری رحمان نے کہا کہ بھارت نے فیک نیوز کی بنیاد پر جعلی بیانیہ بنانے کی کوشش کی، سفارتی سطح پر بھی پاکستان کو کامیابی ملی ہے، بھارتی حکومت کے خلاف بھارت کے اندر سے بھی اب آوازیں اٹھ رہی ہیں، دریائے سندھ کو آپ نلکے کی طرح سے بند نہیں کر سکتے۔

شیری رحمان کا کہنا تھا کہ دو تین سال سے معاشی بہتری کیلیے ساری توجہ رہی ہے، دنیا ہمیں مختلف نظروں سے دیکھ رہی ہے، دہشت گردی کے خلاف ہماری جنگ اب بھی جاری ہے۔دوسری جانب نائب صدر پیپلز پارٹی سینیٹر شیری رحمان نے بھارتی جھوٹے بیانیے کو عالمی سطح پر بینقاب کرنے کیلیے وزیرِ اعظم کی بنائی گئی کمیٹی کا خیر مقدم کیا ہے۔

(جاری ہے)

شیری رحمان نے کہا کہ موجودہ مشکل وقت میں عالمی سفارتکاری کیلئے بلاول بھٹو زرداری بہترین انتخاب ہیں، سفارتی محاذ پر بلاول بھٹو زرداری کی حکمت عملی نئی تاریخ رقم کر رہی ہے، بلاول بھٹو کا لہجہ، دلیل اور وقار دشمن کو بھی سوچنے پر مجبور کر دیتا ہے۔

شیری رحمان کا کہنا تھا کہ بھارت کا سات ٹیمیں بھیجنا بلاول بھٹو کی خارجہ پالیسی کی کامیابی کا ثبوت ہے، وزیرِ اعظم کا شکریہ کہ بلاول بھٹو اور کمیٹی میں شامل دیگر ناموں پر اعتماد کیا، سفارتکاری کی جنگ میں بلاول بھٹو بھارت کا جھوٹا بیانیہ زمین بوس کریں گے۔شیری رحمان نے یہ بھی کہا کہ بلاول کی زیرِقیادت کمیٹی سفارتی محاذ پر بھارت کو منہ توڑ جواب دینے کیلیے تیار ہے، بلاول بھٹو زرداری کی زیرِ نگرانی کمیٹی بیانیے کی جنگ میں پاکستان کو فاتح بنائے گی۔