Live Updates

عمران خان جلد باہر آتے نظر نہیں آ رہے، ملک میں صورتحال تبدیل ہو گئی ہے اب یہ نیا پاکستان ہے، ساجد تارڑ

امریکہ کی پالیسی میں پاکستان کے حق میں تبدیلی آ رہی ہے، ٹرمپ نوبل انعام کے مستحق ہیں عالمی امن کیلئے ان کا کردار اہم ہے۔ امریکی صدر نے عالمی امن کیلئے اہم کردار ادا کیا ہے، امریکی صدر کے سابق مشیر کی میڈیا سے گفتگو

فیصل علوی پیر 2 جون 2025 17:01

لندن(اردوپوائنٹ اخبار تازہ ترین۔02 جون 2025)امریکی صدر ڈونلڈٹرمپ کے سابق مشیرساجد تارڑ کا کہنا ہے کہ بانی پی ٹی آئی عمران خان جلد باہر آتے نظر نہیں آ رہے، ملک میں صورتحال تبدیل ہو گئی ہے اب یہ نیا پاکستان ہے، امریکہ کی پالیسی میں پاکستان کے حق میں تبدیلی آ رہی ہے، لندن میں چیئرمین او پی ایف سید قمر رضا کے صاحبزادے کی شادی کی تقریب میں شرکت کے موقع پرمیڈیا سے گفتگو کرتے ہوئے امریکی صدر کے سابق مشیر نے کہا کہ ڈونلڈٹرمپ کا پہلا دور بھی امن کا دورتھا جس میں کشمیر پرثالثی کی پیشکش کی گئی۔

ٹرمپ نوبل انعام کے مستحق ہیں عالمی امن کیلئے ان کا کردار اہم ہے۔امریکی صدر نے عالمی امن کیلئے اہم کردار ادا کیا ہے۔اس موقع پر گفتگو کرتے ہوئے وفاقی وزیرچوہدری سالک حسین کا کہنا تھا کہ اوورسیز پاکستانی پاکستان کا اتنا ہی حصہ ہیں جتنا ملک کے اندر رہنے والے ہیں۔

(جاری ہے)

اوورسیز کنونشن سے اوورسیز پاکستانیوں کو نئی امید ملی۔ ہم نے کنونشن کو سیاست سے بالاتر رکھا ہراوورسیز پاکستانی ہمارے لئے برابر ہے۔

انہوں نے کہا کہ میرپور انٹرنیشنل ایئرپورٹ کیلئے ٹاسک فورس قائم کردی ہے۔ ہرہفتے میٹنگزہو رہی ہیں۔ 2 سے 3 ہفتے میں ایئرپورٹ منصوبے کا فائنل ڈاکیومنٹ وزیراعظم شہباز شریف کو پیش کیا جائے گا۔اوورسیز پاکستانیوں کیلئے انقلابی اقدامات اٹھائے گئے ہیں۔ اوورسیز کورٹ کا قیام ودیگر سہولیات کی فراہمی اولین ترجیح ہے۔اوورسیز پاکستانی ملکی معیشت میں اہم کردار اداکررہے ہیں۔

اوورسیز پاکستانیوں کوملک کے مستقبل پر بھروسہ ہے۔حکومت اوورسیزپاکستانیوں کو قومی ترقی میں ایک کلیدی شراکت دار کے طور پر دیکھتی ہے۔اوورسیز پاکستانیوں نے ریکارڈ ترسیلات زر بھجوا کر حکومت پر اعتماد ظاہر کیا ہے۔یہ بھی بتایا گیا تھا کہ تقریب میں برطانیہ میں پاکستانی ہائی کمشنر ڈاکٹر محمد فیصل ،برطانوی ٹریڈانوائے محمد یاسین اورلارڈقربان حسین سمیت 600 سے زائد اہم افراد شریک ہوئے ۔