ٹرمپ کی ذاتی دلچسپی اس امرکی عکاسی کرتی ہے کہ امریکہ خطے میں امن و استحکام کا خواہاں ہے، پاکستانی سفیر

واشنگٹن(اردوپوائنٹ اخبار تازہ ترین۔24 مئی 2025)امریکہ میں تعینات پاکستانی سفیر رضوان سعید شیخ نے کہا ہے کہ ٹرمپ کی ذاتی دلچسپی اس امرکی عکاسی کرتی ہے کہ امریکہ خطے میں امن و استحکام کا خواہاں ہے، پاک بھارت جنگ بندی میں امریکہ نے نمایاں کردار ادا کیا ہے، میڈیا سے گفتگو کرتے ہوئے پاکستانی سفیر کاکہنا ہے کہ صدر ڈونلڈ ٹرمپ کا بذات خود جنگ بندی کا اعلان امریکی کردار کو واضح کرتا ہے۔

پاک بھارت جنگ بندی میں امریکہ نے مرکزی کردار ادا کیا۔ جنگ بندی نے واضح کیا کہ امریکی قیادت کشیدگی کم کرنے میں مخلص ہے۔ دونوں ملکوں کے درمیان کشیدگی میں کمی کیلئے امریکی قیادت کا کردار قابل تحسین ہے اور صدر ٹرمپ امن کے داعی ہیں۔ مسئلہ کشمیر کے حل میں پیش رفت کے حوالے سے امریکی صدر کی کوششوں کی قدر کرتے ہیں انہوںنے کہا کہ امید ہے ان کوششوں کو جاری رکھا جائے گا اور معاملے کو طے شدہ طریقہ کار کے مطابق پایہ تکمیل تک پہنچایا جائے گا۔

(جاری ہے)

پاکستان اقوام متحدہ کی قراردادوں اور کشمیر ی عوام کی امنگوں کے مطابق مسئلے کا پائیدار اور مستقل حل کا خواہاں ہے۔مسئلہ کشمیر کے پرامن حل اور خطے میں پائیدار امن کیلئے عالمی برادری کو بھارت پر دباو ڈالنا ہو گا تاکہ وہ اقوام متحدہ کی قراردادوں کے مطابق مسئلہ کشمیر کو حل کرے۔رضوان سعید شیخ نے کہا کہ 25 کروڑ کی آبادی کا پانی روکنا اعلان جنگ تصور کیا جائے گا۔

سندھ طاس معاہدے کو یکطرفہ معطل کرنے کی کوئی شق یا گنجائش نہیں۔ عالمی برادری پانی کو بطور ہتھیار استعمال کی حمایت نہیں کرے گی۔پاکستانی سفیر نے خبردارکرتے ہوئے کہا کہ بین الاقوامی برادری کسی صورت پانی کو ہتھیار کے طور پر استعمال کرنے کے غیر قانونی اور غیر انسانی عمل کی حمایت نہیں کرے گی۔بھارتی قیادت کے بیانات کشیدگی کو ہوا دینے کا سبب بن رہے ہیں۔

بھارتی قیادت کے بیانات ہندوتوا کی دہشت گردانہ سوچ کی عکاسی کرتے ہیں۔ بلوچستان میں بھارت کا کردار کسی سے ڈھکا چھپا نہیں۔ان کا کہنا تھا کہ بھارتی پارلیمنٹ میں اکھنڈ بھارت کا نقشہ تسلط پسندانہ سوچ اور مذموم مقاصد کی نشاندہی کرتا ہے۔بھارتی قیادت کا داخلی ضرورتوں کیلئے پاکستان کارڈ کھیلنا اور قومیت کو ہوا دینا انتہائی خطرناک روش ہے۔ نفرت کا بیانیہ انتخابی خساروں کی پردہ پوشی کیلئے فروغ دیا جا رہا ہے۔رضوان سعید شیخ نے بلوچستان میں بھارتی کردار کو بے نقاب کرتے ہوئے کہا کہ یہ کردار کسی سے ڈھکا چھپا نہیں۔ بلوچستان میں معصوم بچوں کے خون سے ہاتھ رنگنے والے دہشت گرد اور ان کے نظریاتی و مالیاتی سرپرست انسانیت کی بدترین مثال ہیں۔