امام حج بیت المقدس کی آزادی کیلئے اسرائیل کیخلاف بیداری کا پیغام دیں، متحدہ علماء محاذ

کراچی(اُردو پوائنٹ اخبارتازہ ترین - این این آئی۔ 03 جون2025ء)متحدہ علماء محاذ پاکستان کے زیر اہتمام محاذ کے بانی سیکریٹری جنرل مولا نا محمدامین انصاری کی میزبانی ،مرکزی چیئرمین علامہ عبدالخالق فریدی سلفی کی زیر صدارت ، مرکزی صدر حجة الاسلام علامہ مرزا یوسف حسین کی سرپرستی میںنیو سیکریٹریٹ گلشن اقبال میں18واں سالانہ حج بیداری ملت کا پیغام سیمینار میںشریک مختلف مکاتب فکر کے جید علماء مشائخ ،سیاسی زعماء،تاجر ،صحافی، وکلاء ،دانشور،ڈاکٹرو ممتاز شخصیات نے خطاب کرتے ہوئے مطالبہ کیا ہے کہ امام حج بیت المقدس کی آزادی ، اسرائیلی جارحیت کیخلاف بیداری کا پیغام دیں۔

سعودی حکومت ایام حج کے اختتام پر مسلم حکمرانوں کی عالمی فلسطین کانفرنس بلائے اور لاکھوں شہدائے فلسطین کے خون کا حساب لینے اور فلسطینی مسلمانوں کو مزید اسرائیلی وحشیانہ بمباری ،انسانیت سوز مظالم سے بچانے کیلئے اسرائیل کے خلاف واضح دوٹوک جرأت مندانہ اقدام کا اعلان کرے۔

(جاری ہے)

علماء نے کہا کہ خطبہ حج میں قبلہ اول کی آزادی اور فلسطینی مسلمانوں پر انسانیت سوز وحشیانہ اسرائیلی مظالم کیخلاف آواز بلند کرنا تحریک آزادی القدس کو فتح کی منزل تک پہنچانے میں بنیادی کردار کا حامل ہوگا۔

عالم اسلام کے مرکز حرمین شریفین سے فلسطین وکشمیر سمیت مسلمانوں پر جاری وحشیانہ مظالم کے خلاف اٹھنے والی ہر آواز ظالم و استعماری طاقتوں پر لرزہ طاری کردے گی۔علماء نے فلسطین کیلئے ایران و پاکستان کی مستقبل میں مشترکہ موثر جدوجہد اور پاک ایران قیادت کی ملاقاتوں کا خیر مقدم کرتے ہوئے خوش آئند قرار دیا۔مسلم حکمران خصوصاً سعودی عرب ،ایران ، پاکستان، افغانستان و دیگر قبلہ اول کی آزادی و اسرائیلی جارحیت کیخلاف متحد و بیدار ہوجائیں۔

حکومت و فیلڈ مارشل آرمی چیف پاکستان کے خلاف بھارت کے سہولت کار اور قبلہ اول پر قابض لاکھوں فلسطینیوں کے قاتل اسرائیل کو سبق سکھانے کیلئے اپنے میزائلوں کا رخ تل ابیب کی جانب کردیں۔بیت المقدس کی آزادی کیلئے عالم اسلام کی جانب سے قائدانہ کردار اداکریں۔ غذائی و طبی امداد پہنچانے میں اسرائیلی رکاوٹوں کو ایمانی غیرت و جرات کیساتھ بزور طاقت ختم کریں۔

آیت اللہ امام خمینی کا یوم القدس منائے جانے کا فرمان اور شہدائے مقاومت کی بلاامتیاز رنگ و مسلک لازوال عظیم قربانیاں کامیاب ہو گئیں، اسرائیل امریکہ اور اس کے سہولت کار فلسطین کی جنگ ہار گئے اوراپنے مقاصد میں کامیاب نہیں سکے۔فلسطین کے غیور مسلمان لاکھوں شہادتیں و قربانیاں دینے کے باوجود آزادی القدس کے موقف حق پر آج تک اسلامی غیرت و حمیت و جرات کے ساتھ کھڑے ہیں ۔

سیمینار سے مہمانان خصوصی علامہ پروفیسر ڈاکٹر سید شمیل احمد قادری حنبلی،شیخ الحدیث مولانا مفتی محمد دائود، علامہ سید محمد عقیل انجم قادری،مولانا منظرالحق تھانوی، علامہ ڈاکٹر مفتی عبدالغفوراشرفی،مولانامفتی وجیہہ الدین،علامہ سید سجادشبیر رضوی ،علامہ محمد حسن شریفی، ملی یکجہتی کونسل سندھ کے رہنما ، مرکزی جماعت اہلحدیث کراچی کے صدر، متحدہ علماء محاذ کراچی کے سینئر نائب صدرسفیر امن و اتحاد علامہ مرتضی خان رحمانی سلفی،محاذ کے صوبائی رہنما مولانا قاری محمد اقبال رحیمی، پاکستان مسلم لیگ فنکشنل علماء مشائخ ونگ سندھ کے رہنما ،جامعہ حلیمیہ ایجوکیشنل ویلفیئر سوسائٹی کے سربراہ جامع مسجد بلال سلطان آباد کے خطیب، ریلجیئس سپورٹ پرسن وزارت صحت ڈسٹرکٹ ویسٹ مولانا مفتی اسدالحق چترالی،جامعہ علامہ بنوری ٹائون کے فاضل ، مصنف و محقق کالم نگار مولانا محمد عزیر بخاری،استاد جامعہ ستاریہ مولانا قاری فرحان سلفی،پاکستان مسلم لیگ فنکشنل علماء مشائخ ونگ سندھ کے رہنما، سواد اعظم اہلسنت یوتھ فورس کراچی کے صدر مولانا پیر حافظ گل نواز خان ترک، جامع مسجد خلیل گلستان جوہر کے سربراہ ،پاکستان امن کونسل سندھ کے صدر علامہ عبدالماجد فاروقی، مفسرقرآن علامہ مفتی روشن دین الرشیدی،علامہ اظہر فاروقی، مولانا مفتی عطاء الرحمن قریشی،مولانا مفتی عزیز احمد نوتیزئی، پروفیسر مولانا کاشف شمسی ،مولانا قاری ادیب الحق چترالی،مولانا قاری حافظ محمد ابراہیم چترالی و دیگر نے خطاب کیا۔