Live Updates

بھارتی وزیراعظم اپنے عوام اور عالمی برادری سے جھوٹ بول رہا ہے، بلاول بھٹو زرداری

پاکستان میں ہونیوالی دہشت گردی کی کارروائیوں میں بھارت ملوث ہے، بھارتی نیوی کا افسر کلبھوشن بلوچستان سے گرفتار ہواہے

پیر 9 جون 2025 11:55

واشنگٹن(اُردو پوائنٹ اخبارتازہ ترین - این این آئی۔ 09 جون2025ء)پاکستان پیپلز پارٹی کے چیئرمین اورپاکستانی سفارتی مشن کے سربراہ بلاول بھٹو زرداری نے کہا ہے کہ بھارت پانی کو بطور ہتھیار استعمال کر رہا ہے اور مودی عالمی برادری سے بھی جھوٹ بول رہے ہیں۔ بلاول بھٹوزرداری نے واشنگٹن میں ایک نیوز کانفرنس سے خطاب کرتے ہوئے کہا کہ پاکستان امن کا خواہش مند ہے اور اس کے لیے مسلسل اقدامات بھی کررہا ہے جبکہ بھارتی وزیراعظم نے دھمکی آمیز اور جارحانہ رویہ اختیار کیا ہوا ہے۔

انہوں نے کہا کہ خطے میں امن کیلئے ہم بھارت کے ساتھ بات چیت کے لئے تیار ہیں۔ بلاول نے کہا کہ پاکستان میں ہونے والی دہشت گردی کی کارروائیوں میں بھارت ملوث ہے، بھارتی نیوی کا افسر کلبھوشن بلوچستان سے گرفتار ہواہے ۔

(جاری ہے)

انہوں نے کہا کہ بھارت پانی کو بطور ہتھیار استعمال کر رہا ہے اور اس کا پانی روکنے کا اقدام جارحیت ہے ۔ بلاول بھٹونے کہا کہ بھارتی وزیراعظم اپنے عوام اور عالمی برادری سے جھوٹ بول رہا ہے جبکہ بھارتی میڈیا نے کشیدگی کے دوران مسلسل جھوٹ بولا۔

انہوں نے کہاکہ امریکی صدر ٹرمپ نے جنگ بندی میں اہم کردار ادا کیا اور اب بھارت کو جارحیت سے روکنے کیلئے بھی عالمی برادری کو کردار ادا کرنا ہوگا کیونکہ کوئی ایک فریق یکطرفہ طور پر سندھ طاس معاہدہ معطل نہیں کرسکتا۔انہوں نے کہا کہ ہمارے شاہینوں نے 6بھارتی طیارے مار گرائے جس کا اعتراف کرنے کے لئے بھارت کو ایک ماہ کا وقت لگا جبکہ پاکستان کے کسی ایک طیارے کو نقصان نہیں پہنچا۔بلاول بھٹو نے کہا کہ پاکستان دہشت گردی سے سب سے زیادہ متاثر ہے اور ہم نے اس کے لیے قربانیاں دی ہیں۔سفارتی مشن کے سربراہ نے پاک بھارت کشیدگی کے دوران پاکستان کی حمایت کرنے والے دوست ممالک کا ایک بار پھر شکریہ ادا کیا۔