بھارتی حمایت یافتہ دہشتگردی کے خلاف جنگ کو منطقی انجام تک پہنچانے کا وقت آگیا ،وزیراعظم/فیلڈ مارشل

b کوئٹہ(اُردو پوائنٹ اخبارتازہ ترین - آن لائن۔ 21 مئی2025ء)وزیراعظم پاکستان شہباز شریف اور فیلڈ مارشل عاصم منیر نے کہا ہے کہ اب وقت آگیا ہے کہ بھارتی حمایت یافتہ دہشتگردی کے خلاف جنگ کو منطقی انجام تک پہنچایا جائے۔وزیراعظم شہباز شریف، وزیر دفاع خواجہ ا آصف، وزیر داخلہ محسن نقوی، وزیر اطلاعات عطااللہ تارڑ اور آرمی چیف فیلڈ مارشل سید عاصم منیر نے کوئٹہ کا دورہ کیا اور دہشتگرد حملے میں زخمی ہونے والوں کی عیادت کی۔

وزیراعلیٰ بلوچستان اور کمانڈر کوئٹہ نے دہشتگرد حملے میں شہید اور زخمی ہونے والوں کے بارے میں بریفنگ دیتے ہوئے کہاکہ اس حملے میں 3 معصوم بچیاں اور 2 فوجی جوان شہید ہوئے، جبکہ 39 معصوم بچوں سمیت 53 افراد زخمی ہیں۔سیکیورٹی یقینی بنانے کیلئے تمام وسائل بروئے کار لارہے ہیں ۔

(جاری ہے)

وزیراعظم شہباز شریف او آرمی چیف نے دہشتگرد حملے میں زخمی ہونے والوں کی عیادت کرتے ہوئے کہاکہ بھارتی پراکسیوں کے ذریعے دہشتگردی کی یہ کارروائی شرمناک اور قابل نفرت ہے۔

انہوں نے کہاکہ یہ بھارت کے حمایت یافتہ یہ دہشتگرد بلوچ اور پشتون قوم کے عزت اور اقدار پر بھی داغ ہیں، جو طویل عرصے سے تشدد اور انتہا پسندی کو مسترد کررہے ہیں۔انہوں نے کہاکہ دہشتگردی کی کارروائیوں کو بچوں کو نشانہ بنانے پر بین الاقوامی برادری سے فوری توجہ کا مطالبہ کرتے ہیں۔وزیراعظم اور فیلڈ مارشل نے کہاکہ پاکستان کی سیکیورٹی فورسز اور قانون نافذ کرنے والے ادارے اس وحشیانہ فعل میں ملوث تمام افراد کا پیچھا کریں گے۔

وزیراعظم نے کہاکہ پوری قوم دہشت گردی کی لعنت کے خاتمے کے ساتھ ساتھ پاکستان کی خودمختاری اور سلامتی کے تحفظ کے لیے اپنی مسلح افواج اور قانون نافذ کرنے والے اداروں کے ساتھ کھڑی ہے۔اس موقع پر موجود وفاقی وزرا نے کہا کہ بھارت خطے میں عدم استحکام کا مرکز بن چکا ہے، اور اس کا اصل چہرہ دنیا کے سامنے بے نقاب ہو چکا ہے۔وفاقی وزرا نے کہا کہ دہشتگردی کے سہولت کاروں اور مجرموں کو انصاف کے کٹہرے میں لایا جائے گا۔

ڈپٹی کمشنر (ڈی سی) خضدار نے بتایا کہ ابتدائی تحقیقات میں معلوم ہوا ہے کہ اسکول بس میں دھماکا خود کش بمبار کی جانب سے خود کو اڑانے کے بعد ہوا جس میں اسکول بس میں سوار 3 بچے شہید ہوئے۔ذرائع کے مطابق بعض زخمی بچوں کی حالت تشویش ناک ہے، شہید ہونے والی طالبات میں چھٹی جماعت کی ثانیہ سومرو، ساتویں جماعت کی حفظہ کوثر اور دسویں جماعت کی عیشا سلیم شامل ہیں۔واضح رہے کہ بلوچستان کے ضلع خضدار میں ایک اسکول بس کو نشانہ بنایا گیا جس کے نتیجے میں 3 معصوم طالبات سے 5 افراد شہید ہوگئے۔